ବ୍ଲାକ୍ ବକ୍ସରୁ ସଂଗ୍ରହ କରାଗଲା ଗୁରୁତ୍ବପୂର୍ଣ୍ଣ ଡାଟା

ନୂଆଦିଲ୍ଲୀ: ଅହମଦାବାଦରେ ଏୟାର ଇଣ୍ଡିଆ ବିମାନ ଏଆଇ-୧୭୧ର ଦୁର୍ଘଟଣା ସମ୍ପର୍କରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏକ ବଡ଼ ଅପଡେଟ୍ ଜାରି କରିଛି। 

ମନ୍ତ୍ରଣାଳୟ ଅନୁଯାୟୀ, ଦୁର୍ଘଟଣା ପରେ ତଦନ୍ତ ଦ୍ରୁତ ଗତିରେ କରାଯାଉଛି ଏବଂ ଦୁଇଟି ବ୍ଲାକ୍ ବକ୍ସରୁ ଗୁରୁତ୍ୱପୂର୍ଣ୍ଣ ତଥ୍ୟ ସଫଳତାର ସହିତ ବାହାର କରାଯାଇଛି। ବର୍ତ୍ତମାନ ବୈଷୟିକ ବିଶେଷଜ୍ଞଙ୍କ ତତ୍ତ୍ୱାବଧାନରେ ସେଗୁଡ଼ିକର ତଦନ୍ତ କରାଯାଉଛି, ଯାହା ଦ୍ୱାରା ଦୁର୍ଘଟଣାର କାରଣ ସ୍ପଷ୍ଟ ଭାବରେ ନିର୍ଣ୍ଣୟ କରାଯାଇପାରିବ।

ବିମାନ ଦୁର୍ଘଟଣା ପରେ ତୁରନ୍ତ ବିମାନ ଦୁର୍ଘଟଣା ତଦନ୍ତ ବ୍ୟୁରୋ ଆନ୍ତର୍ଜାତୀୟ ମାନଦଣ୍ଡ ଅନୁଯାୟୀ ଏକ ବିଶେଷଜ୍ଞ ଦଳ ଗଠନ କରିଥିଲା। ଏହି ଦଳରେ ବିମାନ ଚିକିତ୍ସା ବିଶେଷଜ୍ଞ, ବିମାନ ଟ୍ରାଫିକ୍ ନିୟନ୍ତ୍ରଣ ଅଧିକାରୀ ଏବଂ ଆମେରିକାର ଜାତୀୟ ପରିବହନ ସୁରକ୍ଷା ବୋର୍ଡର ପ୍ରତିନିଧି ମଧ୍ୟ ଅନ୍ତର୍ଭୁକ୍ତ ରହିଛନ୍ତି। କାରଣ ବିମାନଟି ଆମେରିକାରେ ତିଆରି ହୋଇଥିଲା। ତଦନ୍ତର ପ୍ରତ୍ୟେକ ପଦକ୍ଷେପ ଭାରତର ଆଇନ ଏବଂ ଆନ୍ତର୍ଜାତୀୟ ନିୟମ ଅନୁଯାୟୀ ସ୍ୱଚ୍ଛତା ସହିତ ନିଆଯାଉଛି।

ପ୍ରଥମ ବ୍ଲାକ୍ ବକ୍ସ, ଅର୍ଥାତ୍ କକପିଟ୍ ଭଏସ୍ ରେକର୍ଡର୍ (ସିଭିଆର), ଜୁନ୍ ୧୩ ତାରିଖରେ ଦୁର୍ଘଟଣାସ୍ଥଳର ଏକ କୋଠାର ଛାତରୁ ଉଦ୍ଧାର କରାଯାଇଥିଲା। ଦ୍ୱିତୀୟ ବ୍ଲାକ୍ ବକ୍ସ, ଅର୍ଥାତ୍ ଫ୍ଲାଇଟ୍ ଡାଟା ରେକର୍ଡର୍ (ଏଫଡିଆର) ଜୁନ୍ ୧୬ ତାରିଖରେ ବିମାନର ଭଗ୍ନାବଶେଷରୁ ବାହାର କରାଯାଇଥିଲା। ଉଭୟ ବ୍ଲାକ୍ ବକ୍ସକୁ କଡ଼ା ପୁଲିସ ସୁରକ୍ଷା ଏବଂ ସିସିଟିଭି ନଜରରେ ଅହମ୍ମଦାବାଦରେ ସୁରକ୍ଷିତ ଭାବେ ରଖାଯାଇଥିଲା।

ଜୁନ୍ ୨୪, ୨୦୨୫ରେ, ଭାରତୀୟ ବାୟୁସେନାର ଏକ ସ୍ୱତନ୍ତ୍ର ବିମାନ ମାଧ୍ୟମରେ ଉଭୟ ବ୍ଲାକ୍ ବକ୍ସକୁ ଅହମଦାବାଦରୁ ଦିଲ୍ଲୀ ଅଣାଯାଇଥିଲା। ପ୍ରଥମ ବ୍ଲାକ୍ ବକ୍ସ ଅପରାହ୍ନ ୨ଟାରେ ଏଏଆଇବି ଲ୍ୟାବରେ ପହଞ୍ଚିଥିବା ବେଳେ ଦ୍ୱିତୀୟ ବକ୍ସ ସନ୍ଧ୍ୟା ୫:୧୫ ରେ ଏଏଆଇବି ଦଳ ଦ୍ୱାରା ପ୍ରଦାନ କରାଯାଇଥିଲା।

ଜୁନ୍ ୨୪ ସନ୍ଧ୍ୟାରୁ, ଏଏଆଇବି ଏବଂ ଏନଟିଏସବିର ବୈଷୟିକ ବିଶେଷଜ୍ଞମାନେ ବ୍ଲାକ୍ ବକ୍ସରୁ ତଥ୍ୟ ବାହାର କରିବାର ପ୍ରକ୍ରିୟା ଆରମ୍ଭ କରି ଥିଲେ। ଏହାପରେ, ଜୁନ୍ ୨୫ ତାରିଖରେ ମେମୋରୀ ମଡ୍ୟୁଲରୁ ତଥ୍ୟକୁ ସଫଳତାର ସହ ଡାଉନଲୋଡ୍ କରାଯାଇଥିଲା। ବର୍ତ୍ତମାନ ସିଭିଆର ଏବଂ ଏଫଡିଆର ଉଭୟ ରେକର୍ଡର ତଥ୍ୟକୁ ଭଲ ଭାବରେ ବିଶ୍ଳେଷଣ କରୁଛି। ତଦନ୍ତର ଲକ୍ଷ୍ୟ ହେଉଛି ଦୁର୍ଘଟଣା ପୂର୍ବରୁ ବିମାନରେ କ’ଣ କାର୍ଯ୍ୟକଳାପ ଘଟିଥିଲା ଏବଂ ଯାନ୍ତ୍ରିକ କିମ୍ବା ମାନବ ତ୍ରୁଟି ଏହାର କାରଣ ଥିଲା କି ନାହିଁ ?

ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ୍ ବ୍ୟୁରୋ ଭଗ୍ନାବଶେଷ ଭିତରୁ ‘ବ୍ଲାକ୍ ବକ୍ସ’କୁ ଉଦ୍ଧାର କରିଛି।। ବିମାନ କ୍ରାସ୍ ହୋଇଥିବା କୋଠାର ଛାତ ଉପରୁ ଏହି ବ୍ଲାକ ବକ୍ସ ମିଳିଛି। ଏହି ବିମାନରେ ଦୁଇଟି ‘ବ୍ଲାକବକ୍ସ’ ଥିଲା।