ପାଟନା: ବିରୋଧୀ ଇଣ୍ଡିଆ ମେଣ୍ଟର ପ୍ରଧାନମନ୍ତ୍ରୀ ପ୍ରାର୍ଥୀକୁ ନେଇ ସହଯୋଗୀଙ୍କ ମଧ୍ୟରେ ଟଣାଓଟରା ଆରମ୍ଭ ହୋଇଯାଇଥିବା ବେଳେ ବିହାର ମୁଖ୍ୟମନ୍ତ୍ରୀ ତଥା ଜେଡିୟୁ ନେତା ନୀତୀଶ କୁମାର ପୁଣି ଏନ୍‌ଡିଏକୁ ଫେରିବା ନେଇ ଚର୍ଚ୍ଚା ଆରମ୍ଭ ହେଲାଣି। ଜେଡିୟୁ ଅଧ୍ୟକ୍ଷ ପଦରୁ ଲଲନ ସିଂହଙ୍କ ଇସ୍ତଫ‌ା ଏବଂ କେତେକ ବିଜେପି ନେତା ନୀତୀଶଙ୍କୁ ଭେଟିବା ଘଟଣା ପରେ ଏହି ଆଲୋଚନା ଜୋର ଧରିଛି। ଏସଂପର୍କରେ ନୀତୀଶଙ୍କ ନିରବତା ସମଗ୍ର ଘଟଣାକୁ ରହସ୍ୟମୟ କରି ରଖିଛି।

Advertisment

ସମଗ୍ର ଘଟଣା ପଛରେ ଆରଜେଡି ମୁଖ୍ୟ ଲାଲୁ ପ୍ରସାଦ ଯାଦବଙ୍କ ସହିତ ନୀତୀଶଙ୍କର ମତଭେଦ ରହିଛି। ୨୦୨୨ ଅଗଷ୍ଟରେ ବିଜେପି ନେତୃତ୍ବାଧୀନ ଏନଡିଏ ଛ‌ାଡ଼ି ନୀତୀଶ ଲାଲୁଙ୍କ ଆରଜେଡି ସହିତ ହାତ ମିଳାଇ ସରକାର ଗଠନ କରିଥିଲେ। କୁହାଯାଉଛି ଯେ ସେତେବେଳେ ଲାଲୁ କୁଆଡ଼େ ସର୍ତ୍ତ ରଖିଥିଲେ ଯେ ବର୍ଷକ ପରେ ତାଙ୍କ ପୁଅ ତେଜସ୍ବୀଙ୍କୁ ମୁଖ୍ୟମନ୍ତ୍ରୀ କରାଯିବ। ଏଥିରେ ନୀତୀଶ ରାଜି ହୋଇଥିଲେ। କିନ୍ତୁ ଏବେ ମୁଖ୍ୟମନ୍ତ୍ରୀ ପଦ ଛାଡ଼ିବାକୁ ରାଜି ହେଉ ନାହାନ୍ତି ନୀତୀଶ। ଯାହାକୁ ନେଇ ଲାଲୁ ଭୀଷଣ କ୍ଷୁବ୍ଧ। ଏହି କାରଣରୁ ନୀତୀଶଙ୍କୁ ଇଣ୍ଡିଆ ମେଣ୍ଟର ଆବାହକ କରିବା ରାସ୍ତାରେ ପ୍ରତିବନ୍ଧକ ହୋଇଥିଲେ ଲାଲୁ। ଏହାକୁ ନେଇ ଅସନ୍ତୁଷ୍ଟ ଥିବା ନୀତୀଶ ଏନଡିଏକୁ ଫେରିବା ଲାଗି ପ୍ରସ୍ତୁତ ହେଉଛନ୍ତି। ପୁଣି ଦଳର ଅନେକ ନେତା ଏଥିପାଇଁ ତାଙ୍କ ଉପରେ ଚାପ ପକାଉଛନ୍ତି। କିନ୍ତୁ ଏହାକୁ ବିରୋଧ କରୁଛନ୍ତି ଲଲନ ସିଂହ ଏବଂ ଆଉ କିଛି ନେତା। ନୀତୀଶ ବିଜେପି ରାସ୍ତାରେ ଯାଉଥିବାର ସୂଚନା ପାଇବା ପରେ ଲଲନ ଜେଡିୟୁ ମୁଖ୍ୟ ପଦରୁ ଇସ୍ତଫ‌ା ଦେଇଛନ୍ତି। କୁହାଯାଉଛି ଲଲନ ହେଉଛନ୍ତି ଲାଲୁଙ୍କ ଅତି ଘନିଷ୍ଠ। ଲଲନ ଯୁକ୍ତି କରିଥିଲେ ଯେ ଏନଡିଏକୁ ଜେଡିୟୁ ପୁଣି ଫେରିଲେ ଦଳର ରାଜ‌ନୈତିକ ପ୍ରତିଷ୍ଠା ନଷ୍ଟ ହୋଇଯିବ। କିନ୍ତୁ ନୀତୀଶ କିଛି ପ୍ରତିକ୍ରିୟା ଜଣାଇନଥିଲେ। ତେବେ ଆସନ୍ତା ଶୁକ୍ରବାର ଦିନ ଦିଲ୍ଲୀରେ ଜେଡିୟୁର ଜାତୀୟ କାର୍ଯ୍ୟକାରିଣୀ ବୈଠକରେ ଏସଂପର୍କରେ ଚୂଡ଼ାନ୍ତ ନିଷ୍ପତ୍ତି ହୋଇପାରେ ବୋଲି କୁହାଯାଉଛି।

ଲଲନଙ୍କ ଇସ୍ତଫା ନେଇ ନୀତୀଶ ଆ‌େଦୌଁ ବିଚଳିତ ନୁହନ୍ତି। ତାଙ୍କ ସ୍ଥାନରେ କୌଣସି ଦଳିତ ନେତାଙ୍କୁ ଦଳର ମୁଖ୍ୟ କରିବାକୁ ନୀତୀଶ‌ ଯୋଜନା କରୁଛନ୍ତି। ଅତୀତରେ ମଧ୍ୟ ନୀତୀଶ ଏଭଳି ନିଷ୍ପତ୍ତି ନେଇଥିଲେ। ଦଳର ଅଧ୍ୟକ୍ଷ ପଦରୁ ଜର୍ଜ ଫର୍ଣ୍ଣାଡିଜ୍, ଶରଦ ଯାଦବ ଏବଂ ଆରସିପି ସିଂହଙ୍କୁ ସେ ବିଦା କରିଥିଲେ।
ନିର୍ଭରଯୋଗ୍ୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ ବିଜେପିର କିଛି ନେତା ନୀତୀଶଙ୍କୁ ଭେଟି ଆସନ୍ତା ଲୋକସଭା ନିର୍ବାଚନ ଏକାଠି ଲଢ଼ିବାକୁ ପ୍ରସ୍ତାବ ଦେଇଛନ୍ତି। ୨୦୧୯ରେ ବିଜେପି-ଜେଡିୟୁ ମେଣ୍ଟ କରି ରାଜ୍ୟର ୪୦ଟି ଲୋକସଭା ଆସନରେ ପ୍ରାର୍ଥୀ ଦେଇଥିଲେ। ଜେଡିୟୁ ୧୬ଟି ଆସନ ଜିତିଥିବା ବେଳେ ବିଜେପି ୧୭ଟି ଆସନରେ ବିଜୟୀ ହୋଇଥିଲା। ବିଜେପିର ଅନ୍ୟତମ ସହଯୋଗୀ ଲୋକଶକ୍ତି ଜନତା ପାର୍ଟିକୁ ୬ଟି ଆସନ ମିଳିଥିଲା। ଆରଜେଡି ଖାତା ଖୋଲି ପାରିନଥିଲା। ବିଜେପି ଏଥର ନୀତୀଶଙ୍କୁ ୧୨ଟି ଲୋକସଭା ଆସନ ଏବଂ ରାଜ୍ୟସଭାରେ ଦୁଇଟି ଆସନ ଦେବାଲାଗି ପ୍ରସ୍ତାବ ଦେଇଛି। ନୀତୀଶଙ୍କ ଦ୍ବାରା ମନୋନୀତ ଜଣେ ନେତାଙ୍କୁ ରାଜ୍ୟପାଳ କରିବା ଲାଗି ମଧ୍ୟ ବିଜେପି ପ୍ରସ୍ତାବ ଦେଇଛି। ଇଣ୍ଡିଆ ମେଣ୍ଟରେ ଫାଟ ସୃଷ୍ଟି କଲେ ଏନଡିଏକୁ ଫାଇଦା ହେବ। ଏହି କାରଣରୁ ବିଜେପି ନେତାମାନେ ନୀତୀଶଙ୍କ ସହ ଯୋଗାଯୋଗ କରୁଛନ୍ତି।