କାର୍ଯ୍ୟ ଦିବସମାନଙ୍କରେ ସମସ୍ତ କେନ୍ଦ୍ର ସରକାରୀ କର୍ମଚାରୀ ଅଫିସ୍ ଆସିବେ
ନୂଆଦିଲ୍ଲୀ: କାର୍ଯ୍ୟ ଦିବସମାନଙ୍କରେ ସବୁ କେନ୍ଦ୍ର ସରକାରୀ କର୍ମଚାରୀମାନେ ଅଫିସ୍ ଆସିବେ ବୋଲି କର୍ମଚାରୀ ମନ୍ତ୍ରାଳୟ ଆଦେଶନାମାରୁ ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ବିଳମ୍ବିତ ଶନିବାରେ କେନ୍ଦ୍ର ସରକାରଙ୍କର ସମସ୍ତ ବିଭାଗ ନିମନ୍ତେ ଜାରି ଏହି ଆଦେଶନାମାରେ ଉଲ୍ଲେଖ ଅଛି, ସବୁସ୍ତରୀୟ ସରକାରୀ କର୍ମଚାରୀମାନେ ସମସ୍ତ କାର୍ଯ୍ୟ ଦିବସମାନଙ୍କରେ ଅଫିସ୍କୁ ଆସିବେ। କୌଣସି ବର୍ଗର କର୍ମଚାରୀ ଏହି ନିୟମରୁ ଛାଡ଼ ପାଇବେ ନାହିଁ। କିନ୍ତୁ, ପରବର୍ତ୍ତୀ ଆଦେଶ ପର୍ଯ୍ୟନ୍ତ ବାୟୋମେଟ୍ରିକ୍ ଉପସ୍ଥାନ ବନ୍ଦ ରହିବ।
ଜାତୀୟ ରାଜଧାନୀ ଦିଲ୍ଲୀ ସମେତ ଦେଶରେ ସକ୍ରିୟ କୋଭିଡ୍-୧୯ ଆକ୍ରାନ୍ତଙ୍କ ସଂଖ୍ୟା ଉଲ୍ଲେଖନୀୟ ଭାବେ ହ୍ରାସ ପାଇଥିବାରୁ ଏଭଳି ନିଷ୍ପତ୍ତି ଗ୍ରହଣ କରାଯାଇଥିବା ଜଣାପଡ଼ିଛି।
କିନ୍ତୁ, କଣ୍ଟେନ୍ମେଣ୍ଟ୍ ଜୋନ୍ରେ ବାସ କରୁଥବା ସମସ୍ତ ସରକାରୀ ଅଧିକାରୀ ଏବଂ କର୍ମଚାରୀଙ୍କ ପାଇଁ ଏହି ନିୟମ ଲାଗୁ ହେବନାହିଁ। ସେମାନଙ୍କ ଅଞ୍ଚଳରୁ କଣ୍ଟେନ୍ମେଣ୍ଟ୍ ନ ହଟିବା ପର୍ଯ୍ୟନ୍ତ ସେମାନେ ଅଫିସ ଆସିବେ ନାହିଁ। ସେମାନେ ଘରୁ ଥାଇ କାମ କରିବେ ଏବଂ ଯୋଗାଯୋଗ ପାଇଁ ସବୁବେଳେ ଫୋନ୍ ଅନ୍ ରଖିବେ।
ସେହିଭଳି, ଭିଡିଓ କନ୍ଫରେନ୍ସିଙ୍ଗ୍ ଜରିଆରେ ପୂର୍ବଭଳି ବୈଠକ ଚାଲିବ। ସାଧାରଣ ସ୍ୱାର୍ଥ ନିମନ୍ତେ ଅତ୍ୟାବଶ୍ୟକ ନ ହେଲେ ପ୍ରତ୍ୟକ୍ଷ ବୈଠକ ଅନୁଷ୍ଠିତ ହେବନାହିଁ।
ଏହାଛଡ଼ା, ସବୁ ବିଭାଗୀୟ କ୍ୟାଣ୍ଟିନ୍ ଖୋଲାଯାଇ ପାରେ ବୋଲି ଅନ୍ୟ ଏକ ଆଦେଶରେ କର୍ମଚାରୀ ମନ୍ତ୍ରାଳୟ କହିଛି।
ସେପଟେ ସ୍ୱାସ୍ଥ୍ୟ ମନ୍ତ୍ରାଳୟ ମଧ୍ୟ ‘ଏସଓପି’ ଜାରି କରି କହିଛି ଯେ, ଯଦି କାର୍ଯ୍ୟ ପରିସରରେ କୋଭିଡ୍-୧୯ ସଂକ୍ରମଣ ଚିହ୍ନଟ ହୁଏ, ତେବେ ଆବଶ୍ୟକ ବିଶୋଧନ କରାଯାଇ ଅଫିସ୍ ଚାଲୁ କରାଯିବ। ସେଥିପାଇଁ ଅଫିସ୍ ବନ୍ଦ କିଂବା ସିଲ୍ କରାଯିବ ନାହିଁ।
ଗତ ମାର୍ଚ ମାସରେ କରୋନାଭାଇରସ୍ କଟକଣା ଜାରି ହେବା ପର ଠାରୁ ଅଣ୍ଡର୍ ସେକ୍ରେଟେରି ଓ ସେମାନଙ୍କ ଉପରସ୍ତରୀୟ କର୍ମଚାରୀମାନେ ଅଫିସ୍ ଆସୁଥିଲେ। ମେ ମାସରେ କେନ୍ଦ୍ର ସରକାର ଜାରି କରିଥିବା ନିୟମାବଳୀ ଅନୁସାରେ, ଡେପୁଟି ସେକ୍ରେଟେରିରୁ ନିମ୍ନ ସ୍ତରୀୟ କର୍ମଚାରୀଙ୍କ ସମେତ ୫୦% କର୍ମଚାରୀଙ୍କୁ ନେଇ ଅଫିସ ଚାଲିବ ଏବଂ ତାହା ପୁଣି ବିଭିନ୍ନ ନିର୍ଦ୍ଧାରିତ ସମୟରେ।