ନୂଆଦିଲ୍ଲୀ: ସଂସଦର ‌ମୌସୁମୀ ଅଧିବେଶନର ଅବ୍ୟବହିତ ପୂର୍ବରୁ ଆଜି ସରକାର ସର୍ବଦଳୀୟ ବୈଠକ କରିଛନ୍ତି। ସୁରୁଖୁରୁରେ ଗୃହକାର୍ଯ୍ୟ ସମ୍ପାଦନ କରିବାପାଇଁ ସରକାର ଏହି ବୈଠକରେ ବିରୋଧୀଙ୍କ ସହଯୋଗ ଲୋଡ଼ିଥିଲେ। ବିରୋଧୀ ଦଳଗୁଡ଼ିକ ଅଧିବେଶନରେ ‌ଯେଉଁସବୁ ପ୍ରସଙ୍ଗ ଉଠାଇବେ ତା’ର ଏକ ଲମ୍ବା ତାଲିକା ଆଜି ବୈଠକରେ ରଖାଯାଇଥିଲା। ସେଥି ମଧ୍ୟରେ ରହିଛି ପହଲଗାମ ଆତଙ୍କବାଦୀ ଆକ୍ରମଣ, ଭାରତ-ପାକ୍‌ ଯୁଦ୍ଧବିରତି ବନ୍ଦ ‌ସଂକ୍ରାନ୍ତ ଟ୍ରମ୍ପଙ୍କ ଦାବି ଏବଂ ବିହାରରେ ସ୍ବତନ୍ତ୍ର ଭୋଟର ତାଲିକା ସଂଶୋଧନ (ସାର୍‌)।  ସର୍ବଦଳୀୟ ବୈଠକରେ ୫୦ଟି ଦଳର ୪୦ ପ୍ରତିନିଧି ଯୋଗ ଦେଇଥିଲେ।  

Advertisment

ବୈଠକରେ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ ଏବଂ ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ଅର୍ଜୁନ ରାମ ମେଘୱାଲ ସରକାରଙ୍କ ପ୍ରତିନିଧିତ୍ବ କରିଥିଲେ। ତେବେ ବିରୋଧୀ ଦଳ ନେତାମାନେ ଆରମ୍ଭରୁ ସ୍ପଷ୍ଟ କରିଦେଇଥିଲେ ଯେ ସେମାନଙ୍କ ପ୍ରସଙ୍ଗ ଉପରେ ଗୁରୁତ୍ବାରୋପ କରାଗଲେ ଗୃହରେ ସମର୍ଥନ ମିଳିବ।  କଂଗ୍ରେସ ନେତା ଗୌରବ ଗୋଗଇ ଏବଂ ଜୟରାମ ରମେଶ ବୈଠକରେ ଅଂଶଗ୍ରହଣ କରିଥିଲେ। ଟ୍ରମ୍ପଙ୍କ ଭାରତ-ପାକିସ୍ତାନ ଯୁଦ୍ଧବିରତି ଟିପ୍ପଣୀ ଉପରେ କଂଗ୍ରେସ ପ୍ରଧାନମନ୍ତ୍ରୀଙ୍କ ପ୍ରତିକ୍ରିୟା ଦାବି କରିଛି।  ପହଲଗାମ ଆତଙ୍କବାଦୀ ଆକ୍ରମଣକାରୀ ଏଯାବତ୍‌ ଧରା ପଡ଼ିନଥିବାରୁ ଏ  ନେଇ କଂଗ୍ରେସ ଉତ୍ତର ଚାହିଛି।  ସେହିପରି ଯୁଦ୍ଧବିରତି ପାଇଁ ଟ୍ରମ୍ପ ମଧ୍ୟସ୍ଥତା କରିଛନ୍ତି ବୋଲି ବାରମ୍ବାର ଦାବି କରିଥିବାରୁ ସେମାନେ ଏହି ପ୍ରସଙ୍ଗରେ ମଧ୍ୟ ସ୍ପଷ୍ଟୀକରଣ ଚାହିଛନ୍ତି।  ମୋଟ୍‌ ଉପରେ ଇଣ୍ଡି ମେଣ୍ଟ ସଂସଦରେ ପହଲଗାମ ଆତଙ୍କବାଦୀ ଆକ୍ରମଣ ଏବଂ ଅପରେସନ୍‌ ସିନ୍ଦୂର ପ୍ରସଙ୍ଗ ଉଠାଇବ ବୋଲି ବୈଠକରେ କୁହାଯାଇଛି।  

ଅନ୍ୟପକ୍ଷେ ଆପ୍‌ ବିହାରରେ ନିର୍ବାଚନ ଦୁର୍ନୀତି ଏବଂ ଦିଲ୍ଲୀରେ ବସ୍ତି ଭାଙ୍ଗିବା ପ୍ରସଙ୍ଗ ଉଠାଇଛି।  ଆପ୍‌ ସାଂସଦ ସଂଜୟ ସିଂହ ବିହାରରେ ସ୍ବତନ୍ତ୍ର ଭୋଟର ତାଲିକା ସଂଶୋଧନ ଅଭିଯାନ (ସାର୍‌)କୁ ଏକ ନିର୍ବାଚନ ଦୁର୍ନୀତି କହିଛନ୍ତି।  ‌ସେ କହିଛନ୍ତି, ବିହାରରେ ସାର୍‌ ବନ୍ଦ ହେବା ଉଚିତ। ନିର୍ବାଚନୀ ଦୁର୍ନୀତି ଚାଲିଛି। ଯଦି ସରକାର ଉତ୍ତର ନ ଦିଅନ୍ତି ତେବେ ଆମେ ଗୃହ ଭିତରେ ଏବଂ ବାହାରେ ପ୍ରଶ୍ନ ଉଠାଇବୁ। ଶ୍ରୀ ସିଂହ ମଧ୍ୟ ଟ୍ରମ୍ପଙ୍କ ଯୁଦ୍ଧବିରତି ଟିପ୍ପଣୀ ଉପରେ ସ୍ପଷ୍ଟୀକରଣ ମାଗିଛନ୍ତି।  ଆର୍‌ଏସ୍‌ପି ସାଂସଦ ଏନ୍‌କେ ପ୍ରେମଚନ୍ଦ୍ରନ କହିଛନ୍ତି, ବିହାରରେ ସାର୍‌, ଅର୍ଥନୈତିକ ପ୍ରସଙ୍ଗ, ବିଦେଶ ନୀତି ଏବଂ ଅହମଦାବାଦ ବିମାନ ଦୁର୍ଘଟଣା ଏଜେଣ୍ଡାରେ ଅଛି।  ସେ ସ୍ପଷ୍ଟ କରିଛନ୍ତି ଯେ ଆପ୍‌କୁ ଛାଡ଼ିଦେଲେ ଅନ୍ୟ ସମସ୍ତ ଇଣ୍ଡି ମେଣ୍ଟ ସଦସ୍ୟ ପୂର୍ବରୁ ଏକ ପ୍ରସ୍ତୁତି ବୈଠକ କରିଛନ୍ତି।  ବୈଠକରେ ବିଜେଡି ନେତା ସସ୍ମିତ ପାତ୍ର କହିଛନ୍ତି, ତାଙ୍କ ଦଳ ଅଧିବେଶନରେ ଓଡ଼ିଶାରେ ମହିଳାଙ୍କ ବିରୋଧରେ ବଢ଼ୁଥିବା ଅତ୍ୟାଚାର ଏବଂ ଆଇନ ଶୃଙ୍ଖଳା ସ୍ଥିତି ପ୍ରସଙ୍ଗ ଉଠାଇବ।

ସବୁ ଆଲୋଚନା ପାଇଁ ସରକାର ପ୍ରସ୍ତୁତ: ରିଜିଜୁ

ନୂଆଦିଲ୍ଲୀ: ଆସନ୍ତାକାଲି (ସୋମବାର)ଠାରୁ ସଂସଦର ମୌସୁମୀ ଅଧି‌ବେଶନ ଆରମ୍ଭ ହେବ। ଅଗଷ୍ଟ ୨୧ ତାରିଖରେ ଶେଷ ହେବାକୁ ଥିବା‌ ଅଧିବେଶନରେ ମୋଟ୍‌ ୨୧ଟି କାର୍ଯ୍ୟଦିବସ ରହିବ। ଅଧିବେଶନ ଆରମ୍ଭ ପୂର୍ବରୁ ଆଜି ସରକାର ଏକ ସର୍ବଦଳୀୟ ‌ବୈଠକ କରି ଗୃହ କାର୍ଯ୍ୟ ସୁରୁଖୁରୁରେ ସମ୍ପାଦନ ପାଇଁ ସବୁ ଦଳମାନଙ୍କର ସହଯୋଗ ଲୋଡ଼ିଛନ୍ତି। ବୈଠକ ପରେ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ ଗଣମାଧ୍ୟମକୁ କହିଛନ୍ତି, ବୈଠକ ଫଳପ୍ରଦ ହୋଇଛି ଏବଂ ନେତାମାନେ ସେମାନଙ୍କ ନିଜ ନିଜ ଦଳର କେଉଁ ସବୁ ପ୍ରସଙ୍ଗ ମୌସୁମୀ ଅଧିବେଶନରେ ଉଠାଇବେ ସେ ସଂକ୍ରାନ୍ତରେ ଆଲୋଚନା କରିଛନ୍ତି। ଗୃହ କାର୍ଯ୍ୟ ସୁରୁଖୁରୁରେ ସମ୍ପାଦନ ପାଇଁ ସହଯୋଗ କରିବାକୁ ସରକାର ବିରୋଧୀ ଦଳଙ୍କୁ ଅନୁରୋଧ କରିଥିବା ରିଜିଜୁ କହିଛନ୍ତି।

ଉଭୟ ଶାସକ ଏବଂ ବିରୋଧୀ ଦଳ ସମନ୍ବୟ ରକ୍ଷା କରି କାମ କରିବା ଉଚିତ ବୋଲି ସେ କହିଛନ୍ତି। ସରକାର ସଂସଦରେ ଅପରେସନ୍‌ ସିନ୍ଦୂର ସ‌ମେତ ଅନ୍ୟାନ୍ୟ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ପାଇଁ ପ୍ରସ୍ତୁତ ଅଛନ୍ତି ବୋଲି ରିଜିଜୁ କହିଛନ୍ତି। ଭାରତ-ପାକିସ୍ତାନ ଯୁଦ୍ଧବିରତିରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟସ୍ଥତା କରିଛନ୍ତି ବୋଲି ବାରମ୍ବାର ଦାବି କରୁଥିବା ନେଇ ରିଜିଜୁଙ୍କୁ ପ୍ରଶ୍ନ କରାଯିବାରୁ ସେ କହିଛନ୍ତି, ସରକାର ଗୃହରେ ଏହାର ସଠିକ୍‌ ଉତ୍ତର ଦେବେ।  ସେହିପରି ଜଷ୍ଟିସ ଯଶବନ୍ତ ବର୍ମାଙ୍କ ବିରୋଧରେ ମହାଭିଯୋଗ ପ୍ରସ୍ତାବ ଉପରେ ଟିପ୍ପଣୀ ରଖି ରିଜିଜୁ କହିଛନ୍ତି, ସଂସଦରେ ଜଷ୍ଟିସ ବର୍ମାଙ୍କ ବିରୋଧରେ ମହାଭିଯୋଗ ପ୍ରସ୍ତାବ ଆଣିବାପାଇଁ ୧୦୦ରୁ ଅଧିକ ସାଂସଦ ସେମାନଙ୍କ ସମ୍ମତି ପ୍ରଦାନ କରି ସାରିଛନ୍ତି।  ରିଜିଜୁ କହିଛନ୍ତି, ଆମେ ସଂସଦରେ ସମସ୍ତ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ପାଇଁ ପ୍ରସ୍ତୁତ ଅଛୁ। କିନ୍ତୁ ଏହା ସଂସଦୀୟ ନିୟମ ଅନୁଯାୟୀ ହେବା ଉଚିତ।