ଆମେରିକା ମାଗାଜିନ୍ ରିପୋର୍ଟ: ପାକିସ୍ତାନର ଏଫ୍-୧୬ ବିମାନ ହଜିନାହିଁ
ନୂଆଦିଲ୍ଲୀ: ପୁଲୱାମାରେ ଆତଙ୍କବାଦୀ ଆକ୍ରମଣ ପରେ ଭାରତର ବାଲାକୋଟ ଅଭିଯାନକୁ ନେଇ ଭାରତ ପାକିସ୍ତାନ ମଧ୍ୟରେ ବିବାଦ ଲାଗିରହିଥିବା ବେଳେ ଆମେରିକାରେ ପ୍ରକାଶିତ ଏକ ରିପୋର୍ଟ ପାକିସ୍ତାନ ସପକ୍ଷରେ ଯାଇଛି I ପାକିସ୍ତାନର କୌଣସି ଏଫ୍-୧୬ ବିମାନ ହଜିନଥିବା ଏହି ରିପୋର୍ଟ କହିଛି I ଆମେରିକାର ‘ଫୋରନ୍ ପଲିସି’ ନାମକ ମାଗାଜିନ୍ ଆମେରିକାର ଦୁଇ ଜଣ ନିରାପତ୍ତା ଅଧିକାରୀଙ୍କ ମନ୍ତବ୍ୟକୁ ଉଦ୍ଧାର କରି ଏଭଳି ଏକ ତଥ୍ୟ ପ୍ରକାଶ କରିଛି ଯାହା ସ୍ପଷ୍ଟ କରୁଛି ପାକିସ୍ତାନର କୌଣସି ଏଫ୍-୧୬ ବିମାନକୁ ଭାରତ ଧ୍ବଂସ କରିନାହିଁ I
ରିପୋର୍ଟ ଅନୁଯାୟୀ, ବାଲାକୋଟ ଆକ୍ରମଣରେ ପାକିସ୍ତାନକୁ ଯୋଗାଇଥିବା ଏଫ୍-୧୬ ବିମାନଗୁଡିକର ନିରୀକ୍ଷଣ ପାଇଁ ଆମେରିକାକୁ ନିମନ୍ତ୍ରଣ କରିଥିଲା ପାକିସ୍ତାନ ସରକାର I ନିରୀକ୍ଷଣ କାର୍ଯ୍ୟ ବିଳମ୍ବରେ ହୋଇଥଲେ ମଧ୍ୟ କୌଣସି ପାକିସ୍ତାନୀ ଏଫ୍-୧୬ ବିମାନ ଧ୍ବଂସ ହୋଇନଥିବା ଆମେରିକା ଅଧିକାରୀମାନେ ଜାଣିବାକୁ ପାଇଥିଲେ I ସୂଚନାଥାଉକି, ଚୁକ୍ତି ଅନୁସାରେ ଏହି ବିମାନଗୁଡିକୁ ଯୋଗାଇଥିବା ଦେଶ ଉକ୍ତ ବିମାନଗୁଡିକର ନିରୀକ୍ଷଣ କରିପାରିବ I ପୁଲୱାମାରେ ଆତଙ୍କବାଦୀ ଆକ୍ରମଣ ପରେ ବାଲାକୋଟ ଅଭିଯାନରେ ଫେବୃଆରୀ ୨୭ରେ ପାକିସ୍ତାନର ଏକ ଏଫ୍-୧୬ ବିମାନ ଧ୍ବଂସ କରିଦେଇଥିବା ଅଭିଯୋଗ କରିଥିଲା ଭାରତର ବାୟୁସେନା I ଭାରତର ମିଗ୍-୨୧ବିସନ୍ ବିମାନ ପାକିସ୍ତାନର ଉକ୍ତ ଏଫ୍-୧୬ କୁ ଖସାଇଦେଇଥିବା ଯୁକ୍ତି ବଢିଥିଲା ବାୟୁସେନା I ଦିଲ୍ଲୀରେ ଏକ ସାମ୍ବାଦିକ ସମ୍ମିଳନୀରେ ବାୟୁସେନାର ଅଧିକାରୀମାନେ ଧ୍ବଂସ ହୋଇଥିବା ଏଫ୍-୧୬ ବିମାନର ଧ୍ୱଂସାବଶେଷ ଓ ଆକାଶରୁ ଆକାଶରେ ଲକ୍ଷ୍ୟଭେଦ କରୁଥିବା ଏଏମ୍ଆର୍ଏଏଏମ୍ କ୍ଷେପଣାସ୍ତ୍ରର ଧ୍ବଂସଖଣ୍ଡକୁ ଦେଖାଇଥିଲେ I ଭାରତ ପକ୍ଷରୁ ଦାବି କରାଯାଇଥିଲା ଯେ ଆତଙ୍କବାଦର ନିପାତ ପାଇଁ ଆମେରିକା ଯେଉଁ ବିମାନଗୁଡିକ ପାକିସ୍ତାନକୁ ଦେଇଛି, ପାକିସ୍ତାନ ତାହା ଭାରତ ବିରୋଧରେ ବ୍ୟବହାର କରୁଛି I ପରବର୍ତୀ ସମୟରେ ଭାରତ ପକ୍ଷରୁ ମଧ୍ୟ ଆମେରିକାର ଦୃଷ୍ଟି ଆକର୍ଷଣ କରାଯାଇ ପାକିସ୍ତାନକୁ ଅନ୍ତର୍ଜାତୀୟ ସ୍ତରରେ ଘେରିବାକୁ ଚେଷ୍ଟା କରିଛି ଭାରତ I ଆମେରିକାରେ ଏଭଳି ରିପୋର୍ଟ ପ୍ରକାଶ ପାଇବା ପରେ ପାକିସ୍ତାନ ତରଫରୁ ସେନାର ପ୍ରବକ୍ତା ଅସିଫ୍ ଗଫୁର୍ ପ୍ରତିକ୍ରିୟା ପ୍ରକାଶ କରି କହିଛନ୍ତି ଭାରତ ମିଥ୍ୟା କହିବା ବନ୍ଦ କରୁ ଏବଂ ପ୍ରକୃତରେ ଭାରତର ଯାହା କ୍ଷତି ହୋଇଛି ତାହା ସ୍ପଷ୍ଟ କରୁ I
Sambad is now on WhatsApp
Join and get latest news updates delivered to you via WhatsApp
ରିପୋର୍ଟକୁ ଭାରତୀୟ ବାୟୁସେନାର ଖଣ୍ଡନ
ଆମେରିକା ମାଗାଜିନ୍ରେ ପ୍ରକାଶ ପାଇଥିବା ତଥ୍ୟ ପାକିସ୍ତାନ ସପକ୍ଷରେ ଯାଉଥିବା ବେଳେ ଭାରତ ପକ୍ଷରୁ ଏହାକୁ ଖଣ୍ଡନ କରାଯାଇଛି। ଭାରତୀୟ ବାୟୁସେନା ଏହା ଉପରେ ପ୍ରତିକ୍ରିୟା କରିଛି ା ଫେବୃଆରୀ ୨୭ରେ ପାକିସ୍ତାନର ଏଫ୍-୧୬ ଲଢୁଆ ବିମାନକୁ ନସେରା ସେକ୍ଟର୍ରେ ଖସାଇଛି ବୋଲି ପୁଣି ଦୋହରାଇଛି I ଭାରତର ମିଗ୍-୨୧ ଲଢୁଆ ବିମାନ ପାକିସ୍ତାନର ବିମାନକୁ ଧ୍ବଂସ କରିଥିବା ସ୍ପଷ୍ଟ କରିଛି ଭାରତୀୟ ବାୟୁସେନା I