କୋଲ୍କାତା: ୨୦୨୦ ଗୋରୁ ଚୋରାଚାଲାଣ ମାମଲାରେ ଆଜି ‘ସିବିଆଇ’ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କର ଘନିଷ୍ଠ ସହଯୋଗୀ ତଥା ବୀରଭୂମ ଜିଲ୍ଲା ‘ଟିଏମ୍ସି’ ସଭାପତି ଅନୁବ୍ରତ ମଣ୍ଡଳଙ୍କୁ ତାଙ୍କ ବାସଭବନରୁ ଗିରଫ କରିଥିଲା । ଆଉ ଏହି ମାମଲାରେ ଅଧିକ ପଚରାଉଚୁରା କରିବା ପାଇଁ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଅନୁବ୍ରତଙ୍କୁ ୧୦ ଦିନିଆ ରିମାଣ୍ଡରେ ନେଇଛି | ସିବିଆଇ ଆଜି ଅନୁବ୍ରତ ମଣ୍ଡଳଙ୍କୁ ଆସାନସୋଲର ସ୍ୱତନ୍ତ୍ର ସିବିଆଇ କୋର୍ଟରେ ହାଜର କରିଥିଲା । ସିବିଆଇ ୧୪ ଦିନ ରିମାଣ୍ଡରେ ନେବାକୁ ଅନୁମତି ମାଗିଥିବାବେଳେ କୋର୍ଟ ୧୦ ଦିନ ରିମାଣ୍ଡ ପାଇଁ ଅନୁମତି ଦେଇଛନ୍ତି। ତେବେ ଆଜି କୋର୍ଟରେ ଅନୁବ୍ରତଙ୍କୁ ହାଜର କରାଯିବାବେଳେ ଲୋକଙ୍କ ମଧ୍ୟରେ କ୍ରୋଧ ମଧ୍ୟ ଦେଖିବାକୁ ମିଳିଥିଲା।
Sambad is now on WhatsApp
Join and get latest news updates delivered to you via WhatsApp
କୋର୍ଟ ନିକଟରେ ଜୋତା ଦେଖାଇ ଲୋକମାନେ ‘ଚୋର, ଚୋର’ ବୋଲି ସ୍ଲୋଗାନ ଦେଇଥିଲେ। ଆମେ ଆପଣଙ୍କୁ କହିବୁ ଯେ ଆଜି ସକାଳେ ସିବିଆଇର ଏକ ଟିମ୍ ଟିଏମସିର ବୀରଭୂମ ଜିଲ୍ଲା ସଭାପତି ମଣ୍ଡଳଙ୍କ ଘରେ ପହଞ୍ଚିଥିଲେ। ଏକ ଘଣ୍ଟା ଧରି ପଚରାଉଚରା ପରେ ସିବିଆଇ ମଣ୍ଡଳଙ୍କୁ ଗିରଫ କରିଥିଲା। ୨୦୨୦ରେ ‘ସିବିଆଇ’ ‘ଏଫ୍ଆଇଆର୍’ ପଞ୍ଜିକରଣ କରିବା ପରେ ଗୋରୁ ଚୋରା ଚାଲାଣ ଦୁର୍ନୀତିରେ ତାଙ୍କ ନାମ ଥିବା କଥା ଜଣାପଡ଼ିଥିଲା।
‘ସିବିଆଇ’ କହିବା ଅନୁସାରେ, ୨୦୧୫ରୁ ୨୦୧୭ ମଧ୍ୟରେ ସୀମାପାରିକୁ ଚୋରା ଚାଲାଣ ହେଉଥିବା ବେଳେ ସୀମା ସୁରକ୍ଷା ବଳ ୨୦,୦୦୦ରୁ ଅଧିକ ଗୋରୁ ଜବତ କରିଥିଲା | ଗୋରୁ ଚୋରାଚାଲାଣ ମାମଲରେ ସମ୍ପୃକ୍ତି ଥିବା ବିଷୟରେ ସୂଚନା ପାଇ ନିକଟ ଅତୀତରେ ‘ସିବିଆଇ’ ଜିଲ୍ଲାର ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ମଣ୍ଡଳଙ୍କ ଅଙ୍ଗରକ୍ଷୀ ସାଇଗଲ୍ ହୋସେନ୍ଙ୍କୁ ମଧ୍ୟ ‘ସିବିଆଇ’ ଗିରଫ କରିଥିଲା ।ତେବେ ଆଜି କୋର୍ଟରେ ସିବିଆଇ ଅଧିକାରୀ କହିଥିଲେ ଯେ, “ଗୋରୁ ଚୋରା ଚାଲାଣ ଘଟଣାର ତଦନ୍ତରେ ସହଯୋଗ କରୁନଥିବାରୁ ଆମେ ତାଙ୍କୁ ଗିରଫ କରିଛୁ। ଆମେ ଏହି ଘଟଣାରେ ମଣ୍ଡଳଙ୍କ ପ୍ରତ୍ୟକ୍ଷ ସମ୍ପୃକ୍ତି ପାଇଛୁ।