ସ୍ୱର୍ଣ୍ଣ ମନ୍ଦିର ପରିସରରେ ଟିକ୍ଟକ୍ ମନା
ଅମୃତସର: ପଞ୍ଜାର ଅମୃତସରସ୍ଥିତ ସ୍ୱର୍ଣ୍ଣ ମନ୍ଦିରରେ ଟିକଟକ୍ ବ୍ୟାନ୍ ହୋଇଛି । ଏହି ଲୋକପ୍ରିୟ ଆପ୍କୁ ମନ୍ଦିର ଭିତରେ ବ୍ୟବହାର ନ କରିବା ପାଇଁ ଶନିବାର ନୋଟିସ୍ ଜାରି କରାଯାଇଛି । ଶିରୋମଣି ଗୁରୁଦ୍ୱାର ପ୍ରବନ୍ଧକ କମିଟି (ଏସଜିପିସି) ପକ୍ଷରୁ ଶ୍ରୀହରମିନ୍ଦର ସାହିବ୍ (ସ୍ୱର୍ଣ୍ଣ ମନ୍ଦିର) ପରିସର ଭିତରେ ଟିକଟକ୍ ଉପରେ ରୋକ ଲଗାଯାଇଛି। ଶ୍ରୀହରମିନ୍ଦର ସାହିବ୍ର ମ୍ୟାନେଜର୍ ଜସବିନ୍ଦର୍ ସିଂହ କହିଛନ୍ତି , ଆମେ ଏଠାକୁ ଆସୁଥିବା ଶ୍ରଦ୍ଧାଳୁଙ୍କୁ ଅପିଲ୍ କରି କହୁଛୁ ଯେ ଏମିତି ପୂଜାସ୍ଥଳରେ ଏଭଳି ବ୍ୟବହାର ପ୍ରଦର୍ଶନ କରନ୍ତୁ ନାହିଁ ।
Sambad is now on WhatsApp
Join and get latest news updates delivered to you via WhatsApp
ଶୁକ୍ରବାର ସ୍ବର୍ଣ୍ଣମନ୍ଦିରର ପରିଚାଳନାରେ ଥିବା ଜ୍ଞାନୀ ହରପ୍ରୀତ ସିଂହ କହିଛନ୍ତି, ଶ୍ରଦ୍ଧାଳୁ ଯଦି ମନ୍ଦିର ପରିସରରେ ସେଲ୍ଫି କିମ୍ବା ଟିକଟକ୍ ଭଳି ଭିଡିଓ ପ୍ରସ୍ତୁତ କରିବାରୁ ନିବୃତ ନ ହୁଅନ୍ତି ତେବେ ମୋବାଇଲ୍କୁ ହିଁ ମନ୍ଦିରରେ ବ୍ୟାନ୍ କରାଯିବ । ସେ କହିଛନ୍ତି , ଆମେ ଚାହୁଁଛୁ ଯେ ଶ୍ରଦ୍ଧାଳୁ ବିନା କୌଣସି ବାଧାରେ ସ୍ୱର୍ଣ୍ଣ ମନ୍ଦିର ପରିଦର୍ଶନ କରନ୍ତୁ । ଆମେ ମୋବାଇଲ୍କୁ ନେଇ କୌଣସି ପ୍ରତିବନ୍ଧ ଲଗାଇବାକୁ ଚାହୁଁନାହୁଁ । କିନ୍ତୁ ବର୍ତ୍ତମାନ ଯେଭଳି ଟିକଟକ୍ ଭିଡିଓ ଭଳି ଘଟଣା ସାମ୍ନାକୁ ଆସୁଛି ଆଗକୁ ଯଦି ଏଥିରେ କୌଣସି ସୁଧାର ନ ଦେଖାଗଲା ତେବେ ମନ୍ଦିରରେ ମୋବାଇଲ୍କୁ ବ୍ୟାନ୍ କରିବାକୁ ଆମେ ବାଧ୍ୟ ହେବୁ ।
ଆପଣଙ୍କୁ କହିରଖୁଛୁ ସ୍ୱର୍ଣ୍ଣ ମନ୍ଦିରରେ ୩ ଜଣ ଯୁବତୀଙ୍କ ପଞ୍ଜାବୀ ଗୀତର ଟିକଟକ୍ ଭିଡିଓ ଭାଇରାଲ୍ ହେବା ପରେ ଏହି ମନ୍ଦିର ପରିଚାଳନା ପକ୍ଷରୁ ଏହି ପଦକ୍ଷେପ ନିଆଯାଇଛି।