ଅହମଦାବାଦ: ଗତଗୁରୁବାର ଜୁନ ୧୨ ତାରିଖ ଅପରାହ୍ନରେ ଏୟାର ଇଣ୍ଡିଆ ବିମାନ ଏଆଇ ୧୭୧ ଅହମଦାବାଦର ସର୍ଦ୍ଦାର ବଲ୍ଲଭଭାଇ ପଟେଲ ଅନ୍ତର୍ଜାତୀୟ ବିମାନବନ୍ଦରରୁ ଉଡ଼ାଣ ଆରମ୍ଭ କରିବାର କିଛି ମିନିଟ୍ ପରେ ଦୁର୍ଘଟଣାଗ୍ରସ୍ତ ହୋଇଥିଲା। 

Advertisment

ଗୁରୁବାର ସକାଳ ପ୍ରାୟ ୧୧:୩୦ ସମୟରେ ଏୟାର ଇଣ୍ଡିଆ ବିମାନର ଏୟାରହଷ୍ଟେସ ଥିବା ନଗାନ୍ଥୋଇ ଶର୍ମା ତାଙ୍କ ବଡ଼ ଭଉଣୀଙ୍କୁ ଫୋନ୍ କରି ଜଣାଇଥିଲେ ଯେ, ‘ଦିଦି ଆଜି ମୁଁ ଲଣ୍ଡନ ଯାଉଛି। ତେଣୁ କିଛିଦିନ ପାଇଁ ଯୋଗାଯୋଗ କରିପାରିବି ନାହିଁ। ଜୁନ୍ ୧୫ ତାରିଖରେ ଫେରିବି ବ୍ୟସ୍ତ ହେବ ନାହିଁ। ଫେରି‌ଲେ କଥା ହେବା।’ 

ନଗାନ୍ଥୋଇଙ୍କ ବାପା ନନ୍ଦେଶ କୁମାର ଶର୍ମା କହିଛନ୍ତି, ଯେତେବେଳେ ଏୟାର ଇଣ୍ଡିଆ ବିମାନ ଦୁର୍ଘଟଣାର ଖବର ଆସିଲା, ଆମେ ସ୍ପଷ୍ଟ ହୋଇଯାଇଥିଲୁ କି ଝିଅ ସେହି ବିମାନରେ ଯାତ୍ରା କରିଥିବ । କାରଣ କିଛି ସମୟ ପୂର୍ବରୁ ସେ ଲଣ୍ଡନ ଯାଉଥିବା କଥା ମୋ ବଡ଼ ଝିଅକୁ ଫୋନ କରି ଜଣାଇଥିଲା।  କିନ୍ତୁ ଏଯାବତ ଆମେ ଏୟାର ଇଣ୍ଡିଆରୁ କୌଣସି ସରକାରୀ ସୂଚନା ପାଇନାହୁଁ। ଆମେ କେବଳ ଗଣମାଧ୍ୟମ ଓ ସୋସିଆଲ ମିଡିଆରୁ ଏୟାରଇଣ୍ଡିଆ ବିମାନ ଦୁର୍ଘଟଣାଗ୍ରସ୍ତ ହେବାର ଖବର ଜାଣିବାକୁ ପାଇଛୁ।

ଏବେ ବି ମୋ ଝିଅର ଫୋନ ରିଙ୍ଗ ହେଉଛି... ନଗାନ୍ଥୋଇଙ୍କ ମା’ ସମ୍ପୂର୍ଣ୍ଣ ଭାବେ ଧୌର୍ଯ୍ୟ ହରା ହୋଇପଡ଼ିଛନ୍ତି। କାନ୍ଦିକାନ୍ଦି କହୁଛନ୍ତି, ‘ମୋ ଝିଅର ଫୋନ ରିଙ୍ଗ ହେଉଛି। ତାର କିଛି ହୋଇନି ... ମୋ ଝିଅ ବଞ୍ଚିଛି...।ତାକୁ ବାରମ୍ବାର କଲ କର ନାହିଁ ତାର ଫୋନ ସୁଇଜଅଫ ହୋଇଯିବ। ସେ ଆମକୁ ଆଉ ଯୋଗା‌ଯୋଗ କରି ପାରିବନାହିଁ।’

ଏହି ଦୁର୍ଘଟଣା ପରେ ଘର ଭିତରେ ଯେତେବେଳେ ବି କାହାରି ଫୋନ ରିଙ୍ଗ ହେଉଛି ମନରେ ଏକ ଆଶା ଓ ଭୟ ଖେଳି ଯାଉଛି। ଆଶା ଏହା କି କାଳେ ଝିଅ ବଞ୍ଚିଥିବାର କେହି ଖବର ଦେଇ ଦେବେ କି? ଭୟ ଏହା କି ଝିଅ ଆଉ ଏ ଦୁନିଆରେ ନାହିଁ ବୋଲି ଏୟାର ଇଣ୍ଡିଆର ପକ୍ଷରୁ ଅଧିକାରିକ ସୂଚନା ମିଳିବା।’