ଆଲଜେରିଆ ସାମରିକ ବିମାନ ଦୁର୍ଘଟଣା, ମୃତ୍ୟୁ ସଂଖ୍ୟା ୨୫୭ ଛୁଇଁଲା
ଆଲଜିଅର୍ସ: ଉତ୍ତର ଆଫ୍ରିକୀୟ ଦେଶ ଆଲଜେରିଆରେ ହୋଇଥିବା ସାମରିକ ବିମାନ ଦୁର୍ଘଟଣାରେ ମୃତ୍ୟୁ ସଂଖ୍ୟା ୨୫୭ରେ ପହଞ୍ଚିଛି ।ଏମାନଙ୍କ ମଧ୍ୟରେ ୧୦ ଜଣ ବିମାନ କର୍ମଚାରୀ ଓ ୨୪୭ ଜଣ ଯାତ୍ରୀ ଥିଲେ । ଯାତ୍ରୀଙ୍କ ମଧ୍ୟରୁ ଅଧିକାଂଶ ସୈନିକ ବା ସେନା କର୍ମଚାରୀ ଥିଲେ। ଏହି ଦୁର୍ଘଟଣାକୁ ଆଲଜେରିଆ ଇତିହାସରେ ସବୁଠାରୁ ଭୟଙ୍କର ବିମାନ ଦୁର୍ଘଟଣା ବୋଲି କୁହାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଆଲଜେରିଆର ଜାତୀୟ ସମ୍ବାଦ ଚ୍ୟାନେଲ ଏନାହାର ଟିଭି ଅନୁସାରେ ବୁଧବାର ପୂର୍ବାହ୍ନରେ ଏହି ବିମାନଟି ରାଜଧାନୀ ଆଲଜିଅର୍ସ ନିକଟରେ ଥିବା ବେଚର ବିମାନଘାଟୀରେ ଏହି ଦୁର୍ଘଟଣା ହୋଇଛି । ଏହି ଇଲ୍ୟୁସିନ ଆଇଏଲ-୭୬ ବିମାନଟି ଉଡ଼ାଣ ଭରିବା ବେଳେ ଖସିପଡିଥିଲା । ଯାନ୍ତ୍ରୀକ ତ୍ରୁଟି ଯୋଗୁଁ ଏହା ହୋଇଥିବା ସଂଦେହ କରାଯାଉଛି । ଦୁର୍ଘଟଣାରେ ପ୍ରକୃତ କାରଣ ଜାଣିବା ପାଇଁ ଆଲଜେରିଆର ପ୍ରତିରକ୍ଷା ବିଭାଗ ପକ୍ଷରୁ ଉଚ୍ଚସ୍ତରୀୟ ତଦନ୍ତ କମିଟି ଗଠନ କରାଯାଇଛି ।
ଅନ୍ୟପକ୍ଷରେ ଆଲଜେରିଆର ଜଣେ ଶାସକଦଳ ନେତା କହିଛନ୍ତି ଯେ ଏହି ବିମାନରେ ପୋଲିସାରିଓ ସଂଗଠନର ୨୬ ଜଣ ସଦସ୍ୟ ଥିଲେ । ଏହି ସଂଗଠନ ଆଲଜେରିଆର ପ୍ରଡୋଶୀ ଦେଶ ମରୋକ୍କୋରେ ବିଚ୍ଛିନ୍ନତାବାଦୀ ଆନ୍ଦୋଳନ ଚଳାଇଛି । ଆଜିର ଏହି ଦୁର୍ଘଟଣା ୨୦୦୩ରେ ହୋଇଥିବା ଏୟାର ଆଲଜରୀ ଜେଟ ଦୁର୍ଘଟଣା ପରେ ସର୍ବୁଠାରୁ ବଡ଼ ଦୁର୍ଘଟଣା ବୋଲି କୁହାଯାଉଛି । ୨୦୦୩ରେ ହୋଇଥିବା ଏହି ଦୁର୍ଘଟଣାରେ ୧୦୨ ଜଣ ବ୍ୟକ୍ତି ମୃତ୍ୟୁବରଣ କରିଥିଲେ । ସେହିପରି ୨୦୧୪ରେ ଆଉ ଏକ ସାମରିକ ବିମାନ ଦୁର୍ଘଟଣାଗ୍ରସ୍ତ ହୋଇ ୭୦ ଜଣ ସାମରିକ ଅଧିକାରୀ ମୃତ୍ୟୁ ବରଣ କରିଥିଲେ ।
୨୦୧୨ ଡିସେମ୍ବରରେ ଆଲଜେରିଆ ସେନାର ଦୁଇଟି ଲଢୁଆ ବିମାନ ଅଭ୍ୟାସ କରୁଥିବାବେଳେ ପରସ୍ପର ସହ ଧକ୍କା ହୋଇଯାଇଥିଲେ । ଏଥିରେ ଉଭୟ ବିମାନର ପାଇଲଟ ମୃତ୍ୟୁବରଣ କରିଥିଲେ ।