ଆଉ ଏକ ସୀମା ପାର ପ୍ରେମ କାହାଣୀ: କୋଲକାତା ବାସିନ୍ଦାଙ୍କୁ ଜାନୁଆରିରେ ବାହାହେବେ ପାକ୍ ମହିଳା

କୋଲକାତା: ମଙ୍ଗଳବାର ପାକିସ୍ତାନରୁ ଅମୃତସରର ଅଟାରି-ୱାଘା ସୀମା ଦେଇ ଭାରତ ଆସିଥିବା ଜାଭେରିଆ ଖାନୁମ୍ ତାଙ୍କ ପ୍ରେମ କାହାଣୀ ପୂରା କରିବାକୁ କୋଲକାତାରେ ଅପେକ୍ଷା କରିଛନ୍ତି। ଆସନ୍ତା ଜାନୁଆରି ମାସରେ କୋଲକାତା ବାସିନ୍ଦା ସମୀର ଖାନଙ୍କୁ ସେ ବିବାହ କରିବାକୁ ଯାଉଛନ୍ତି। ସମୀର ପାଞ୍ଚବର୍ଷ ତଳେ ଜର୍ମାନୀରୁ କୋଲକାତା ଫେରିବା ପରେ ତାଙ୍କ ମା’ଙ୍କ ଫୋନରେ ଖାନୁମଙ୍କ ଫଟୋ ଦେଖିଥିଲେ। ଏହା ତାଙ୍କ ପାଇଁ ପ୍ରଥମ ଦେଖାରେ ଭଲ ପାଇବା ଥିଲା। ସେ ତାଙ୍କ ମା’ଙ୍କୁ କହିଥିଲେ ଯେ ସେ ଖାନୁମଙ୍କୁ ବିବାହ କରିବାକୁ ଚାହୁଛନ୍ତି। ସମୀରଙ୍କ ମା’ ପାକିସ୍ତାନର ଡେରା ଇସ୍ମାଇଲରେ ରହୁଥିବା ଜାଭେରିଆଙ୍କ ମା’ଙ୍କୁ ଏହି ପ୍ରସ୍ତାବ ପଠାଇଥିଲେ ଏବଂ ଉଭୟ ପରିବାର ରାଜି ହୋଇଥିଲେ। କିନ୍ତୁ ଏହି ପ୍ରେମ କାହାଣୀ ପାଇଁ ଆଗକୁ ରାସ୍ତା ସହଜ ନଥିଲା।
ଜାଭେରିଆ ଖାନୁମଙ୍କୁ ଭାରତ ଆସିବା ପାଇଁ ଭିସା ଲାଗି ଆବେଦନ କରିବାକୁ ପଡିଥିଲା।

ଭାରତୀୟ ହାଇକମିସନ ତାଙ୍କ ଆବେଦନକୁ ଦୁଇଥର ପ୍ରତ୍ୟାଖ୍ୟାନ କରିଥିଲେ। ପରେ ୨୦୨୦ରେ କୋଭିଡ୍ ମହାମାରୀ ସେମାନଙ୍କ କାହାଣୀର ଅଗ୍ରଗତିକୁ ଆହୁରି ବିଳମ୍ବିତ କରିଥିଲା। ନିରାଶ ହୋଇ ଜାଭେରିଆ ଖାନୁମ୍ ପୁଣି ଆବେଦନ କଲେ ଏବଂ ସେମାନଙ୍କ ପ୍ରେମ କାହାଣୀ ଭିସା ପାଇବାର ସବୁଠାରୁ କଠିନ ପରୀକ୍ଷାରେ ଉତ୍ତୀର୍ଣ୍ଣ ହେଲା। ମଙ୍ଗଳବାର ଅମୃତସରର ଅଟାରି-ୱାଘା ଛକ ଦେଇ ସେ ଭାରତ ଓ ପାକିସ୍ତାନ ମଧ୍ୟରେ ଥିବା ଅନ୍ତର୍ଜାତୀୟ ସୀମା ଅତିକ୍ରମ କରିଥିଲେ। ସୀମାରେ ସମୀର ତାଙ୍କ ପ୍ରେମିକାଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ କରିଥିଲେ। ତାଙ୍କ ବିବାହରେ ଜର୍ମାନୀ, ଆଫ୍ରିକା, ସ୍ପେନ୍, ଯୁକ୍ତରାଷ୍ଟ୍ର ଆମେରିକା ଏବଂ ଅନ୍ୟାନ୍ୟ ଦେଶର ବନ୍ଧୁମାନେ ଯୋଗ ଦେବେ ବୋଲି ସମୀର କହିଛନ୍ତି। ସାମ୍ବାଦିକମାନଙ୍କୁ ଜାଭେରିଆ କହିଛନ୍ତି, ଆମ ପରିବାର ବିବାହ ପାଇଁ ରାଜି ହୋଇଥିଲେ କିନ୍ତୁ ଆମେ ଭିସା ପାଇବାକୁ ଚେଷ୍ଟା କରୁଥିଲୁ। ମୋତେ ୪୫ ଦିନିଆ ଭିସା ପ୍ରଦାନ କରିଥିବାରୁ ମୁଁ ଭାରତ ସରକାରଙ୍କୁ ଧନ୍ୟବାଦ ଜଣାଉଛି। ଆମେ ଗତ ପାଞ୍ଚ ବର୍ଷ ଧରି ସମ୍ପର୍କରେ ଥିଲୁ। ଆସନ୍ତା ଜାନୁଆରିରେ ବିବାହ ହେବ ଏବଂ ତା’ପରେ ସେ ଭାରତର ନାଗରିକତ୍ବ ପାଇଁ ଆବେଦନ କରିବେ ବୋଲି କହିଛନ୍ତି।