କାବୁଲ: ତାଲିବାନ ପଞ୍ଜଶୀର ଉପତ୍ୟକାକୁ ସଂପୂର୍ଣ୍ଣ ରୂପେ ନିଜ ନିୟନ୍ତ୍ରଣକୁ ନେଇଯିବା ପରେ ଆଫଗାନିସ୍ତାନରେ ପରବର୍ତ୍ତୀ ସରକାର ଗଠନ କରିବା ପାଇଁ ଚୂଡ଼ାନ୍ତ ପ୍ରକ୍ରିୟା ଆରମ୍ଭ କରିଦେଇଛି। ବର୍ତ୍ତମାନ ତାଲିବାନ ଆଫଗାନିସ୍ତାନରେ ପରବର୍ତ୍ତୀ ସରକାର ଗଠନ କରିବାର ଅନ୍ତିମ ପର୍ଯ୍ୟାୟରେ ଅଛି। ଏହି କ୍ରମରେ ତାଲିବାନ ଆଫଗାନିସ୍ତାନରେ ଏକ ନୂତନ ପତାକା ଓ ନୂତନ ଜାତୀୟ ସଙ୍ଗୀତ ପାଇଁ ଚିନ୍ତା କରୁଛି। ଏହା ପରବର୍ତ୍ତୀ ସରକାର ଗଠନର ଶେଷ ସ୍ପର୍ଶ ରହିବ ବୋଲି କୁହାଯାଉଛି।
Sambad is now on WhatsApp
Join and get latest news updates delivered to you via WhatsApp
ତାଲିବାନ ମୁଖପାତ୍ର ଜାବିହୁଲ୍ଲା ମୁଜାହିଦ୍ ସୋମବାର ଗଣମାଧ୍ୟମକୁ ସମ୍ବୋଧିତ କରି କହିଛନ୍ତି, ପଞ୍ଜଶୀର ଉପତ୍ୟକା ଉପରେ ସମ୍ପୂର୍ଣ୍ଣ ନିୟନ୍ତ୍ରଣ ଘୋଷଣା କରିବା ପରେ ଆଫଗାନିସ୍ତାନରେ ପରବର୍ତ୍ତୀ ସରକାର ଗଠନ ପ୍ରକ୍ରିୟା ଆରମ୍ଭ ହୋଇଛି। ପରବର୍ତ୍ତୀ ସରକାର ଆଫଗାନିସ୍ତାନର ପତାକା ଏବଂ ଜାତୀୟ ସଙ୍ଗୀତ ବଦଳାଇବା ଉପରେ ଚିନ୍ତା କରୁଛି ବୋଲି ଜାବିହୁଲ୍ଲା ଘୋଷଣା କରିଛନ୍ତି।
ଏଥିସହ ତାଲିବାନ ପ୍ରଶାସନ ସରକାରୀ କର୍ମଚାରୀଙ୍କୁ ଦରମା ମଧ୍ୟ ପ୍ରଦାନ କରିବ ବୋଲି ସେ କହିଛନ୍ତି। ଏହି ସମୟରେ, ତାଲିବାନର ସହ-ପ୍ରତିଷ୍ଠାତା ମୁଲ୍ଲାହ ବାରାଦରକୁ ଆଫଗାନିସ୍ତାନରେ ତାଲିବାନ ସରକାରର ନେତା ବୋଲି କୁହାଯିବ। ମୁଲ୍ଲାହ ହିବାଉଲ୍ଲାହ ଅଖଣ୍ଡଜଦା ଜୀବନ୍ତ ଏବଂ ଖୁବ୍ ଶୀଘ୍ର ଜନସାଧାରଣଙ୍କ ସାମ୍ନାକୁ ଆସିବ ବୋଲି ତାଲିବାନ ମୁଖପାତ୍ର ଜାବିହୁଲ୍ଲା ମୁଜାହିଦ୍ କହିଛନ୍ତି। ପୂର୍ବରୁ ହିବାଉଲ୍ଲାହ ଅଖଣ୍ଡଜଦା ତାଲିବାନ ପ୍ରଶାସନର ସର୍ବୋଚ୍ଚ ନେତା ହେବେ ବୋଲି ଖବର ଆସିଥିଲା।