ରାହୁଲ ଗାନ୍ଧୀ ନିଜେ ଇସ୍ତଫା ଦେଇଥିଲେ, ଆମେ ଇସ୍ତଫା ଦେଵାକୁ କହିନଥିଲୁ: ଆନନ୍ଦ ଶର୍ମା

ନୂଆଦିଲ୍ଲୀ: କଂଗ୍ରେସର ବରିଷ୍ଠ ନେତା ଆନନ୍ଦ ଶର୍ମା ଆଜି ପୁଣି ଥରେ କଂଗ୍ରେସରେ ଆଭ୍ୟନ୍ତରୀଣ ପରିବର୍ତ୍ତନ ଆଣିବା ବିଷୟରେ କହିଛନ୍ତି । ସେ କହିଛନ୍ତି ଯେ ଯଦି ଦଳରେ କିଛି ଆଭ୍ୟନ୍ତରୀଣ ପରିବର୍ତ୍ତନ ଅଣାଯାଏ ତେବେ କଂଗ୍ରେସ ପୁନର୍ଜୀବିତ ହେବ | ସୂଚନା ଥାଉ କି ଯେ ହିମାଚଳ ପ୍ରଦେଶରେ ବିଧାନସଭା ନିର୍ବାଚନ ପୂର୍ବରୁ ଆନନ୍ଦ ଶର୍ମା ରବିବାର ଦିନ ଦଳର ରାଜ୍ୟ ୟୁନିଟର ପରିଚାଳନା କମିଟି ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ । ତାଙ୍କର ଏହି ପଦକ୍ଷେପ କଂଗ୍ରେସ ପାଇଁ ଏକ ବଡ ଝଟକା ବୋଲି ଚର୍ଚ୍ଚା ଜୋର ଧରିଥିଲା। ତେବେ ପାର୍ଟି ଯେଉଁଠାରେ କହିବ ସେ ପ୍ରଚାର କରିବେ ବୋଲି ସେ କହିଛନ୍ତି ।

ବୁଧବାର ଦିନ ଏକ ସାକ୍ଷାତକାରରେ ସେ କହିଛନ୍ତି, "ଯେଉଁଠାରେ ଆବଶ୍ୟକ ହୁଏ, ମୁଁ କଂଗ୍ରେସ ଦଳ ପାଇଁ ପ୍ରଚାର କରିବି। କଂଗ୍ରେସ ଦଳବାଦରୁ ବାହାରି ଏକଜୁଟ ହେବା ଆବଶ୍ୟକ। ଆମେ ସମସ୍ତେ କଂଗ୍ରେସ କର୍ମୀ। ଗୁରୁତ୍ୱପୂର୍ଣ୍ଣ କଥା ହେଉଛି କଂଗ୍ରେସ ଦଳ ଦୃଢ ରହିବାର ଆବଶ୍ୟକତା ଅଛି "| କଂଗ୍ରେସ ଦଳରେ ନୂତନ ଅଧ୍ୟକ୍ଷ ନିର୍ବାଚନ ସମ୍ପର୍କରେ ଆଲୋଚନା ତୀବ୍ର ହୋଇଛି। ପୁଣିଥରେ ଗାନ୍ଧୀ ପରିବାରର ଜଣେ ସଦସ୍ୟ କଂଗ୍ରେସର ଅଧ୍ୟକ୍ଷ ହୋଇପାରନ୍ତି ବୋଲି ଚର୍ଚ୍ଚା ଜୋର ଧରିଛି | ଏହାକୁ ନେଇ ଆନନ୍ଦ ଶର୍ମା କହିଛନ୍ତି, "ଆମେ ରାହୁଲ ଗାନ୍ଧୀଙ୍କୁ ୨୦୧୮ରେ କଂଗ୍ରେସ ସଭାପତି ଭାବରେ ମନୋନୀତ କରିଥିଲୁ, କିନ୍ତୁ ସେ ଇସ୍ତଫା ଦେଇଥିଲେ ।

ଆମେ ତାଙ୍କୁ ଇସ୍ତଫା ଦେବାକୁ କହିନଥିଲୁ। ନେହେରୁ-ଗାନ୍ଧୀ ପରିବାର କଂଗ୍ରେସ ପାର୍ଟି ପାଇଁ ଅବିଚ୍ଛେଦ୍ୟ ଅଙ୍ଗ ରହିବା ଆବଶ୍ୟକ'। ସୂଚନା ଥାଉ କି ଶର୍ମାଙ୍କ ପୂର୍ବରୁ ଜମ୍ମୁ-କଶ୍ମୀରରେ କଂଗ୍ରେସର ନିର୍ବାଚନ ପ୍ରଚାର କମିଟିର ସଭାପତି ପଦରୁ ଗୁଲାମ ନବୀ ଆଜାଦ ଇସ୍ତଫା ଦେଇଥିଲେ | ଉଭୟ ଗୁଲାମ ନବୀ ଆଜାଦ ଏବଂ ଆନନ୍ଦ ଶର୍ମା ଦଳର ଜି୨୩ ଦଳର ପ୍ରମୁଖ ନେତା ହୋଇଥିବାବେଳେ ଉଭୟ ଦଳର ନେତୃତ୍ୱର ନିଷ୍ପତ୍ତିକୁ ସମାଲୋଚନା କରିବାକୁ ପଛେଇ ନଥିଲେ |