୩ଟି ରାଜ୍ୟର ୬୦ଟି ସ୍ଥାନରେ ସନ୍ଦିଗ୍ଧ ‘ଆଇଏସ୍‌ଆଇଏସ୍‌’ ସମର୍ଥକଙ୍କ ଉପରେ ‘ଏନ୍‌ଆଇଏ’ ଚଢ଼ଉ

ବେଙ୍ଗାଲୁରୁ: ନିଷିଦ୍ଧ ଆତଙ୍କବାଦୀ ସଙ୍ଗଠନ ‘ଆଇଏସ୍‌ଆଇଏସ୍‌’ ସହିତ ସମ୍ପୃକ୍ତି ଥିବା ସନ୍ଦେହରେ ‘ନ୍ୟାସ୍‌ନାଲ୍‌ ଇନ୍‌ଭେଷ୍ଟିଗେସନ୍‌ ଏଜେନ୍‌ସି’ (ଏନ୍‌ଆଇଏ) ସମଗ୍ର କର୍ଣ୍ଣାଟକ, ତାମିଲନାଡୁ ଏବଂ କେରଳର ପ୍ରାୟ ୬୦ଟି ସ୍ଥାନରେ ଚଢ଼ଉ କରିଥିବା କଥା ବିଶେଷସୂତ୍ରରୁ ଜଣାପଡ଼ିଛି।

ଗତବର୍ଷ ତାମିଲନାଡୁର କୋଇମ୍ବାଟୁର୍‌ ଏବଂ କର୍ଣ୍ଣାଟକର ମାଙ୍ଗାଲୁରୁରେ ହୋଇଥିବା ବିସ୍ଫୋରଣ ଘଟଣାରେ ଜଡ଼ିତ ଥିବା ମାମଲାରେ ଏହି ଚଢ଼ଉ ଓ ତଲାସ ଚାଲିଥିବା କଥା ଜଣାପଡ଼ିଛି।

ପୁଲିସ କହିବା ଅନୁସାରେ, ଗତବର୍ଷ ଅକ୍ଟୋବର ମାସରେ କ‌ୋଇମ୍ବାଟୁର୍‌ରେ ହୋଇଥିବା ବିସ୍ଫୋରଣରେ ଜାମେଜା ମୁବିନ୍‌ ନାମରେ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଥିଲା। ‘ଆଇଏସ୍‌ଆଇଏସ୍‌’ ସହିତ ସମ୍ପୃକ୍ତି ଅଭିଯୋଗରେ ମୁବିନ୍‌ଙ୍କୁ ପୁଲିସ ୨୦୧୯ରେ ପଚାର ଉଚରା କରିଥିଲା।

କେରଳରେ ୫ଟି ସ୍ଥାନରେ ଓ କର୍ଣ୍ଣାଟକର କେତେକ ସ୍ଥାନ ସମେତ ତାମିଲ୍‌ନାଡୁର ଚେନ୍ନାଇରେ ୩୫ଟି ସ୍ଥାନରେ ‘ଏନ୍‌ଏଆଇ’ ଚଢଉ ଜାରି ରଖିଥିବା କଥା ଉପରୋକ୍ତ ସୂତ୍ରରୁ ଜଣାପଡ଼ିଛି।

Image Courtesy of ANI

ଆତଙ୍କବାଦୀ ଭାବେ ଦୀକ୍ଷିତ ହୋଇଛନ୍ତି ବୋଲି କୁହାଯାଉଥିବା ସନ୍ଦିଗ୍ଧ ‘ଆଇଏସ୍‌ଆଇଏସ୍‌’ ସମର୍ଥକଙ୍କ ବିରୋଧରେ ‘ଏନ୍‌ଆଇଏ’ ଚଢ଼ଉ କରୁଛି। ଉପରୋକ୍ତ ଦୁଇ ବିସ୍ଫୋରଣ ଘଟଣାରେ ସେମାନଙ୍କର କିଛି ଯୋଗସୂତ୍ର ଥାଇପାରେ ବୋଲି କୁହାଯାଉଛି।

କୋଇମ୍ବାଟୁର୍‌ କାର୍‌ ସିଲିଣ୍ଡର୍‌ ବିସ୍ଫୋରଣ ଘଟଣା ଲାଗି ‘ନ୍ୟାସ୍‌ନାଲ୍‌ ଇନ୍‌ଭେଷ୍ଟିଗେସନ୍‌ ଏଜେନ୍‌ସି’ କୋଇମ୍ବାଟୁର୍‌ ଏବଂ ମୈଲାଦୁତୁରାଇରେ ଚଢଉ କରୁଥିବା କଥା ‘ଏଏନ୍‌ଆଇ’ ରିପୋର୍ଟ କରିଛି।

ସେହିପରି ତାମିଲନାଡୁର ଏକାଧିକ ଅଞ୍ଚଳରେ ମଧ୍ୟ ଚଢ଼ଉ ଜାରି ଥିବା କଥା ‘ଏଏନ୍‌ଆଇ’ କହିଛି।