ଅହମଦାବାଦ: ଅହମଦାବାଦ  ବିମାନ ଦୁର୍ଘଟଣାରେ ପ୍ରାଣ ହରାଇଥିବା ୨୪୧ ଜଣଙ୍କୁ ଚିହ୍ନଟ କରିବା ପ୍ରକ୍ରିୟା ଜାରି ରହିଛି। କର୍ତ୍ତୃପକ୍ଷ ବର୍ତ୍ତମାନ ସୁଦ୍ଧା ଡିଏନ୍‌ଏ ପରୀକ୍ଷା ମାଧ୍ୟମରେ ୪୭ ଜଣଙ୍କୁ ଚିହ୍ନଟ କରିଛନ୍ତି ଏବଂ ୨୪ଟି ମୃତଦେହ ହସ୍ତାନ୍ତର କରିଛନ୍ତି। ବର୍ତ୍ତମାନ ସୁଦ୍ଧା ଚିହ୍ନଟ ହୋଇଥିବା ମୃତକମାନେ ଗୁଜୁରାଟ ଓ ରାଜସ୍ଥାନର ବୋଲି ଜଣାପଡ଼ିଛି।  ଗୁରୁବାର ଅପରାହ୍ନ ୧ଟା ୩୮ମିନିଟ୍‌ରେ ଏୟାର ଇଣ୍ଡିଆ ବିମାନ ଏଆଇ-୧୭୧ରୁ ଉଡ଼ାଣ ଭରିବାର କିଛି ସେକେଣ୍ଡ ପରେ ଦୁର୍ଘଟଣାଗ୍ରସ୍ତ ହୋଇ ଅହମଦାବାଦର ମେଘାନୀନଗରସ୍ଥିତ ଏକ ହଷ୍ଟେଲର ୫ ମହଲା କୋଠା ଉପରେ ପଡ଼ିଥିଲା। ବିମାନ ଦୁର୍ଘଟଣାରେ ପ୍ରାଣ ହରାଇଥିବା ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀଙ୍କ ମୃତଦେହକୁ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯିବ ଏବଂ ରାଜକୋଟରେ ତାଙ୍କର ଅନ୍ତିମ ସଂସ୍କାର ହେବ ବୋଲି ଜଣାପଡ଼ିଛି। ପୂର୍ବତନ ମୁଖ୍ୟମନ୍ତ୍ରୀଙ୍କ ଡିଏନ୍‌ଏ ରିପୋର୍ଟ ମ୍ୟାଚ୍‌ ହେବା ପରେ ଆଜି ଏ ସଂକ୍ରାନ୍ତ ସୂଚନା ଦିଆଯାଇଛି।  ଗୁଜୁରାଟର ସ୍ୱାସ୍ଥ୍ୟମନ୍ତ୍ରୀ ହୃଷିକେଶ ପଟେଲ କହିଛନ୍ତି, ମୁଖ୍ୟମନ୍ତ୍ରୀ ଭୁପେନ୍ଦ୍ର ପଟେଲ ପୂର୍ବତନ ମୁଖ୍ୟମନ୍ତ୍ରୀ ରୂପାନୀଙ୍କ ବାସଭବନକୁ ଯାଇ ତାଙ୍କ ପରିବାରକୁ ଜଣାଇଥିଲେ ଯେ ତାଙ୍କ ଡିଏନ୍‌ଏ ରିପୋର୍ଟ ମେଳ ଖାଇଛି ଏବଂ ରାଜକୋଟରେ ଅନ୍ତିମ ସଂସ୍କାର ପାଇଁ ରାଜ୍ୟ ସରକାର  ପରିବାରକୁ ସମସ୍ତ ସହଯୋଗ କରିବେ ।  

Advertisment

ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀଙ୍କ ଅନ୍ତିମ ସଂସ୍କାର ରାଜକୋଟରେ ହେବ

ଗୁରୁବାର ଅହମଦାବାଦରୁ ଲଣ୍ଡନ ଯାଉଥିବା ଏୟାର ଇଣ୍ଡିଆର ଏକ ବିମାନ ମେଘାନୀନଗରରେ ଦୁର୍ଘଟଣାଗ୍ରସ୍ତ ହୋଇଥିଲା। ସେହି ସମୟରେ ବିମାନରେ ପାଇଲଟ ଓ କ୍ରୁ ମେମ୍ବରଙ୍କ ସହ ମୋଟ ୨୪୨ ଜଣ ଥିଲେ । ଝିଅକୁ ଭେଟିବା ପାଇଁ ରୂପାନୀ ଲଣ୍ଡନ ଯାଉଥିଲେ।  ଦୁର୍ଘଟଣାରେ ୨୪୧ ଯାତ୍ରୀଙ୍କ ମୃତ୍ୟୁ ହୋଇଥିଲା  ଏବଂ ଏହା ଏତେ ଭୟଙ୍କର ଥିଲା ଯେ ଯାତ୍ରୀଙ୍କ ଡିଏନ୍‌ ଟେଷ୍ଟ ପରେ ହିଁ ସେମାନଙ୍କ ପରିବାର ଲୋକଙ୍କୁ ଶବ ହସ୍ତାନ୍ତର କରାଯାଉଛି।  

ଦୁର୍ଘଟଣାଗ୍ରସ୍ତ ଏୟାର ଇଣ୍ଡିଆ ବିମାନ ନେଇ ତୁର୍କୀର ସଫେଇ ‘ରକ୍ଷଣାବେକ୍ଷଣରେ ତୁର୍କୀ କମ୍ପାନିର ସଂପୃକ୍ତି ନାହିଁ’

ଆଙ୍କାରା: ଚଳିତ ସପ୍ତାହରେ ଅହମଦାବାଦରେ ଦୁର୍ଘଟଣାଗ୍ରସ୍ତ ହୋଇଥିବା ଏୟାର ଇଣ୍ଡିଆର ବୋଇଂ ୭୮୭-୮ ଡ୍ରିମ୍‌ଲାଇନର ରକ୍ଷଣାବେକ୍ଷଣରେ ତୁର୍କୀର କମ୍ପାନି ସମ୍ପୃକ୍ତ ଥିବା କଥାକୁ ଆଜି ତୁର୍କୀ ଅସ୍ୱୀକାର କରିଛି। ତୁର୍କୀର ଯୋଗାଯୋଗ ବିଭାଗ କର୍ତ୍ତୃପକ୍ଷ କହିଛନ୍ତି ଯେ ତୁର୍କୀ   ବୋଇଂ ୭୮୭-୮ ଯାତ୍ରୀବାହୀ ବିମାନର ରକ୍ଷଣାବେକ୍ଷଣ କରୁଥିଲା ବୋଲି ଯାହା ପ୍ରଚାର ହେଉଛି ତାହା ମିଥ୍ୟା। ତୁର୍କୀ-ଭାରତ ସମ୍ପର୍କ ନେଇ ଜନମତକୁ ଅଧିକ ତିକ୍ତ କରିବା ଉଦ୍ଦେଶ୍ୟରେ ମିଥ୍ୟା ସୂଚନା ପ୍ରଦାନ କରାଯାଉଛି ବୋଲି ତୁର୍କୀ କର୍ତ୍ତୃପକ୍ଷ କହିଛନ୍ତି।  ଗୁରୁବାର ଅପରାହ୍ନରେ ଅହମଦାବାଦର ସର୍ଦ୍ଦାର ବଲ୍ଲଭଭାଇ ପଟେଲ ଅନ୍ତର୍ଜାତୀୟ ବିମାନବନ୍ଦରରୁ ଉଡ଼ାଣ ଭରିବାର କିଛି ସେକେଣ୍ଡ ପରେ ବିମାନଟି  ଦୁର୍ଘଟଣାଗ୍ରସ୍ତ ହୋଇଥିଲା। ଏଥିରୁ କେବଳ ଜଣେ ଯାତ୍ରୀ ହିଁ ଚମତ୍କାର ଭାବେ ବର୍ତ୍ତି ଯାଇଥିଲେ। ତୁର୍କୀ କହିଛି, ୨୦୨୪ ଏବଂ ୨୦୨୫ରେ ଏୟାର ଇଣ୍ଡିଆ ଏବଂ ତୁର୍କୀର ବିମାନ ରକ୍ଷଣାବେକ୍ଷଣ ସଂସ୍ଥା ‘ତୁର୍କୀ ଟେକ୍‌ନିକ୍’ ମଧ୍ୟରେ ହୋଇଥିବା ଚୁକ୍ତି ଅନୁଯାୟୀ, କେବଳ ବି-୭  ଵାଇଡ୍ ବଡି ବିମାନ ପାଇଁ ରକ୍ଷଣାବେକ୍ଷଣ ସେବା ଯୋଗାଇ ଦିଆଯାଉଛି। ଦୁର୍ଘଟଣା ଘଟାଇଥିବା ବୋଇଂ ୭୮୭-୮ ଡ୍ରିମ୍‌ଲାଇନର ଏହି ଚୁକ୍ତି ପରିସରଭୁକ୍ତ ନୁହେଁ। ଆଜି ପର୍ଯ୍ୟନ୍ତ ‘ତୁର୍କୀ ଟେକ୍‌ନିକ୍‌’ଏୟାର ଇଣ୍ଡିଆର କୌଣସି ବିମାନ  ରକ୍ଷଣାବେକ୍ଷଣ କରିନାହିଁ ବୋଲି କୁହାଯାଇଛି। ଆତଙ୍କବାଦ ବିରୋଧରେ ଭାରତର ସାମରିକ କାର୍ଯ୍ୟାନୁଷ୍ଠାନ ‘ଅପରେସନ ସିନ୍ଦୂର’ ସମୟରେ ତୁର୍କୀ ପାକିସ୍ତାନକୁ ଦୃଢ଼ ସମର୍ଥନ କରିବା ସହ ଡ୍ରୋନ୍‌ ଓ ଅନ୍ୟ ବୈଷିୟକ ସହାୟତା ଯୋଗାଇଥିଲା। ଏହାପରେ ଭାରତର ୯ଟି ପ୍ରମୁଖ ବିମାନବନ୍ଦରରେ ସେବା ପରିଚାଳନା କରୁଥିବା ତୁର୍କୀର ଏକ କମ୍ପାନିର   ସୁରକ୍ଷା ମଞ୍ଜୁରିକୁ ସରକାର ପ୍ରତ୍ୟାହାର କରିଥିଲେ।  ଜାତୀୟ ନିରାପତ୍ତା ସ୍ୱାର୍ଥ ଦୃଷ୍ଟିରୁ ସେଲେବି ଗ୍ରାଉଣ୍ଡ ହ୍ୟାଣ୍ଡଲିଂ ଇଣ୍ଡିଆ ପ୍ରାଇଭେଟ୍ ଲିମିଟେଡ୍‌ର ସୁରକ୍ଷା ମଞ୍ଜୁରିକୁ ତୁରନ୍ତ ପ୍ରତ୍ୟାହାର କରାଯାଇଥିଲା।