ଅମିତାଭ ବଚ୍ଚନଙ୍କ ଟୁଇଟର ଆକାଉଂଟ ହ୍ୟାକ୍, ବିଗ ବିଙ୍କ ସ୍ଥାନରେ ପାକିସ୍ତାନର ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଫଟୋ!
ମୁମ୍ବାଇ: ଗତକାଲି ବଲିଉଡର ବିଗ୍ ବି ଅମିତାଭ ବଚ୍ଚନଙ୍କ ଟୁଇଟର ଆକାଉଂଟ ହ୍ୟାକ୍ ହୋଇଥିଲା। ବିଗ ବିଙ୍କ ସ୍ଥାନରେ ହ୍ୟାକର ପାକିସ୍ତାନର ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଫଟୋ ଲଗାଇଦେଇଥିଲା । ଅମିତାଭଙ୍କ ପ୍ରୋଫାଇଲରେ ମଧ୍ୟ କିଛି ପରିବର୍ତ୍ତନ ହୋଇଥିଲା । ଆକାଉଂଟରେ ଲଭ୍ ପାକିସ୍ତାନ ବୋଲି ଲେଖାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ତୁର୍କୀର ଜଣେ ହ୍ୟାକର ଏହି କାମ କରିଥିବାର ଦାବି କରିଛନ୍ତି। ତେବେ ବର୍ତ୍ତମାନ ସମୟରେ ଅମିତାଭଙ୍କ ଆକାଉଂଟ ଠିକ୍ ହୋଇଯାଇଛି । ହ୍ୟାକରଙ୍କ ଦ୍ୱାରା କରାଯାଇଥିବା ସମସ୍ତ ଟୁଇଟ୍ ମଧ୍ୟ ଡିଲିଟ୍ କରାଯାଇଛି । ମୁମ୍ବାଇ ପୁଲିସ ଏହି ଘଟଣାକୁ ଗମ୍ଭୀରତା ସହ ନେବା ସହିତ ମାମଲାର ତଦନ୍ତ ଆରମ୍ଭ କରିଦେଇଛି । ମୁମ୍ବାଇର ସାଇବର ସେଲ ଏହି ଘଟଣାର ତଦନ୍ତ ଆରମ୍ଭ କରିଦେଇଛି । ଅମିତାଭଙ୍କ ଟୁଇଟର ଆକାଉଂଟ ହ୍ୟାକ୍ କରିବାର ଉଦ୍ଦେଶ୍ୟ କ’ଣ ଥିଲା ଏଯାଏଁ ଜଣାପଡ଼ିନାହିଁ । ହ୍ୟାକ୍ ପଛରେ ପାକିସ୍ତାନ ସମର୍ଥିତ ହ୍ୟାକରଙ୍କ ହାତ ଥାଇପାରେ ବୋଲି ଅନୁମାନ କରାଯାଉଛି ।
ବଲିଉଡ଼ ଜଗତର ମେଗାଷ୍ଟାର ଅମିତାଭ ବଚ୍ଚନ ସୋସିଆଲ ମିଡ଼ିଆରେ ବେଶ୍ ସକ୍ରିୟ । ଆଉ ଏହାର ଫାଇଦା ଉଠାଇ ବିଗ ବିଙ୍କୁ ବଦନାମ କରିବାର ପ୍ରୟାସ ହୋଇଛି । ମେଗାଷ୍ଟାରଙ୍କ ଆକାଉଂଟ ହ୍ୟାକ୍ ହେବାକଥା ତାଙ୍କ ଫ୍ୟାନ୍ ତଥା ସୋସିଆଲ ମିଡ଼ିଆରେ ପ୍ରଚାର ହୋଇସାରିଥିଲା । ଏଠାରେ ସୂଚନାଯୋଗ୍ୟ ଯେ ଗତବର୍ଷ ଅମିତାଭ ବଚ୍ଚନଙ୍କ ପୁଅ ଅଭିଷେକଙ୍କର ଆକାଉଣ୍ଟ ମଧ୍ୟ ହ୍ୟାକ୍ କରାଯାଇଥିଲା ।