ଜଣେ ଆଦର୍ଶ ଶିକ୍ଷକଙ୍କ ନିକଟରେ ଚାରିଟି ସୁଗୁଣ ଥାଏ: ରାଷ୍ଟ୍ରପତି
ନୂଆଦିଲ୍ଲୀ : ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୋମବାର ଦିନ ଗୁରୁଦିବସ ଅବସରରେ ନୂଆଦିଲ୍ଲୀସ୍ଥିତ ବିଜ୍ଞାନ ଭବନରେ ଆୟୋଜିତ ଉତ୍ସବରେ ଦେଶର ବିଭିନ୍ନ ରାଜ୍ୟର ୪୫ ଶିକ୍ଷକଙ୍କୁ ଜାତୀୟ ପୁରସ୍କାର ପ୍ରଦାନ କରିଛନ୍ତି। ଏହି ଅବସରରେ ରାଷ୍ଟ୍ରପତି ଶିକ୍ଷକମାନଙ୍କ ସମ୍ପର୍କରେ ଏକ ପ୍ରସିଦ୍ଧ ଲୋକ ଉକ୍ତିର ଅବଧାରଣା ଦେଇ ସେ କହିଛନ୍ତି ‘ଜଣେ ସାଧାରଣ ଶିକ୍ଷକ କୁହନ୍ତି, ଜଣେ ଭଲ ଶିକ୍ଷକ ବୁଝାନ୍ତି, ଶ୍ରେଷ୍ଠ ଶିକ୍ଷକ ପ୍ରଦର୍ଶନ କରନ୍ତି ଓ ମହାନ ଶିକ୍ଷକ ପ୍ରେରିତ କରିଥାନ୍ତି’। ଜଣେ ଆଦର୍ଶ ଶିକ୍ଷକଙ୍କ ନିକଟରେ ଏହି ଚାରିଟି ଗୁଣ ରହିଥାଏ । ପ୍ରକୃତ ଅର୍ଥରେ ଏହି ଆଦର୍ଶ ଶିକ୍ଷକମାନେ ଛାତ୍ରଛାତ୍ରୀମାନଙ୍କ ଜୀବନ ନିର୍ମାଣ ମାଧ୍ୟମରେ ଦେଶ ନିର୍ମାଣ କରିଥାନ୍ତି।
Sambad is now on WhatsApp
Join and get latest news updates delivered to you via WhatsApp
ରାଷ୍ଟ୍ରପତି କହିଲେ, ବିଜ୍ଞାନ, ଗବେଷଣା ଓ ନବାଚାର ଆଜିର ଜ୍ଞାନ ଅର୍ଥନୀତିରେ ବିକାଶର ଭିତ୍ତି । ସ୍କୁଲ ଶିକ୍ଷା ମାଧ୍ୟମରେ ଏସବୁ କ୍ଷେତ୍ରରେ ଭାରତର ସ୍ଥିତିକୁ ଆହୁରି ମଜବୁତ କରିବାର ଶିଳାନ୍ୟାସ ହେବ। ତାଙ୍କ ଦୃଷ୍ଟିରେ ମାତୃଭାଷା ମାଧ୍ୟମରେ ବିଜ୍ଞାନ, ସାହିତ୍ୟ କିମ୍ବା ସାମାଜିକ ବିଜ୍ଞାନରେ ମୌଳିକ ପ୍ରତିଭାର ବିକାଶ ଅଧିକ ହୋଇଥାଏ । ମାଆମାନେ ପ୍ରାରମ୍ଭିକ ଜୀବନରେ ଆମକୁ ଜୀବନ ଜୀଇଁବାର କଳା ଶିଖାଇଥାନ୍ତି । ତେଣୁ ମାତୃଭାଷା ପ୍ରକୃତ ମେଧା ବିକାଶରେ ସହାୟକ ହୋଇଥାଏ। ମାଆ ପରେ ଶିକ୍ଷକମାନେ ଆମ ଜୀବନରେ ଶିକ୍ଷାକୁ ଆଗେଇ ନେଇଥାନ୍ତି । ଯଦି ଶିକ୍ଷକମାନେ ମାତୃଭାଷାରେ ଶିକ୍ଷା ଦିଅନ୍ତି ତେବେ ଛାତ୍ରଛାତ୍ରୀମାନେ ସହଜରେ ନିଜ ମେଧା ବିକଶିତ କରିପାରିବେ । ଏଥିପାଇଁ ଜାତୀୟ ଶିକ୍ଷା ନୀତି ୨୦୨୦ରେ ସ୍କୁଲ ଶିକ୍ଷା ଓ ଉଚ୍ଚ ଶିକ୍ଷାରେ ଭାରତୀୟ ଭାଷା ବ୍ୟବହାରକୁ ଗୁରୁତ୍ୱ ପ୍ରଦାନ କରାଯାଇଛି।
ବିଜ୍ଞାନ ଓ ଗବେଷଣା ପ୍ରତି ଛାତ୍ରଛାତ୍ରୀଙ୍କ ମନରେ ଆଗ୍ରହ ସୃଷ୍ଟି କରିବା ଶିକ୍ଷକମାନଙ୍କ ଦାୟିତ୍ୱ । ଜଣେ ଭଲ ଶିକ୍ଷକ ପ୍ରକୃତିରେ ଉପସ୍ଥିତ ଜୀବନ୍ତ ଉଦାହରଣ ମାଧ୍ୟମରେ ଜଟିଳ ତତ୍ତ୍ୱକୁ ସହଜରେ ବୁଝାଇ ପାରିବେ। ଛାତ୍ରଛାତ୍ରୀଙ୍କ ମଧ୍ୟରେ ପ୍ରଶ୍ନ ପଚାରିବା ଓ ଆଶଙ୍କା ବ୍ୟକ୍ତ କରିବାର ଅଭ୍ୟାସକୁ ପ୍ରୋତ୍ସାହନ ଦେବାକୁ ରାଷ୍ଟ୍ରପତି ଶିକ୍ଷକମାନଙ୍କୁ ଆହ୍ୱାନ ଦେଇଛନ୍ତି । ଅଧିକରୁ ଅଧିକ ପ୍ରଶ୍ନର ଉତ୍ତର ଦେବା ଏବଂ ସନ୍ଦେହ ଦୂର କରିବା ମାଧ୍ୟମରେ ସେମାନେ ନିଜ ଜ୍ଞାନ ମଧ୍ୟ ବୃଦ୍ଧି କରିପାରିବେ ବୋଲି ରାଷ୍ଟ୍ରପତି କହିଛନ୍ତି ।