ଲଡୁରେ ପଶୁ ଚର୍ବି ବିବାଦ: ସବୁ ପ୍ରମୁଖ ମନ୍ଦିର ପ୍ରସାଦର ଗୁଣବତ୍ତା ଯାଞ୍ଚ ଦାବି

ଅଯୋଧ୍ୟା: ଅଯୋଧ୍ୟା ରାମମନ୍ଦିରର ମୁଖ୍ୟ ପୂଜକ ଆଚାର୍ଯ୍ୟ ସତ୍ୟେନ୍ଦ୍ର ଦାସ କହିଛନ୍ତି ଯେ ଚଳିତ ବର୍ଷ ଜାନୁଆରି ୨୨ ତାରିଖରେ ରାମଲାଲାଙ୍କ ପ୍ରାଣପ୍ରତିଷ୍ଠା ସମାରୋହରେ ତିରୁପତି ମନ୍ଦିରର ଲଡୁ ଭକ୍ତଙ୍କୁ ପ୍ରସାଦରୂପେ ବଣ୍ଟନ କରାଯାଇଥିଲା। ପ୍ରସିଦ୍ଧ ଆନ୍ଧ୍ରପ୍ରଦେଶ ମନ୍ଦିରର ଲଡୁରୁ ପଶୁ ଚର୍ବି ମିଳିବା ଘଟଣାକୁ ନେଇ ବିବାଦ ଲାଗି ରହିଥିବା ବେଳେ ମୁଖ୍ୟ ପୂଜକଙ୍କ ଏଭଳି ମନ୍ତବ୍ୟ ପରେ ଘଟଣାର ତଦନ୍ତ ପାଇଁ ଦାବି ହୋଇଛି। ଏହାଛଡ଼ା ଭାରତର ସବୁ ପ୍ରମୁଖ ମନ୍ଦିରରେ ଭକ୍ତଙ୍କୁ ଦିଆଯାଉଥିବା ପ୍ରସାଦର ଗୁଣବତ୍ତା ଯାଞ୍ଚ ପାଇଁ ମଧ୍ୟ ଦାବି ଉଠିଛି। 

ମୁଁ ଜାଣେ ନାହିଁ କେତେ ଲଡୁ ଅଣାଯାଇଥିଲା। ଟ୍ରଷ୍ଟ ଏହା ଜାଣିଥିବ। କିନ୍ତୁ ଲଡୁ ଯାହା ଆସିଲା, ଭକ୍ତଙ୍କ ମଧ୍ୟରେ ପ୍ରସାଦ ରୂପେ ବଣ୍ଟନ କରାଯାଇଥିଲା। ପଶୁଚର୍ବି ସମ୍ପର୍କିତ ରିପୋର୍ଟ ଏକ ବିପଜ୍ଜନକ ଷଡ଼ଯନ୍ତ୍ର ବୋଲି ଆଚାର୍ଯ୍ୟ ସତ୍ୟେନ୍ଦ୍ର ଦାସ ଗଣମାଧ୍ୟମକୁ କହିଛନ୍ତି। ଶ୍ରୀ ଭେଙ୍କଟେଶ୍ୱର ମନ୍ଦିର ପରିଚାଳନା କରୁଥିବା ତିରୁମାଲା ତିରୁପତି ଦେବସ୍ଥାନମ୍ (ଟିଟିଡି) ପକ୍ଷରୁ ଏକ ଲକ୍ଷରୁ ଅଧିକ ଲଡୁ ପ୍ରାଣପ୍ରତିଷ୍ଠା ସମାରୋହ ପାଇଁ ପଠାଯାଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଅନୁଷ୍ଠିତ ଏହି ଉତ୍ସବରେ ୮ ହଜାର ବିଶିଷ୍ଟ ବ୍ୟକ୍ତି ଯୋଗ ଦେଇଥିଲେ। ତେବେ ରାମମନ୍ଦିର ପରିଚାଳନା କରୁଥିବା ଟ୍ରଷ୍ଟ ଶ୍ରୀରାମ ଜନ୍ମଭୂମି ତୀର୍ଥକ୍ଷେତ୍ର ପକ୍ଷରୁ କୁହାଯାଇଛି ଯେ ରାମଲାଲାଙ୍କ ପୂଜାର୍ଚ୍ଚନା ସମାରୋହରେ କେବଳ ଅଳେଇଚ ମଞ୍ଜି ପ୍ରସାଦ ଭାବେ ବଣ୍ଟନ କରାଯାଇଥିଲା। ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟ କହିଛନ୍ତି ଯେ ସେମାନେ ତିରୁପତି ଲଡୁ ଉପରେ କେନ୍ଦ୍ରର ତଦନ୍ତ ରିପୋର୍ଟକୁ ଅପେକ୍ଷା କରିଛନ୍ତି। ଆମେ କେବଳ ଭକ୍ତଙ୍କୁ ଅଳେଇଚ ବଣ୍ଟନ କରିଥିଲୁ ବୋଲି ରାୟ କହିଛନ୍ତି।

ତିରୁପତି ବିବାଦ ଯୋଗୁଁ ସାରା ଭାରତର ଅନେକ ପ୍ରମୁଖ ମନ୍ଦିରରେ ଭକ୍ତଙ୍କୁ ଅର୍ପଣ କରାଯାଉଥିବା ପ୍ରସାଦର ଗୁଣବତ୍ତା ପରୀକ୍ଷା ପାଇଁ ଦାବି ଉଠିଛି। ଅଯୋଧ୍ୟାର ଅନ୍ୟତମ ପ୍ରସିଦ୍ଧ ମନ୍ଦିର ହନୁମାନ ଗଡ଼ୀ ମନ୍ଦିରରେ କେବଳ ଦେଶୀ ଘିଅରେ ପ୍ରସ୍ତୁତ ଲଡୁ ପ୍ରସାଦ ରୂପେ ଅର୍ପଣ କରାଯାଉଥିବା କର୍ତ୍ତୃପକ୍ଷ କହିଛନ୍ତି। ଆମେ କେବଳ ବ୍ରାଣ୍ଡେଡ କମ୍ପାନିର ଘିଅ ବ୍ୟବହାର କରୁ ଏବଂ ସମୟ ସମୟରେ ଘିଅର ଶୁଦ୍ଧତା ମଧ୍ୟ ଯାଞ୍ଚ କରାଯାଏ ବୋଲି କହିଛନ୍ତି ସଂକଟ ମୋଚନ ସେନାର ସଭାପତି ସଞ୍ଜୟ ଦାସ। ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁଙ୍କ ଅଭିଯୋଗ ପରେ ବିବାଦ ସୃଷ୍ଟି ହୋଇଥିଲା। ତାଙ୍କ ଅଭିଯୋଗ ଅନୁସାରେ ପୂର୍ବ ୱାଇଏସ୍‌ଆର୍‌ସିପି ଶାସନ ସମୟରେ ତିରୁପତି ମନ୍ଦିରରେ ପ୍ରସାଦ ଭାବରେ ପରିବେଷିତ ଲଡୁରୁ ପଶୁ ଚର୍ବି ଓ ମାଛ ତେଲ ମିଳିଥିଲା।  ଏକ ଲ୍ୟାବ୍ ରିପୋର୍ଟକୁ ଉଦାହରଣ ଦେଇ ନାଇଡୁ ଏଭଳି ଦାବି କରିଥିଲେ।

ତିରୁପତି ମନ୍ଦିରକୁ ଘିଅ ଯୋଗାଣ କରି ନଥିବା କହିଲା ଅମୁଲ
ସୁରତ: ତିରୁପତି ଲଡୁ ତିଆରିରେ ପଶୁ ଚର୍ବି ବ୍ୟବହାରକୁ ନେଇ ବିବାଦ ଲାଗି ରହିଥିବା ବେଳେ ଭାରତୀୟ ଦୁଗ୍ଧ ବ୍ରାଣ୍ଡ ଅମୁଲ ଏକ ସ୍ପଷ୍ଟୀକରଣ ଜାରି କରି କହିଛି ଯେ ଆମେ ତିରୁମାଲା ତିରୁପତି ଦେବସ୍ଥାନମ୍ (ଟିଟିଡି)କୁ ଘିଅ ଯୋଗାଣ କରିନାହୁଁ। ସୋସିଆଲ ମିଡିଆ ପୋଷ୍ଟରେ ଅମୁଲ ମନ୍ଦିରକୁ ଘିଅ ଯୋଗାଣ କରିଥିବା ଦାବି ହେବା ପରେ ଭାରତୀୟ ଡାଏରୀ ବ୍ରାଣ୍ଡ ଏହି ସ୍ପଷ୍ଟୀକରଣ ଦେଇଛି। ଅମୁଲ ଏକ ସ୍ପଷ୍ଟୀକରଣ ଦେଇ ଆହୁରି କହିଛି, ଆମର ଅତ୍ୟାଧୁନିକ ଉତ୍ପାଦନ କେନ୍ଦ୍ରରେ ଅମୁଲ ଘିଅ ଶୁଦ୍ଧ କ୍ଷୀରରୁ ପ୍ରସ୍ତୁତ ହୋଇଥାଏ, ଯାହା କି ଆଇଏସ୍‌ଓ ପ୍ରମାଣିତ।