ଦିଲ୍ଲୀରେ ହିଟ୍‌ ଆଣ୍ଡ୍‌ ରନ୍‌ର ଆଉ ଏକ ଭୟାନକ ଦୁର୍ଘଟଣା: ସ୍କୁଟି ଆରୋହୀ ଯୁବକଙ୍କୁ ୩୦୦ ମିଟର ଘୋଷାଡ଼ି ନେଲା କାର୍‌, ଜଣେ ମୃତ

ନୂଆଦିଲ୍ଲୀ: ଦିଲ୍ଲୀରେ ‘ହିଟ୍‌ ଆଣ୍ଡ୍‌ ରନ୍‌’ର ଆଉ ଏକ ଭୟାନକ ଘଟଣା ସାମ୍ନାକୁ ଆସିଛି। ଏହି ଦୁର୍ଘଟଣାରେ ଜଣେ ସ୍କୁଟି ଆରୋହୀଙ୍କ ମୃତ୍ୟୁ ହୋଇଥିବା ବେଳେ ଆଉ ଜଣେ ଗୁରୁତର ଆହତ ହୋଇଛନ୍ତି। ଦିଲ୍ଲୀ ପୁଲିସ ଏହି ମାମଲାରେ ଉଦ୍ଦେଶ୍ୟହୀନ ହତ୍ୟା ମାମଲା ରୁଜୁ କରିବା ସହ କାର୍‌ ଡ୍ରାଇଭର ସମେତ ୫ ଜଣଙ୍କୁ ଗିରଫ କରିଛି। ଏହି ଘଟଣାର ସିସିଟିଭି ଫୁଟେଜ ମଧ୍ୟ ଜାରି ହୋଇଛି ।

କହ୍ନେୟା ନଗର ଅଂଚଳରେ ଏକ ଟାଟା ଜେଷ୍ଟ୍‌ କାର୍‌ ଏକ ସ୍କୁଟିକୁ ପ୍ରଚଣ୍ଡ ଧକ୍କା ଦେବାପରେ ଜଣେ ଯୁବକ ଉପରକୁ ଉଠିଯାଇ କାର୍‌ର ଛାତରେ ପଡ଼ିଥିଲେ ଏବଂ ଅନ୍ୟ ଜଣେ ଯୁବକ କାର୍‌ର ୱିଣ୍ଡ୍‌ସ୍କ୍ରିନ୍‌ ଏବଂ ବନେଟ୍‌ ମଝିରେ ଲାଖି ଯାଇଥିଲେ। ଅନ୍ୟପକ୍ଷରେ ସ୍କୁଟିଟି କାରର ତଳ ବମ୍ପରରେ ଫସିଯାଇଥିଲା। ଘଟଣାସ୍ଥଳରେ ହିଁ ଜଣେ ସ୍କୁଟି ଆରୋହୀଙ୍କ ମୃତ୍ୟୁ ହୋଇଥିବା ବେଳେ ବନେଟରେ ଲାଖିଯାଇଥିବା ଅନ୍ୟ ଜଣେ ଯୁବକକୁ କାର୍‌ଟି ପ୍ରାୟ ୩୦୦ ମିଟର ପର୍ଯ୍ୟନ୍ତ ଘୋଷାଡ଼ି ନେଇଥିଲା। ପାଟ୍ରୋଲିଂ କରୁଥିବା ସ୍ଥାନୀୟ ପୁଲିସ ଏହା ଦେଖି କାର୍‌ ଚାଳକକୁ ଅଟକାଇବା ସହ ସମସ୍ତ ଅଭିଯୁକ୍ତଙ୍କୁ ଗିରଫ କରିଛି। ଆହତ ଯୁବକଙ୍କ ଅବସ୍ଥା ସଙ୍କଟାପନ୍ନ ରହିଛି।