ସିରିଆ ବିଜୟ ପରେ ଦୁଇ ଶତ୍ରୁଙ୍କ ମଧ୍ୟରେ ବନ୍ଧୁତା ସ୍ଥାପନ କରିବେ ଏର୍ଦୋଗନ

ଅଙ୍କାରା: ସିରିଆର ଅଲ କାଏଦା ସହ ଜଡିତ ଏକ ବିଦ୍ରୋହୀ ଗୋଷ୍ଠୀ ଏଚଟିଏସର ବିଜୟ ପରେ ତୁର୍କୀ ରାଷ୍ଟ୍ରପତି ରିସେପ ତାଇପ  ଏର୍ଦୋଗନଙ୍କ ବିଷୟରେ ଅଧିକ ଚର୍ଚ୍ଚା ହେଉଛି। ସମଗ୍ର ବିଶ୍ୱର ବିଶେଷଜ୍ଞମାନେ ଏହାକୁ  ଏର୍ଦୋଗନଙ୍କ ପାଇଁ ବିଜୟ ଏବଂ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ପାଇଁ ପରାଜୟ ବୋଲି କହୁଛନ୍ତି। ଏହି ବିଜୟରେ ଆନନ୍ଦିତ ତୁର୍କୀ ରାଷ୍ଟ୍ରପତି ବର୍ତ୍ତମାନ ଆଫ୍ରିକାରେ ଏକ ବଡ଼ ପଦକ୍ଷେପ ‌ନେବାକୁ ଯାଉଛନ୍ତି।  

ଏର୍ଦୋଗନ ସୋମାଲିଆ ଏବଂ ଏହାର ପଡୋଶୀ ଦେଶ ଇଥିଓପିଆର ମୁଖ୍ୟମାନଙ୍କୁ ଆଲୋଚନା ପାଇଁ ଡାକିଛନ୍ତି। ସୋମାଲିଆ ଏବଂ ଇଥିଓପିଆ ମଧ୍ୟରେ ତିକ୍ତତା ଚାଲିଛି ଏବଂ ବର୍ତ୍ତମାନ ତୁର୍କୀ ଏହାକୁ ସିଧାସଳଖ କଥାବାର୍ତ୍ତା ମାଧ୍ୟମରେ ଶେଷ କରିବାକୁ ଚାହୁଁଛି।  ଇଥିଓପିଆ ଆଫ୍ରିକୀୟ ଉପକୂଳରେ ଥିବା ବନ୍ଦରଗୁଡିକୁ ପ୍ରବେଶ କରିବାକୁ ଚାହୁଁଛି ଯାହା ଦ୍ବାରା ଏହା ବାଣିଜ୍ୟ କରିପାରିବ।

ତୁର୍କୀ ସୋମାଲିଆର ରାଷ୍ଟ୍ରପତି ହାସନ ଶେଖ ମହମୁଦ ଏବଂ ଇଥିଓପିଆର ପ୍ରଧାନମନ୍ତ୍ରୀ ଆବି ଅହମ୍ମଦଙ୍କ ସହ ଆଲୋଚନା କରିଛି। ରାଷ୍ଟ୍ରପତି ମହମୁଦ ସିଧାସଳଖ ପ୍ରଧାନମନ୍ତ୍ରୀ ଅହମ୍ମଦଙ୍କ ସହ କଥା ହେବେ ବୋଲି ସୋମାଲିଆର ଗଣମାଧ୍ୟମ ମଧ୍ୟ ନିଜ  ରିପୋର୍ଟରେ କହିଛି।  ତେବେ ଏନେଇ ତୁର୍କୀର ବୈଦେଶିକ ମନ୍ତ୍ରଣାଳୟ ନିଜର ପ୍ରତିକ୍ରିୟା ଦେଇନାହିଁ। ଇଥିଓପିଆ ମଧ୍ୟ କୌରସି ବିବୃତି ଦେଇନାହିଁ।

ଏହା ପୂର୍ବରୁ ଇଥିଓପିଆ ସୋମାଲିଆର ଏକ ବିଚ୍ଛିନ୍ନ ଅଂଶ ସୋମାଲିଆଲ୍ୟାଣ୍ଡ ସହିତ  ନୌସେନା ଚୁକ୍ତି ସ୍ୱାକ୍ଷର କରିଥିଲା। ଏହି ପଦକ୍ଷେପ ସୋମାଲିଆ ଦ୍ବାରା ସୋମାଲିଲ୍ୟାଣ୍ଡର ସ୍ବାଧୀନତା ଘୋଷଣାର ସ୍ୱୀକୃତି ଭାବରେ ଦେଖାଯାଇଥିଲା। ସୋମାଲିଆ ଏହାକୁ ଏହାର ସାର୍ବଭୌମତ୍ୱର ଉଲ୍ଲଂଘନ ଭାବରେ ଗ୍ରହଣ କରିଥିଲା।

ତୁର୍କୀ ସୋମାଲିଆ ସହିତ ବହୁତ ଶକ୍ତିଶାଳୀ ପ୍ରତିରକ୍ଷା ଏବଂ ରାଜନୈତିକ ସମ୍ପର୍କ ସ୍ଥାପନ କରିଛି।  ଇଥିଓପିଆର ପଦକ୍ଷେପକୁ ଦୃଷ୍ଟିରେ ରଖି ତୁର୍କୀ ସୋମାଲିଆ ସହିତ ନୌସେନା ଚୁକ୍ତି ସ୍ୱାକ୍ଷର କରିଛି। ଏହି ଚୁକ୍ତିରେ ସୋମାଲିଆର ନୌସେନା ପ୍ରତିଷ୍ଠା ଏବଂ ସୋମାଲିଆର ଆଞ୍ଚଳିକ ଜଳକୁ ବିଦେଶୀ ବାହିନୀରୁ ରକ୍ଷା କରିବାକୁ ଯୋଜନା କରାଯାଇଥିବା ଜଣାଯାଇଛି। ଏହି ଚୁକ୍ତି ଅନୁଯାୟୀ ତୁର୍କୀ ସୋମାଲିଆ ଉପକୂଳରୁ ତେଲ ମଧ୍ୟ ବାହାର କରିପାରିବ। ସୋମାଲିଆରେ ଏକ ନୌସେନା ବେସ୍ ନିର୍ମାଣ ଯୋଜନା ସହିତ ଆଗକୁ ବଢ଼ିଲେ ସୋମାଲିଆ ଇଥିଓପିଆକୁ ଯୁଦ୍ଧ  ଧମକ ଦେଇଛି।

ଅଧିକ ପଢ଼ନ୍ତୁ: ଆମ୍ବେଦରଙ୍କ ପ୍ରତିମୂର୍ତ୍ତି ଭଙ୍ଗାରୁଜ୍ଜାକୁ ନେଇ ମହାରାଷ୍ଟ୍ରର ପରଭାନୀରେ ହିଂସା

ତୁର୍କୀ ସରକାର ଉଭୟଙ୍କ ମଧ୍ୟରେ ମଧ୍ୟସ୍ଥତା କରିଛନ୍ତି ଏବଂ ଦୁଇ ରାଉଣ୍ଡ ଆଲୋଚନା କରି ସାରିଛନ୍ତି। ଆଲୋଚନା ସମୟରେ ଅଗ୍ରଗତି ହୋଇଛି ବୋଲି ତୁର୍କୀ ଅଧିକାରୀମାନେ ଅଗଷ୍ଟ ମାସରେ ଘୋଷଣା କରିଥିଲେ। ଗୁରୁତ୍ୱପୂର୍ଣ୍ଣ କଥା ହେଉଛି, ଇଥିଓପିଆ ସହିତ ତୁର୍କୀର ମଧ୍ୟ ଘନିଷ୍ଠ ସମ୍ପର୍କ ରହିଛି। ଗୃହଯୁଦ୍ଧର ମୁକାବିଲା ପାଇଁ ତୁର୍କୀ ଇଥିଓପିଆକୁ ଅନେକ ଘାତକ ଡ୍ରୋନ୍ ବିକ୍ରି କରିଛି।

ବିଶ୍ଳେଷକମାନେ କହିଛନ୍ତି ଯେ ପ୍ରତ୍ୟକ୍ଷ କଥାବାର୍ତ୍ତା ପାଇଁ ଉଭୟ ଦେଶର ନେତାଙ୍କ ମଧ୍ୟରେ ଏକ ସକାରାତ୍ମକ ସ୍ଥିତି ସୃଷ୍ଟି ହୋଇଛି। ବର୍ତ୍ତମାନ କୁହାଯାଉଛି ଯେ, ସୋମାଲିଆ ଇଥିଓପିଆକୁ ଏହାର ଗୋଟିଏ ବନ୍ଦର ପ୍ରଦାନ କରିବ ଯାହା ଦ୍ବାରା  ସୋମାଲିଆଲ୍ୟାଣ୍ଡ ସହ ହୋଇଥିବା ଚୁକ୍ତିରୁ ଓହରି ପାରିବେ। ତୁର୍କୀ ଆଶା କରୁଛି ଯେ, ରାଷ୍ଟ୍ରପତି ଏର୍ଦୋଗନ ଏହି ଚୁକ୍ତି ସଂପୂର୍ଣ୍ଣ କରିବେ ।  ଯଦି ଏର୍ଦୋଗନ ଏହା କରିବାରେ ସଫଳ ହୁଅନ୍ତି, ତେବେ ଏହା ତାଙ୍କର ସ୍ଥିତିକୁ ବହୁଗୁଣିତ କରିବାରେ ସହାୟକ ହେବ ବୋଲି ଅନ୍ତର୍ଜାତୀୟସ୍ତରରେ ଚର୍ଚ୍ଚା ହେଉଛି।

ଅଧିକ ପଢ଼ନ୍ତୁ: ପତ୍ନୀଙ୍କ ନିର୍ଯାତନାରେ ଅତିଷ୍ଠ ହୋଇ ଜୀବନ ହାରିଲେ ସ୍ବାମୀ