ନୂଆଦିଲ୍ଲୀ: ଅହମଦାବାଦ ଏୟାର୍ ଇଣ୍ଡିଆ ବିମାନ ଦୁର୍ଘଟଣାର ତଦନ୍ତ ଶୁକ୍ରବାରଠାରୁ ଆରମ୍ଭ ହୋଇଥିବା ବେଳେ ବ୍ଲାକ୍‌ବକ୍ସ ମିଳିବା ପରେ ଏହା ତ୍ବରାନ୍ବିତ ହୋଇଛି। ଭାରତର ଏୟାର୍‌କ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ ବ୍ୟୁରୋର ଟିମ୍ ବିମାନର ଭଗ୍ନାବଶେଷ ଉପରେ ଅନୁଧ୍ୟାନ କରୁଥିବା ବେଳେ ବିମାନ ଚଳାଚଳ ନିୟାମକ ପୃଥକ୍ ଭାବେ ୬ଟି ଗୁରୁତ୍ୱପୂର୍ଣ୍ଣ ବିଷୟରେ ତଦନ୍ତ  ତ୍ବରାନ୍ବିତ କରିଛନ୍ତି। ଗୋଟିଏ ବ୍ଲାକ୍‌ବକ୍ସ ମିଳିଥିବାରୁ ତାହାର ତଥ୍ୟ  ଅନୁଧ୍ୟାନ କରାଯାଉଛି। ଉପକରଣ ସମସ୍ୟା, ପାଇଲଟ୍‌ଙ୍କ ସମ୍ଭାବ୍ୟ ତ୍ରୁଟି ଓ ପାଣିପାଗ ପରିସ୍ଥିତିର ବିଭିନ୍ନ ଦିଗ ଉପରେ ଧ୍ୟାନ କେନ୍ଦ୍ରିତ କରାଯାଉଛି। 

Advertisment

ଜଣେ ଅଧିକାରୀ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି ଯେ ବିମାନର ସଂକ୍ଷିପ୍ତ ଆରୋହଣ ସମୟରେ ଲ୍ୟାଣ୍ଡିଂ ଗିଅରକୁ ଖୋଲା ରଖାଯାଇଥିଲା ଏବଂ ଲିଫ୍ଟଜନିତ ସମସ୍ୟା ସମ୍ଭାବନା ଅଧିକ ଥିଲା। ଅଧିକାରୀମାନେ ଶୁକ୍ରବାର ହଷ୍ଟେଲ ବିଲ୍ଡିଂର ଛାତରୁ ଦୁଇଟି ବ୍ଲାକ୍ ବକ୍ସ ମଧ୍ୟରୁ ଗୋଟିଏ ପାଇଥିବା ବେଳେ ବୋଇଂର ଏକ ଟିମ୍ ଅହମଦାବାଦରେ ତଦନ୍ତରେ ସହଯୋଗ କରିବାକୁ ପହଞ୍ଚିଛି। ବିମାନର ଦୁଇଟି ଇଞ୍ଜିନର ଅଂଶଗୁଡ଼ିକୁ ବିଶ୍ଳେଷଣ ପାଇଁ ଆମେରିକା ପଠାଯାଉଛି। 
ଅଜ୍ଞାତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏୟାର୍‌ ଇଣ୍ଡିଆ ଓ ସରକାର ଦୁର୍ଘଟଣାର ଅନେକ ଦିଗ ଉପରେ ବିଚାର କରୁଛନ୍ତି, ଯେଉଁଥିରେ ଏହାର ଫ୍ଲାପ୍ ଓ ଲ୍ୟାଣ୍ଡିଂ ଗିଅର କାହିଁକି ଖୋଲା ରହିଥିଲା, ରକ୍ଷଣାବେକ୍ଷଣ ସମସ୍ୟା ସମେତ ଏୟାର୍‌ ଇଣ୍ଡିଆର ଦୋଷ ଥିଲା କି ନାହିଁ ତାହା ମଧ୍ୟ ଅନ୍ତର୍ଭୁକ୍ତ।। ସମ୍ଭାବ୍ୟ ପକ୍ଷୀ ମାଡ଼ ମୁଖ୍ୟ ପ୍ରସଙ୍ଗ ନୁହେଁ ବୋଲି କୁହାଯାଉଛି। ଅନ୍ତର୍ଜାତୀୟ ବିମାନ ଚଳାଚଳ ବିଶେଷଜ୍ଞମାନେ କହିଛନ୍ତି ଯେ ଉଦ୍ଧାର ହୋଇଥିବା ଫ୍ଲାଇଟ୍ ରେକର୍ଡରରୁ ଉଡ଼ାଣ ଭରିବାର ମାତ୍ର ୩୩ ସେକେଣ୍ଡ ପରେ ଡ୍ରିମ୍‌ଲାଇନର୍ କେଉଁ କାରଣରୁ ଉଚ୍ଚତା ହରାଇଲା ସେ ବିଷୟରେ ଜଣାପଡ଼ିବ। ବ୍ରିଟେନ୍ ସ୍ଥିତ ଇନଷ୍ଟିଚ୍ୟୁଟ୍ ଅଫ୍ ମେକାନିକାଲ ଇଞ୍ଜିନିୟର୍ସର ପଲ୍ ଫ୍ରୋମେ କହିଛନ୍ତି ଯେ ଫ୍ଲାଇଟ୍ ଡାଟା ରେକର୍ଡରରେ କକ୍‌ପିଟ୍ ବାର୍ତ୍ତାଳାପର ଭଏସ୍ ରେକର୍ଡ ବ୍ୟତୀତ ଇଞ୍ଜିନ୍ ଓ ନିୟନ୍ତ୍ରଣ ସେଟିଂସ୍ ବିଷୟରେ ସୂଚନା ରହିଛି। ପେସାଦାର ସଂଘର ଏରୋସ୍ପେସ୍ ଡିଭିଜନର ମୁଖ୍ୟ ଫ୍ରୋମେ କହିଛନ୍ତି, ଉଡ଼ାଣ ପରେ ଇଞ୍ଜିନ ଶକ୍ତି କିମ୍ବା ଲିଫ୍ଟ ହରାଇଥିଲା କି ନାହିଁ ତାହା ଶୀଘ୍ର ଏଥିରୁ ଜଣାପଡ଼ିବ। 

ପୂର୍ବତନ କ୍ରାସ୍ ଇନଭେଷ୍ଟିଗେଟର ତଥା ଆମେରିକାର ନ୍ୟାସନାଲ ଟ୍ରାନ୍ସପୋର୍ଟ ସେଫ୍ଟି ବୋର୍ଡ  ପରାମର୍ଶଦାତା ଜେଫ୍ ଗୁଜେଟି କହିଛନ୍ତି ଯେ ଯଦି ଫ୍ଲାଇଟ୍ ଡାଟା ରେକର୍ଡର ଭଲ ଅବସ୍ଥାରେ ଥାଏ, ତେବେ ଆସନ୍ତା ସପ୍ତାହ ସୁଦ୍ଧା ଗୁରୁତ୍ୱପୂର୍ଣ୍ଣ ପ୍ରଶ୍ନର ଉତ୍ତର ମିଳିଯିବ। ଗୁଜେଟି କହିଛନ୍ତି ଯେ ଫ୍ଲାପ୍ ଓ ଅନ୍ୟାନ୍ୟ ସେଟିଂସ୍ ଠିକ୍ ଅଛି କି ନାହିଁ, ଇଞ୍ଜିନ୍ ଶକ୍ତି ହରାଇଛି କି ନାହିଁ ଏବଂ କର୍ମଚାରୀମାନେ ବାହ୍ୟ ତାପମାତ୍ରା ଓ ବିମାନ ଓଜନ ବିଷୟରେ ସଠିକ୍ ସୂଚନା ପ୍ରଦାନ କରିଛନ୍ତି କି ନାହିଁ ସେ ବିଷୟରେ ସ୍ଥିତି ସ୍ପଷ୍ଟ ହେବ।  

ପାଇଲଟଙ୍କ ଶେଷ ବାର୍ତ୍ତା: ‘ମେଡେ... ମେଡେ... ନୋ ପାୱାର... ନୋ ଥ୍ରଷ୍ଟ... ଗୋଇଂ ଡାଉନ...’

ନୂଆଦିଲ୍ଲୀ: ଭାରତର ସବୁଠାରୁ ଭୟଙ୍କର ବିମାନ ଦୁର୍ଘଟଣା ପରେ ଏୟାର୍‌ ଇଣ୍ଡିଆ ବିମାନ ଏଆଇ-୧୭୧ର କକ୍‌ପିଟ୍‌ରୁ ଏକ ଛାତିଥରା ଅଡିଓ ବାର୍ତ୍ତା ସାମ୍ନାକୁ ଆସିଛି। ଅହମଦାବାଦ ବିମାନ ବନ୍ଦରରୁ ଉଡ଼ାଣ ଭରିବାର କିଛି ସେକେଣ୍ଡ ପରେ ଲଣ୍ଡନ ଅଭିମୁଖେ ଯାଉଥିବା ବୋଇଂ ୭୮୭ ଡ୍ରିମ୍‌ଲାଇନର୍‌ ଦୁର୍ଘଟଣାଗ୍ରସ୍ତ ହେବା ଫଳରେ ଯାତ୍ରୀ, କର୍ମଚାରୀ ଓ ସ୍ଥାନୀୟ ବାସିନ୍ଦାଙ୍କ ସମେତ ଅନ୍ୟୂନ ୨୭୪ ଜଣଙ୍କର ମୃତ୍ୟୁ ଘଟିଛି।

ବିମାନଟି ମେଘାନୀନଗରସ୍ଥିତ ଏକ ମେଡିକାଲ କଲେଜର ହଷ୍ଟେଲ ଉପରେ ଖସିଯିବାର କିଛି ସମୟ ପୂର୍ବରୁ ବରିଷ୍ଠ ପାଇଲଟ୍ କ୍ୟାପଟେନ୍ ସୁମିତ ସଭରୱାଲ ଅହମଦାବାଦ ଏୟାର୍‌ ଟ୍ରାଫିକ୍ କଣ୍ଟ୍ରୋଲ (ଏଟିସି)କୁ ଏକ ସଂକ୍ଷିପ୍ତ ବିପଦ ବାର୍ତ୍ତା ପଠାଇଥିଲେ। ମାତ୍ର ୫ ସେକେଣ୍ଡର ଏହି ମେସେଜରେ କକ୍‌ପିଟରେ ଦେଖାଦେଇଥିବା ଆତଙ୍କକୁ ରେକର୍ଡ କରାଯାଇଛି। ଅଡିଓରେ ପାଇଲଟ୍ କହୁଥିବା ଶୁଣିବାକୁ ମିଳୁଛି: ‘ମେଡେ... ମେଡେ... ମେଡେ... ନୋ ପାୱାର... ନୋ ଥ୍ରଷ୍ଟ... ଗୋଇଂ ଡାଉନ...’।