ବିହାର ନିର୍ବାଚନ ପୂର୍ବରୁ ଇଣ୍ଡିଆ-ଏନଡିଏରେ ଗୋଷ୍ଠୀ କନ୍ଦଳ ବଢ଼ିଲା

ପାଟନା: ବିହାରରେ ଆସନ୍ତା ବର୍ଷର ବିଧାନସଭା ନିର୍ବାଚନକୁ ନେଇ ବିଭିନ୍ନ ‌ରାଜନୈତିକ ଦଳଙ୍କ ମଧ୍ୟରେ ଛକାପଞ୍ଝା ଆରମ୍ଭ ହୋଇସାରିଛି। ଅନ୍ୟ ରାଜ୍ୟ ପରି ବିହାରରେ ମଧ୍ୟ ଦୁଇଟି ରାଜନୈତିକ ମିଳିତ ମେଣ୍ଟ ମୁହାଁମୁହିଁ ହୋଇଛନ୍ତି। ଏନଡିଏରେ ବିଜେପି, ଜେଡିୟୁ, ଲୋକ ଜନଶକ୍ତି ପାର୍ଟି-ଆର (ଏଲଜେପି-ଆର), ରାଷ୍ଟ୍ରୀୟ ଲୋକ ମଞ୍ଚ (ଆରଏସଡି) ଏବଂ ହିନ୍ଦୁସ୍ତାନୀ ଆୱାମ ମୋର୍ଚ୍ଚା (ହମ) ରହିଥିବାବେଳେ ବିରୋଧୀ ଇଣ୍ଡିଆ ମେଣ୍ଟରେ ଆରଜେଡି, କଂଗ୍ରେସ, ବାମପନ୍ଥୀ ଦଳ ଏବଂ ଭିଆଇପି ସାମିଲ ଅଛନ୍ତି।

ଉପରୁ ଏନଡିଏରେ ସବୁକିଛି ଠିକ୍ ଦେଖାଯାଉଥିଲେ ମଧ୍ୟ ଆଭ୍ୟନ୍ତରୀଣ ଭାବରେ ସେପରି ନୁହେଁ। ବିଶେଷକରି ତିରହଟ ଏମଏଲସି ଉପ-ନିର୍ବାଚନରେ ​​ସ୍ବାଧୀନ ପ୍ରାର୍ଥୀ ବଂଶୀଧର ବ୍ରଜୱାସିଙ୍କ ବିଜୟ ପରେ ଏନଡିଏରେ ଥିବା ମତଭେଦ ପଦାରେ ପଡ଼ିଛି। ଏନଡିଏର ପରାଜିତ ପ୍ରାର୍ଥୀ ଜେଡିୟୁକୁ ସମର୍ଥନ କରୁଥିବା ଅଭିଷେକ ଝା ଏନଡିଏର ଜନସାଧାରଣ ପ୍ରତିନିଧୀଙ୍କ ବିରୋଧରେ ସହଯୋଗ କରୁ ନ ଥିବା ଅଭିଯୋଗ କରିଛନ୍ତି। ଚିରାଗ ପାସୱାନଙ୍କ ନେତୃତ୍ୱରେ ଏଲଜେପି-ଆରକେର ବିଦ୍ରୋହୀ ପ୍ରାର୍ଥୀକୁ ନେଇ ଏନଡିଏରେ ଗୋଷ୍ଠୀ କନ୍ଦଳ ଜାରି ରହିଛି। ବିଜେପି ଭିତରେ କୌଣସି ଦୃଶ୍ୟମାନ ମତଭେଦ ନାହିଁ, କିନ୍ତୁ ଜେଡିୟୁରେ  ଆଭ୍ୟନ୍ତରୀଣ ଉତ୍ତେଜନା ଦେଖାଦେଇଛି। 

ନିକଟରେ ଜେଡିୟୁ ଜାତୀୟ କାର୍ଯ୍ୟନିର୍ବାହୀ ସଭାପତି ତଥା ରାଜ୍ୟସଭା ସଦସ୍ୟ ସଞ୍ଜୟ ଝାଙ୍କୁ ସେ ଦିଲ୍ଲୀରେ ପାଇଥିବା ସରକାରୀ ବାସଭବନର ଗୃହ ପ୍ରବେଶ ସମୟରେ ନିମନ୍ତ୍ରଣ ପାଇ  କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏବଂ ଏନଡିଏ ସାଂସଦମାନେ ଉପସ୍ଥିତ ଥିଲେ। ଏହି ଅବସରରେ ବିହାରର ଡେପୁଟି ସିଏମ୍ ସମ୍ରାଟ ଚୌଧୁରୀ ଏବଂ ବିଜୟ ସିହ୍ନା ମଧ୍ୟ ଉପସ୍ଥିତ ଥିଲେ।

ଆଶ୍ଚର୍ଯ୍ୟଜନକ କଥା ହେଲା ନୀତୀଶ କୁମାର, ଅଶୋକ ଚୌଧୁରୀ ଏବଂ ବିଜୟ ଚୌଧୁରୀ ପହଞ୍ଚି ନ ଥିଲେ। ଶ୍ରବଣ କୁମାର ଏକ ବ୍ୟତିକ୍ରମ ଥିଲେ। ସେ କିଛି କାମ ପାଇଁ ସେହି ସମୟରେ ଦିଲ୍ଲୀରେ ଉପସ୍ଥିତ ଥିଲେ। ବୋଧହୁଏ ସେଥିପାଇଁ ସେ ଯୋଗ ଦେଇଥିଲେ । ଏହା ସ୍ପଷ୍ଟ କରିଥିଲା ଯେ, ଜେଡିୟୁରେ କିଛି ବିବାଦ ରହିଛି।

ନୀତୀଶ କୁମାରଙ୍କ ପରାମର୍ଶ କ୍ରମ‌େ ମନୀଷ ବର୍ମା କର୍ମୀମାନଙ୍କ ସମାବେଶ କାର୍ଯ୍ୟକ୍ରମ ଆରମ୍ଭ କରିଥିଲେ। ପ୍ରତି ଜିଲ୍ଲାକୁ ଯାଇ ସେ କର୍ମୀମାନଙ୍କ ସହ ବୈଠକ କରିବା ସହିତ  ସମତା ପାର୍ଟିର ବରିଷ୍ଠ ଲୋକଙ୍କୁ ମଧ୍ୟ ଭେଟିଥିଲେ। ସଞ୍ଜୟ ଝାଙ୍କ ନିର୍ଦ୍ଦେଶରେ ତାଙ୍କ କାର୍ଯ୍ୟକ୍ରମ ବନ୍ଦ ହୋଇଯାଇଥିଲା। ଏଥିପାଇଁ ଦଳର ରାଜ୍ୟ ସଭାପତି ଉମେଶ କୁଶୱାହ ଏକ ଦଳୀୟ ନିର୍ଦ୍ଦେଶ ଜାରି କରିଥିଲେ। ଏହି ପ୍ରସଙ୍ଗରେ ଜେଡିୟୁ ମଧ୍ୟରେ ମତଭେଦ ଅଛି।

ନୀତୀଶଙ୍କ ପରାମର୍ଶରେ ମନୀଷ ବର୍ମା ତାଙ୍କର ଆଇଏଏସ୍ ଚାକିରି ଛାଡି ଜେଡିୟୁରେ ଯୋଗ ଦେଇଥିଲେ। ସେ ନୀତୀଶ କୁମାରଙ୍କର  ନିଜ ଜିଲ୍ଲାର ବାସିନ୍ଦା ତଥା ନୀତୀଶଙ୍କ ନିଜସ୍ୱ ଜାତି। ସେ ଜେଡିୟୁରେ ଯୋଗଦେବା ମାତ୍ରେ ନୀତୀଶ କୁମାର ତାଙ୍କୁ ଜାତୀୟ ମହାସଚିବ କରିଥିଲେ। ଲୋକମାନେ ଅନୁମାନ କରୁଥିଲେ ଯେ ମନୀଷ ନୀତୀଶଙ୍କର ଉତ୍ତରାଧିକାରୀ ହେବେ।

ସେହିପରି ରାଜ୍ୟରେ ଇଣ୍ଡିଆ ବ୍ଲକ୍ ମଧ୍ୟ ସୁରକ୍ଷିତ ନୁହେଁ। ମେଣ୍ଟରେ କଂଗ୍ରେସ ଏବଂ ଆରଜେଡି ମୁହାଁମୁହିଁ ହୋଇଛନ୍ତି। ଜାତୀୟସ୍ତରରେ ଇଣ୍ଡିଆ ବ୍ଲକର ନେତୃତ୍ୱର ଡୋର ରାହୁଲ ଗାନ୍ଧୀଙ୍କ ବଦଳରେ ମମତା ବାନାର୍ଜୀଙ୍କୁ ହସ୍ତାନ୍ତର କରିବାକୁ ଆରଜେଡି କହିଛି। ଲାଲୁ ପ୍ରସାଦ ଯାଦବଙ୍କ ବିବୃତି ପରେ ଉଭୟଙ୍କ ମଧ୍ୟରେ ସମ୍ପର୍କ ଖରାପ ହୋଇଯାଇଛି।

ତେବେ ଲୋକମାନେ ଏହାକୁ ଉଭୟଙ୍କ ଚାପ ରାଜନୀତି ବୋଲି ବିଚାର କରୁଛନ୍ତି। କଂଗ୍ରେସ ହୃଦୟଙ୍ଗମ କରିଛି ଯେ, ବିଧାନସଭା ନିର୍ବାଚନରେ ​​ଆସନ ହ୍ରାସ କରିବାକୁ ଆରଜେଡି ଚିନ୍ତା କରୁଛି। ତେଣୁ କଂଗ୍ରେସ ଚାପଦେବା ଆରମ୍ଭ କରିସାରିଛି। କଂଗ୍ରେସ ନେତାମାନେ କହିଛନ୍ତି, ସେମାନେ ଆସନରେ କଦାପି ଆପୋଷ ବୁଝାମଣା କରିବେ ନାହିଁ, କିନ୍ତୁ ବର୍ତ୍ତମାନ କଂଗ୍ରେସ ଦୁଇଜଣ ଡେପୁଟି ସିଏମ୍‌ଙ୍କ ପ୍ରସ୍ତାବ ଦେଇଛି।

ଅଧିକ ପଢ଼ନ୍ତୁ: ଇରାନ-ହେଜବୁଲ୍ଲା ଉପରେ ଆକ୍ରମଣ କରି ମଧ୍ୟପ୍ରାଚ୍ୟରେ ପରିବର୍ତ୍ତନ ଆଣିବୁ: ଇସ୍ରାଏଲ

ଗତଥର ଭଳି କଂଗ୍ରେସକୁ ଆସନ ଦେବା ଆରଜେଡି ଏକ ଅପଚୟ ବୋଲି ବିବେଚନା କରୁଛି। ୨୦୨୦ ବିଧାନସଭା ନିର୍ବାଚନରେ ​​କଂଗ୍ରେସ ଚାପ ପ୍ରୟୋଗ କରି ଆର‌ଜେଡିଠାରୁ ୭୦ଟି ଆସନ ନେଇଥିଲା। ସେଥିମଧ୍ୟରୁ କେବଳ ୧୯ଟି କଂଗ୍ରେସ ଜିତିଥିଲା। ଆରଜେଡି କହିଥିଲା ଯେ, ଯଦି କଂଗ୍ରେସ କିମ୍ବା ବାମପନ୍ଥୀ ଦଳର ପ୍ରାର୍ଥୀମାନେ କଂଗ୍ରେସର ଆସନ କାଟି ପ୍ରତିଦ୍ୱନ୍ଦ୍ୱିତା କରିଥାନ୍ତେ, ତେବେ ତେଜସ୍ୱୀ ଯାଦବ ସିଏମ୍ ହୋଇଥାନ୍ତେ।

ତେଣୁ ଏଥର ଆରଜେଡି କଂଗ୍ରେସର ଆସନ ହ୍ରାସ କରିବ ଏବଂ ଅବଶିଷ୍ଟ ଆସନଗୁଡ଼ିକୁ ଉନ୍ନତ ପ୍ରଦର୍ଶନ କରୁଥିବା ସିପିଆଇ (ଏମଏଲ) ଏବଂ ଆରଜେଡି ମଧ୍ୟରେ ଭାଗ ଭାଗ କରିବ ବୋଲି ରାଜ୍ୟ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଛି।

ଅଧିକ ପଢ଼ନ୍ତୁ: ନୀତୀଶଙ୍କୁ ସିନ୍ଦେଙ୍କ ପରି ଝଟକା ଦେବ କି ବିଜେପି ? ୨୦୨୫ ଯୋଜନାର ସୂଚନା ଦେଲେ ଶାହ