୨ ନୁହେଁ ୩ ! ଓଡ଼ିଆ କହିପାରୁଥିବା ଏହି ନେତା ବି ମୋଦୀ ମନ୍ତ୍ରୀମଣ୍ଡଳରେ ସାମିଲ
ନୂଆଦିଲ୍ଲୀ: ୩ ଜଣ ଓଡ଼ିଆ କହିପାରୁଥିବା ବ୍ୟକ୍ତି ମୋଦୀ ସରକାରଙ୍କ ମନ୍ତ୍ରୀମଣ୍ଡଳରେ ସାମିଲ ହୋଇଛନ୍ତି | ବାଲେଶ୍ୱର ସାଂସଦ ପ୍ରତାପ ଷଡ଼ଙ୍ଗୀ ଓ ଧର୍ମେନ୍ଦ୍ର ପ୍ରଧାନଙ୍କ ସହ ମୋଦୀଙ୍କ ମନ୍ତ୍ରିମଣ୍ଡଳରେ ଏଭଳି ଜଣେ ନେତା ସାମିଲ ଅଛନ୍ତି ଯିଏ କି ସ୍ପଷ୍ଟ ଭାବେ ଓଡ଼ିଆ ଭାଷାରେ କଥା କୁହନ୍ତି | ସେ ହେଉଛନ୍ତି ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଅର୍ଜୁନ ମୁଣ୍ଡା | ଅର୍ଜୁନ ଏଥର ଖୁଣ୍ଟି ଲୋକସଭା ନିର୍ବାଚନମଣ୍ଡଳୀରୁ ସାଂସଦ ଭାବେ ନିର୍ବାଚିତ ହୋଇଛନ୍ତି |
Sambad is now on WhatsApp
Join and get latest news updates delivered to you via WhatsApp
କଡା ମୁକାବିଲାରେ ଅର୍ଜୁନ ମୁଣ୍ଡା ତାଙ୍କର ପ୍ରତିଦ୍ବନ୍ଦୀ ପ୍ରାର୍ଥୀ କଂଗ୍ରେସର କାଳିଚରଣ ମୁଣ୍ଡାଙ୍କୁ ୧୪୪୫ ଖଣ୍ଡ ଭୋଟ ରେ ହରାଇଛନ୍ତି | ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଅର୍ଜୁନ ମୁଣ୍ଡା ରାଉରକେଲାରେ ମଧ୍ୟ ପାଠ ପଢ଼ିଛନ୍ତି | ଓଡିଶା ପ୍ରତି ତାଙ୍କର ଭଲ ପାଇବା ତାଙ୍କ ଓଡ଼ିଆ ଭାଷାରୁ ସ୍ପଷ୍ଟ ଭାବେ ଜଣାପଡେ | ନିଜର ରାଜନୈତିକ କ୍ୟାରିୟର ସେ ୧୯୯୫ ମସିହାରେ ସେ ଖରସୁଆଁରୁ ଆରମ୍ଭ କରିଥିଲେ | ଖରସୁଆଁ ବିଧାନସଭା ଆସନ ତିନି ଥର ଜିତିଥିଲେ | ସବୁଠାରୁ କମ ବୟସରେ ମୁଖ୍ୟମନ୍ତ୍ରୀ ହେବାର ରେକର୍ଡ ଅର୍ଜୁନଙ୍କ ନାମରେ ରହିଛି |
୩୫ ବର୍ଷ ବୟସରେ ସେ ମୁଖ୍ୟମନ୍ତ୍ରୀ ପଦ ସମ୍ଭାଳିଥିଲେ | ଏବେ ଅର୍ଜୁନ ଭାରତୀୟ ଜନତା ପାର୍ଟିର ଜଣେ ପ୍ରମୁଖ ଚେହେରା | ରାଷ୍ଟ୍ରୀୟ ମହାସଚିବ ଭାବେ ଏବେ ଅବସ୍ଥାପିତ ଥିବା ଅର୍ଜୁନଙ୍କର ଓଡିଶାର ସୁନ୍ଦରଗଡ଼ ଜିଲ୍ଲା ସହ ରହିଛି ଘନିଷ୍ଠ ସମ୍ପର୍କ | କାରଣ ତାଙ୍କ ନିର୍ବାଚନମଣ୍ଡଳୀର ପ୍ରାୟ ଅଂଚଳ ଯେପରିକି ସିମଡେଗା ଓ କୋଲେବୀରା ଓଡିଶା ସୀମାରେ ଅବସ୍ଥିତ | ତେବେ ଏଠାରେ କହିରଖୁଛୁ କେବଳ ଓଡ଼ିଆ ନୁହେଁ ଉତ୍ତର ଓଡ଼ିଶାରେ ବ୍ୟବହାର କରାଯାଉଥିବା ସାନ୍ତାଳୀ,ହୋ ଓ ଓରାନ ଭାଷା ମଧ୍ୟ ଅର୍ଜୁନ କହିପାରନ୍ତି |