ଅହମଦାବାଦ: ଜୁନ ୧୨ ତାରିଖରେ ଗୁଜରାଟର ଅହମଦାବାଦରେ ଏୟାର ଇଣ୍ଡିଆ ବିମାନର ହୋଇଥିବା ଭୟାବହ ଦୁର୍ଘଟଣାରେ ମୃତ୍ୟୁବରଣ କରିଥିବା ୧୯ ଜଣଙ୍କ ଶରୀରର କିଛି ଅଂଶକୁ ଅହମଦାବାଦ ସିଭିଲ୍ ହସ୍ପିଟାଲ ଦାହ କରାଯାଇଛି।

Advertisment

ରାଜ୍ୟ ସରକାରଙ୍କ ଦ୍ୱାରା ପରିଚାଳିତ ହସ୍ପିଟାଲ ଏକ ବିଜ୍ଞପ୍ତିରେ କହିଛି ଯେ ଏହି ଭୟାବହ ଦୁର୍ଘଟଣାରେ ବିମାନ ଯାତ୍ରୀ ଓ ସ୍ଥାନୀୟଲୋକଙ୍କୁ ମିଶାଇ  ୨୬୦ ଜଣଙ୍କର ମୃତ୍ୟୁ ହୋଇଥିଲା।  ମୃତକଙ୍କ ସମ୍ପର୍କୀୟଙ୍କୁ ମୃତଦେହ ହସ୍ତାନ୍ତର କରାଯିବା ପରେ ଦୁର୍ଘଟଣାସ୍ଥଳରୁ ଉକ୍ତ ମୃତକଙ୍କ ଶରୀରର ଅଂଶ ଉଦ୍ଧାର କରାଯାଇଥିଲା।

ହସ୍ପିଟାଲ ମୃତକଙ୍କ ସମ୍ପର୍କୀୟଙ୍କୁ ମୃତଦେହ ହସ୍ତାନ୍ତର କରିବା ସମୟରେ ସୂଚିତ କରିଥିଲା କି ବିମାନ ଦୁର୍ଘଟଣାର ଭୟାବହତାକୁ ଦେଖି ଦୁର୍ଘଟଣାସ୍ଥଳରୁ ମୃତକଙ୍କ ଶରୀରର କିଛି ଅଂଶ ମିଳିବାର ସମ୍ଭାବନା ଅଛି। ତଦନ୍ତ ସମୟରେ ଦୁର୍ଘଟଣାର ଭଗ୍ନାବଶେଷ ତଳୁ ମୃତ ଲୋକଙ୍କ ଶରୀରର କିଛି ଅଂଶ ମିଳିଥିଲା, ଯାହାକୁ ଡିଏନଏ ବିଶ୍ଳେଷଣ ପାଇଁ ପଠାଯାଇଥିଲା।

ଡିଏନଏ ପରୀକ୍ଷାରୁ ନିଶ୍ଚିତ ହୋଇଥିଲା କି ଦୁର୍ଘଟଣାସ୍ଥଳରୁ ମିଳିଥିବା ମୃତକଙ୍କ ଶରୀରର ଅଂଶଗୁଡ଼ିକ ୨୬ ଜଣଙ୍କର ରହିଛି। ଯାହାଙ୍କ ଶରୀରକୁ ପୂର୍ବରୁ ସେମାନଙ୍କ ପରିବାରଲୋକଙ୍କୁ ହସ୍ତାନ୍ତର କରି ଦିଆଯାଇଛି।

ଗତ ସପ୍ତାହରେ ସାତଟି ପରିବାରକୁ ସେମାନଙ୍କ ପୀଡିତଙ୍କ ଶରୀରର ଅଂଶକୁ ହସ୍ତାନ୍ତର କରାଯାଇଥିବା ବେଳେ ବାକି ୧୯ଟି ପରିବାର ସେମାନଙ୍କ ସମ୍ପର୍କୀୟଙ୍କ ଉଦ୍ଧାର ହୋଇଥିବା ଶରୀରର ଅଂଶକୁ ନନେଇ ଅନ୍ତିମ ସଂସ୍କାର କରିବା ପାଇଁ ସିଭିଲ୍ ହସ୍ପିଟାଲକୁ ଅନୁମତି ଦେଇଥିଲେ। 

ଏଥିରେ ୧୮ ଜଣ ହିନ୍ଦୁ ମୃତକଙ୍କ ଉଦ୍ଧାର ହୋଇଥିବା ଶରୀରର ଅଂଶକୁ ଶ୍ମଶାନରେ ଦାହ କରାଯାଇଥିଲାବେଳେ ଜଣେ ମୁସଲିମ୍ ମୃତକଙ୍କ ଶରୀରର ଅଂଶକୁ କବରସ୍ଥାନରେ କବର ଦିଆଯାଇଥିଲା।

ଜୁନ୍ ୧୨ ତାରିଖରେ ଅହମଦାବାଦ ବିମାନବନ୍ଦରରୁ ଉଡ଼ିବାର କିଛି ମିନିଟ୍ ମଧ୍ୟରେ ଏୟାର ଇଣ୍ଡିଆ ବୋଇଂ ୭୮୭-୮ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଦୁର୍ଘଟଣାରେ ୨୪୧ଜଣ ବିମାନ ଯାତ୍ରୀଙ୍କ ସମେତ ୨୬୦ ଜଣ ଲୋକ ପ୍ରାଣ ହରାଇଥିଲେ। ତେବେ ବିମାନର ସିଟ ନମ୍ବର ୧୧ରେ ବସିଥିବା ଯାତ୍ରୀ ଜଣକ ଚମତ୍କାର ଭାବରେ ବଞ୍ଚି ଯାଇଥିଲେ।