ଏୟାର୍ ଇଣ୍ଡିଆ ଦୁର୍ଘଟଣା: ଉଡ଼ାଣ ଆରମ୍ଭ ମାତ୍ରେ ଉଭୟ ଇଂଜିନ ଫେଲ୍‌ ହୋଇଥିଲା!

ନୂଆଦିଲ୍ଲୀ: ଏଆଇ ୧୭୧ ବିମାନ ଦୁର୍ଘଟଣାର କାରଣ ଏପର୍ଯ୍ୟନ୍ତ ଜଣାପଡ଼ି ନ ଥିବା ବେଳେ ଏୟାର୍ ଇଣ୍ଡିଆର ପାଇଲଟମାନେ ଦୁର୍ଘଟଣା ପରିସ୍ଥିତିର ପୁନଃନିର୍ମାଣ (ସିମୁଲେସନ) କରିବା ସହ ବୈଷୟିକ ତ୍ରୁଟିକୁ ସମ୍ଭାବ୍ୟ କାରଣ ବୋଲି ଚିହ୍ନଟ କରିଛନ୍ତି। ସିମୁଲେସନର ଏକ ଅଂଶ ଭାବରେ, ପାଇଲଟ ଲ୍ୟାଣ୍ଡିଂ ଗିଅରକୁ ନିୟୋଜିତ ରଖିଥିଲେ ଏବଂ ୱିଙ୍ଗ ଫ୍ଲାପ୍‌କୁ ପ୍ରତ୍ୟାହାର କରିଥିଲେ। ତେବେ କେବଳ ଏହି କନ୍‌ଫିଗୁରେସନ୍‌  ଦ୍ୱାରା ଦୁର୍ଘଟଣା ଘଟି ନ ଥାନ୍ତା ବୋଲି ଜଣାପଡ଼ିଥିଲା। ଏୟାର୍ ଇଣ୍ଡିଆର ଜଣେ ମୁଖପାତ୍ର କହିଛନ୍ତି ଯେ, ଏହା କେବଳ ଏକ କଳ୍ପନାଜଳ୍ପନା ଏବଂ ଆମେ ବର୍ତ୍ତମାନ କୌଣସି ମନ୍ତବ୍ୟ ଦେଇପାରିବୁ ନାହିଁ।  ତେବେ ଉଡ଼ାଣ ଆରମ୍ଭ ହେବାମାତ୍ରେ ବିମାନର ଉଭୟ ଇଂଜିନ ଫେଲ୍‌ ହୋଇଯାଇଥିବା ସମ୍ଭାବନା ଅଧିକ ବୋଲି କୁହାଯାଇଛି।

ବିପର୍ଯ୍ୟସ୍ତ ବୋଇଂ ୭୮୭ ଡ୍ରିମ୍‌ଲାଇନର ଭଗ୍ନାବଶେଷର ଚିତ୍ରରୁ ଜଣାପଡିଛି ଯେ ଫ୍ଲାପ୍‌ଗୁଡ଼ିକ ସମ୍ପ୍ରସାରିତ ଅବସ୍ଥାରେ ଥିଲା ଏବଂ ଅନୁମାନ ଅନୁଯାୟୀ ଏହାକୁ ପ୍ରତ୍ୟାହାର କରାଯାଇ ନାହିଁ। ଫ୍ଲାପ୍ ବିମାନ ଉଡ଼ାଣ ଓ ଅବତରଣ ପର୍ଯ୍ୟାୟରେ ବିମାନର ଗତି ମନ୍ଥର ଥିବା ସମୟରେ ଆବଶ୍ୟକ ଅତିରିକ୍ତ ଲିଫ୍ଟ ପ୍ରଦାନ କରିଥାଏ। ଅହମଦାବାଦରେ ଉଡ଼ାଣ ଭରିବାର କିଛି ସେକେଣ୍ଡ ମଧ୍ୟରେ ଲଣ୍ଡନ ଅଭିମୁଖେ ଯାଉଥିବା ବିମାନଟି ଏକ ମେଡିକାଲ କଲେଜ କ୍ୟାମ୍ପସରେ ଦୁର୍ଘଟଣାଗ୍ରସ୍ତ ହୋଇଥିଲା, ଯେଉଁଥିରେ କେବଳ ଜଣେ ଯାତ୍ରୀଙ୍କୁ ଛାଡ଼ି ଅନ୍ୟ ସମସ୍ତ ଯାତ୍ରୀ ଓ କର୍ମଚାରୀଙ୍କର ମୃତ୍ୟୁ ଘଟିଥିଲା। ଅନେକ ବିଶେଷଜ୍ଞଙ୍କ ବିଶ୍ଳେଷଣ ସହିତ ଫଳାଫଳ ଦୁର୍ଘଟଣାର ଏକ ସମ୍ଭାବ୍ୟ କାରଣ ଭାବରେ ବୈଷୟିକ ବିଫଳତା ଦୃଷ୍ଟିକୋଣକୁ ସୁଦୃଢ଼ କରିଛି।

ଜଣେ ବିମାନ ଚଳାଚଳ ବିଶେଷଜ୍ଞ ତଥା ଆମେରିକା ନୌସେନାର ପୂର୍ବତନ ପାଇଲଟ୍ କ୍ୟାପଟେନ୍ ଷ୍ଟିଭ୍ ସ୍କିବ୍‌ନର କହିଛନ୍ତି ଯେ, ଭାରତରେ ଗତ କିଛି ଦଶନ୍ଧି ମଧ୍ୟରେ ସବୁଠାରୁ ଭୟଙ୍କର ବିମାନ ଦୁର୍ଘଟଣା ପଛରେ ଉଭୟ ଇଞ୍ଜିନର ବିଫଳତା ଥାଇପାରେ। ସେ କହିଛନ୍ତି, ଉଡ଼ାଣ ଭରିବାର କିଛି ସମୟ ପରେ ରାମ୍ ଏୟାର୍ ଟର୍ବାଇନ୍ (ଆର୍‌ଏଟି) ମୁତୟନ ହେବା ଦ୍ବୈତ ଇଞ୍ଜିନ ବିଫଳତାକୁ ସୂଚାଉଛି। ଏୟାର୍‌କ୍ରାଫ୍ଟ ଆକ୍ସିଡେଣ୍ଟ ଇନ୍‌ଭେଷ୍ଟିଗେସନ୍‌ ବ୍ୟୁରୋ (ଏଏଆଇବି) ଦ୍ୱାରା କରାଯାଉଥିବା ସରକାରୀ ତଦନ୍ତଠାରୁ ଅଲଗା ଭାବେ ଏହି ସିମୁଲେସନ୍ କରାଯାଇଥିଲା। ସମ୍ଭାବ୍ୟ ପରିସ୍ଥିତିର ଅନୁସନ୍ଧାନ କରିବା ପାଇଁ ଏହା କରାଯାଇଛି ବୋଲି କୁହାଯାଇଛି। ତେଣେ ଏୟାର୍ ଇଣ୍ଡିଆ ବିମାନର ବ୍ଲାକ୍ ବକ୍ସରୁ ମିଳିଥିବା ତଥ୍ୟର ବିଶ୍ଳେଷଣ ଏବେ ଦିଲ୍ଲୀସ୍ଥିତ ଏଏଆଇବିର ପରୀକ୍ଷାଗାରରେ ଚାଲିଛି।