ନୂଆଦିଲ୍ଲୀ: ରବିବାର ଦିଲ୍ଲୀ ବାୟୁମାନ ପୁଣି ସାଂଘାତିକ ସ୍ତରକୁ ଆସିଯାଇଛି । ପ୍ରାୟ ୧ ମାସ ଧରି ଏହା ‘ଅତି ଖରାପ’ ବର୍ଗରେ ରହିଥିବା ବେଳେ ଦୁଇ ସପ୍ତାହ ହେଲା ‘ଖରାପ’ ଶ୍ରେଣୀକୁ ଆସିଥିଲା। ତେବେ ଆଜି ଏହା ପୁଣି ସାଂଘାତିକ ସ୍ତରକୁ ଆସିବା ପରେ ପ୍ରଶାସନ ପକ୍ଷରୁ ବିଭିନ୍ନ କଟକଣା ଜାରି କରାଯାଇଛି। ଦିଲ୍ଲୀରେ ନିର୍ମାଣ ଓ ଉଚ୍ଛେଦ କାର୍ଯ୍ୟ ଉପରେ ପ୍ରତିବନ୍ଧକ ଲଗାଯିବା ସହ ପ୍ରଦୂଷଣ ସୃଷ୍ଟିକାରୀ କାରଖାନାଗୁଡ଼ିକୁ ମଧ୍ୟ ବନ୍ଦ ରଖାଯାଇଛି । ଧୂଆଁର ଘନ ବାଦଲ ଜାତୀୟ ରାଜଧାନୀ ଅଞ୍ଚଳକୁ ଆଚ୍ଛାଦିତ କରି ରଖିଛି। ଦିଲ୍ଲୀର ବାୟୁ ଗୁଣବତ୍ତା (ଏକ୍ୟୁଆଇ) ଆଜି ‘ସାଂଘାତିକ’ ବର୍ଗକୁ ଆସିବା ପରେ ଦିଲ୍ଲୀ-ଏନ୍ସିଆର୍ ଅଞ୍ଚଳରେ ତତ୍କାଳ କଟକଣା ଜାରି ହୋଇଥିଲା। ସକାଳେ ଦିଲ୍ଲୀର ହାରାହାରି ଏକ୍ୟୁଆଇ ୪୦୦ ଥିବାବେଳେ ନଏଡା ଏବଂ ଗୁରୁଗ୍ରାମରେ ଏହା ୪ ଶହ ଅତିକ୍ରମ କରିଛି।
Sambad is now on WhatsApp
Join and get latest news updates delivered to you via WhatsApp
ବାହାର ଟ୍ରକ୍ ଏବଂ କାର୍ଗୁଡ଼ିକୁ ଜାତୀୟ ରାଜଧାନୀରେ ପ୍ରବେଶ ଉପରେ ପ୍ରତିବନ୍ଧକ ଲଗାଯିବ ବୋଲି ଜଣାପଡ଼ିଛି। ଜାତୀୟ ରାଜଧାନୀରେ ସୁସ୍ଥ ଲୋକମାନେ ଧୂଆଁ ଓ ବାୟୁ ପ୍ରଦୂଷଣ ହେତୁ ଅଣନିଶ୍ବାସୀ ଲାଗିବା ଓ ଆଖି ପୋଡ଼ିବା ଆଦି ଅଭିଯୋଗ କରୁଛନ୍ତି। ନଭେମ୍ବର ପ୍ରଥମ ସପ୍ତାହରେ ଦିଲ୍ଲୀରେ ଏକ୍ୟୁଆଇ ୫୦୦ ଟପିଥିବା ବେଳେ ଏବେ ହରିୟାଣାରେ ନଡ଼ାପୋଡି ହ୍ରାସ ସତ୍ତ୍ବେ ପୁଣି ବାୟୁମାନ ସାଂଘାତିକସ୍ତରକୁ ଯିବା ଚିନ୍ତାର କାରଣ ହୋଇଛି । ଆଗକୁ ପରିସ୍ଥିତି ଯଦି ଅଧିକ ଖରାପ ଆଡ଼କୁ ଯିବ ତେବେ ପୁଣି ପୂର୍ବ ଭଳି କଠୋର କଟକଣା ଲାଗୁ ହେବ ବୋଲି ଜଣାପଡ଼ିଛି।