ଆସନ୍ତାକାଲି କୋଲକାତା ଗସ୍ତରେ ଯିବେ ଅମିତ ଶାହା, ସିଏଏ ସଂପର୍କରେ ଲୋକଙ୍କୁ ବୁଝାଇବେ
କୋଲକତା : ନିଜର ଓଡ଼ିଶା ଗସ୍ତ ପରେ ପଶ୍ଚିମବଙ୍ଗ ଗସ୍ତ କରିବେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା । ସେ ରବିବାରଦିନ କୋଲକାତାର ଶହୀଦ ମିନାର ପଡ଼ିଆଠାରେ ଆୟୋଜିତ ଏକ ନାଗରିକତା ଆଇନ(ସିଏଏ) ସପକ୍ଷବାଦୀ ଜନସଭାରେ ଯୋଗ ଦେବେ । ଏହି ଅବସରରେ ସେ ଲୋକମାନଙ୍କୁ ସିଏଏକୁ ନେଇ ଉଠିଥିବା ବିଭ୍ରାନ୍ତି ଦୂର କରିବାକୁ ଉଦ୍ୟମ କରିବେ । ଏହି ର୍ୟାଲିରେ ବିଜେପି ଅଧ୍ୟକ୍ଷ ଜେ.ପି.ନଡ୍ଡା ମଧ୍ୟ ଯୋଗ ଦେବାର କାର୍ଯ୍ୟକ୍ରମ ରହିଛି । ଏହି ର୍ୟାଲି ପରେ ଶାହା କୋଲକାତାର ରାଜରହାଟଠାରେ ଥିବା ଏନଏସଜିର ନୂଆ କୋଠାର ଉଦଘାଟନ କରିବେ । ନିଜର କୋଲକତା ଗସ୍ତକାଳରେ ସେ ପ୍ରସିଦ୍ଧ କାଳୀଘାଟ ମନ୍ଦିର ପରିଦର୍ଶନ କରିବାର କାର୍ଯ୍ୟକ୍ରମ ରହିଛି ।
Sambad is now on WhatsApp
Join and get latest news updates delivered to you via WhatsApp
ଶୁକ୍ରବାରଦିନ ଭୁବନେଶ୍ୱରରେ ଅନୁଷ୍ଠିତ ସିଏଏ ସପକ୍ଷବାଦୀ ଜନସଭାରେ ଉଦବୋଧନ ଦେଇ ଶାହା କହିଥିଲେ ଯେ ବିରୋଧୀ ଦଳମାନେ ସିଏଏ ସମ୍ପର୍କରେ ବିଭ୍ରାନ୍ତି ସୃଷ୍ଟି କରି ଦେଶରେ ହିଂସା ସୃଷ୍ଟି କରୁଛନ୍ତି । କିନ୍ତୁ ପ୍ରକୃତ କଥା ହେଉଛି ସିଏଏ କୌଣସି ସଂଖ୍ୟାଲଘୁଙ୍କର ନାଗରିକତା ନିଏନାହିଁ, ବରଂ ପଡ଼ୋଶୀ ପାକିସ୍ତାନ, ଆଫଗାନିସ୍ତାନ ଓ ବାଂଲାଦେଶରେ ବିତାଡ଼ିତ ସଂଖ୍ୟାଲଘୁମାନଙ୍କୁ ନାଗରିକତା ଦେଇଥାଏ ।