ଇଡି ଆଗରେ ହାଜର ହୋଇ ଏହି ପ୍ରଶ୍ନ ପଚାରିଲେ ମହାରାଷ୍ଟ୍ରର ପୂୂର୍ବତନ ଗୃହମନ୍ତ୍ରୀ ଅନିଲ ଦେଶମୁଖ

ମୁମ୍ବାଇ: ଅନେକ ସମନ ପଠାଯିବା ପରେ ଶେଷରେ ମୁମ୍ବାଇର ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଆଗରେ ହାଜର ହୋଇଛନ୍ତି ମହାରାଷ୍ଟ୍ରର ପୂୂର୍ବତନ ଗୃହମନ୍ତ୍ରୀ ଅନିଲ ଦେଶମୁଖ। ବଟି ଆଦାୟ ମାମଲାରେ ପଚରାଉଚରା ପାଇଁ ସେ ଆଜି ଅପରାହ୍ନରେ ଇଡି କାର୍ଯ୍ୟାଳୟରେ ପହଞ୍ଚିଥିବା ଜଣାପଡ଼ିଛି। ଅନିଲ ଦେଶମୁଖଙ୍କ ଓକିଲଙ୍କ ଅନୁଯାୟୀ, ସେ ତାଙ୍କ ବୟାନ ରେକର୍ଡ କରିବା ପାଇଁ ଇଡି କାର୍ଯ୍ୟାଳୟରେ ପହଞ୍ଚିଛନ୍ତି। ଅନେକ ଥର ଦେଶମୁଖଙ୍କୁ ଇଡି ପଚରାଉଚରା ପାଇଁ ଡକାଇଥିଲେ ବି ସେ ହାଜର ହୋଇପାରିନଥିଲେ। ଅନିଲ ଦେଶମୁଖଙ୍କ ସହ ତାଙ୍କ ଓକିଲ ମଧ୍ୟ ଏହି ସମୟରେ ଇଡି କାର୍ଯ୍ୟାଳୟରେ ଉପସ୍ଥିତ ଅଛନ୍ତି।

ଏକ ଭିଡିଓ ବାର୍ତ୍ତାରେ ଅନିଲ ଦେଶମୁଖ କହିଛନ୍ତି ଯେ, ‘ମୁଁ କୋର୍ଟରେ ମୋର ପକ୍ଷ ରଖିଛି। ମୋର କର୍ମଚାରୀ ଏବଂ ମୁଁ ତଦନ୍ତରେ ସହଯୋଗ କରିଛୁ। ପରମବୀର ସିଂ ମୋ ବିରୋଧରେ ମିଥ୍ୟା ଅଭିଯୋଗ କରିଛନ୍ତି। ଏହା ମଧ୍ୟ ଦେଖାଯିବା ଉଚିତ ଯେ ପରମବୀର ସିଂ ଏବେ କେଉଁଠି ଅଛନ୍ତି। ଦେଶ ଛାଡି ପଳାଇନାହାନ୍ତି ତ?

ଉଲ୍ଲେଖଯୋଗ୍ୟ, କିଛି ମାସ ତଳେ ଶିଳ୍ପପତି ମୁକେଶ ଅମ୍ବାନୀଙ୍କ ଦକ୍ଷିଣ ମୁମ୍ବାଇସ୍ଥିତ ବାସଭବନ ବାହାରେ ପାର୍କିଂ ହୋଇଥିବା ଏକ ବିସ୍ଫୋରକ ସାମଗ୍ରୀରେ ପୂର୍ଣ୍ଣ ଏସୟୁଭି ଜବତ ହେବା ଘଟଣାର ତଦନ୍ତ ଏନଆଇଏ ଦ୍ୱାରା କରାଯାଉଥିଲା। ଏହି ତଦନ୍ତ କାଳରେ ମୁମ୍ବାଇ ପୁଲିସ୍‌ ମୁଖ୍ୟ ପରମବୀର ସିଂହଙ୍କୁ ମୁମ୍ବାଇ ପୁଲିସ କମିଶନର ପଦରୁ ସ୍ଥାନାନ୍ତର କରାଯାଇଥିଲା।

ପୁଲିସ କମିଶନର ପଦରୁ ସ୍ଥାନାନ୍ତର ହେବାପରେ ପରମବୀର ସିଂ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଏକ ବିସ୍ଫୋରକ ଚିଠି ଲେଖିଥିଲେ। ଚିଠିରେ ସେ ଉଲ୍ଲେଖ କରିଥିଲେ ଯେ, ମହାରାଷ୍ଟ୍ର ଗୃହମନ୍ତ୍ରୀ ଅନିଲ ଦେଶମୁଖ ମୁମ୍ବାଇର ବାର ଏବଂ ହୋଟେଲରୁ ୫୦ରୁ ୬୦କୋଟି ଟଙ୍କା ସହିତ ଗିରଫ ପୁଲିସ୍‌ ଅଧିକାରୀ ସଚିନ ଭେଜ ଏବଂ ଅନ୍ୟ ପୁଲିସ ଅଧିକାରୀଙ୍କୁ ମାସିକ ୧୦୦ କୋଟି ଟଙ୍କାର ବଟି ସଂଗ୍ରହ କରିବାକୁ କହିଥିଲେ।