ନିର୍ଦ୍ଧାରିତ ସମୟର ୪ଘଣ୍ଟା ପୂର୍ବରୁ ୨୦ ଜଣ ଯାତ୍ରୀଙ୍କୁ ନ ନେଇ କୁଏତ ପଳାଇଲା ଏୟାର ଇଣ୍ଡିଆ ବିମାନ
ବିଜୟୱାଡା: ନିର୍ଦ୍ଧାରିତ ସମୟର ୪ଘଣ୍ଟା ପୂର୍ବରୁ ଗନ୍ତବ୍ୟସ୍ଥଳକୁ ଚାଲିଗଲା ବିମାନ | ଆଉ ବିମାନବନ୍ଦରରେ ହିଁ ରହିଗଲେ ଯାତ୍ରୀ | ଆନ୍ଧ୍ରପ୍ରଦେଶର ବିଜୟୱାଡା ବିମାନବନ୍ଦରରେ ଏଭଳି ଏକ ଘଟଣା ଘଟିଛି | ମିଳିଥିବା ସୂଚନା ମୁତାବକ କୁଏତ ଅଭିମୁଖେ ଯିବାକୁ ଥିବା ଏହି ବିମାନ ନିର୍ଦ୍ଧାରିତ ସମୟର ଚାରି ଘଣ୍ଟା ପୂର୍ବରୁ ପଳାଇଯାଇଥିଲା | ଏହି କାରଣରୁ ବିମାନବନ୍ଦରରେ ୨୦ ଜଣ ଯାତ୍ରୀ ରହିଯାଇଥିଲେ। ଏୟାର ଇଣ୍ଡିଆ ଏକ୍ସପ୍ରେସ ବିମାନ ଆଇଏକ୍ସ-୬୯୫ ବିଜୟୱାଡା ବିମାନ ବନ୍ଦରରୁ ଦିନ ୧ଟା ୧୦ ମିନିଟରେ କୁଏତ ଅଭିମୁଖେ ଯାତ୍ରା କରିବାର ଥିଲା | କିନ୍ତୁ ସକାଳ ୯ ଟା ୫୫ରେ ବିମାନ କୁଏତ ଅଭିମୁଖେ ଚାଲିଯାଇଥିଲା | ଏହି ଘଟଣାକୁ ନେଇ ଯାତ୍ରୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି | ଏୟାର ଇଣ୍ଡିଆର ଜଣେ ଅଧିକାରୀଙ୍କ କହିବାନୁସାରେ, ବିମାନଟିର ନିର୍ଦ୍ଧାରିତ ସମୟ ପରିବର୍ତ୍ତନ କରାଯାଇଥିଲା |
Sambad is now on WhatsApp
Join and get latest news updates delivered to you via WhatsApp
ଯାତ୍ରୀମାନଙ୍କୁ ଏହି ବିଷୟରେ ପୂର୍ବରୁ ସୂଚନା ଦିଆଯାଇଥିଲା। ତେବେ ବିଜୟୱାଡା ବିମାନବନ୍ଦର ନିର୍ଦ୍ଦେଶକ ଲକ୍ଷ୍ମୀକାନ୍ତ ରେଡ୍ଡୀ କହିଛନ୍ତି ଯେ ବିମାନ ଶୀଘ୍ର ପଳାଇଥିବାରୁ ୧୫ରୁ ଅଧିକ ଯାତ୍ରୀ ଯାଇପାରିନାହାନ୍ତି | ତେବେ ଉଡ଼ାଣ ସମୟର ପରିବର୍ତ୍ତନ ବିଷୟରେ ତାଙ୍କୁ ପୂର୍ବରୁ ସୂଚନା ଦିଆଯାଇ ନ ଥିବା ସେ ଅଭିଯୋଗ କରିଛନ୍ତି। ଯାତ୍ରୀମାନେ ଅଭିଯୋଗ କରିଛନ୍ତି ଯେ ସେମାନେ ଏଜେଣ୍ଟଙ୍କ ମାଧ୍ୟମରେ ଟିକେଟ୍ ବୁକ୍ କରିଥିଲେ ଏବଂ ଟିକେଟ୍ ଏଜେଣ୍ଟ ବିମାନ ସମୟର ପରିବର୍ତ୍ତନ ବିଷୟରେ ସେମାନଙ୍କୁ ଜଣାଇ ନଥିଲେ।