ସେନାକୁ ମିଳିଲା ପ୍ରଥମ ମହିଳା ସୁବେଦାର

ନୂଆଦିଲ୍ଲୀ: ଚମ୍ପିଆନ୍‌ ଟ୍ରାପ୍‌ ସୁଟର ହାବିଲଦାର ପ୍ରୀତି ରଜକ ରବିବାର ପଦୋନ୍ନତି ପାଇବା ପରେ ଭାରତୀୟ ସେନାରେ ସୁବେଦାର ପାହ୍ୟାରେ ନିଯୁକ୍ତି ପାଇବାରେ ଦେଶର ପ୍ରଥମ ମହିଳା ହୋଇଛନ୍ତି। ସୁବେଦାର ରଜକ ଡିସେମ୍ବର ୨୦୨୨ରେ ସେନାରେ ଯୋଗ ଦେଇଥିଲେ। ତେବେ, ଆଜି ଟ୍ରାପ୍‌ ସୁଟର ହାବିଲଦାର ପ୍ରୀତି ରଜକଙ୍କୁ ସୁବେଦାର ପାହ୍ୟାକୁ ପଦୋନ୍ନତି ମିଳିବା ଘଟଣା ଭାରତୀୟ ସେନା ଓ ଦେଶର ମହିଳାଙ୍କ ପାଇଁ ଏକ ଗୌରବର ମୁହୂର୍ତ୍ତ ଆଣିଛି।

ସୁବେଦାର ପ୍ରୀତି ରଜକ ହେଉଛନ୍ତି ଭାରତୀୟ ସେନାର ପ୍ରଥମ ମହିଳା ସୁବେଦାର। ତାଙ୍କର ଏହି ସଫଳତା ନାରୀ ଶକ୍ତିର ଏକ ଅସାଧାରଣ ପ୍ରଦର୍ଶନ।

୨୦୨୨ ଡିସେମ୍ବର ୨୨ ତାରିଖରେ ସୁବେଦାର ପ୍ରୀତି ରଜକ ମିଲିଟାରି ପୁଲିସ କର୍ପସରେ ସେନାରେ ଯୋଗ ଦେଇଥିଲେ। ସେ ସେନାରେ ହାବିଲଦାର ଭାବେ ନାମ ଲେଖାଇଥିବା ସୁୁଟିଂ ଶୃଙ୍ଖଳାର ପ୍ରଥମ ମେଧାବୀ କ୍ରୀଡ଼ାବିତ୍‌ ଥିଲେ। ଚାଇନାର ହାଙ୍ଗଜୋ ଠାରେ ଅନୁଷ୍ଠିତ ୧୯ତମ ଏସୀୟ କ୍ରୀଡ଼ାରେ ରଜକ ଟ୍ରାପ୍‌ ମହିଳା ଦଳଗତ ଇଭେଣ୍ଟରେ ରୌପ୍ୟ ପଦକ ଜିତିଥିଲେ।

ତାଙ୍କର ଅସାଧାରଣ ପ୍ରଦର୍ଶନକୁ ଆଧାର କରି ତାଙ୍କୁ ସୁବେଦାର ପଦବୀକୁ ପ୍ରଥମ ପଦୋନ୍ନତି ପ୍ରଦାନ କରାଯାଇଛି ବୋଲି ସେନା ପକ୍ଷରୁ କୁହାଯାଇଛି। ସୁବେଦାର ରଜକ ବର୍ତ୍ତମାନ ଭାରତରେ ଷଷ୍ଠ ସ୍ଥାନରେ ଅଛନ୍ତି (ଟ୍ରାପ୍‌ ମହିଳା ଇଭେଣ୍ଟ) ଏବଂ ପ୍ୟାରିସ୍‌ ଅଲିମ୍ପିକ୍‌ କ୍ରୀଡ଼ା ୨୦୨୪ ପାଇଁ ପ୍ରସ୍ତୁତି ପାଇଁ ଆର୍ମି ମାର୍କସମ୍ୟାନ୍‌ସିପ୍‌ ୟୁନିଟ୍‌ (ଏଏମୟୁ)ରେ ଅଭ୍ୟାସ କରୁଛନ୍ତି। ତାଙ୍କର ଏହି ବିରଳ ସଫଳତା ଯୁବତୀମାନଙ୍କୁ ଭାରତୀୟ ସେନାରେ ଯୋଗଦେବା ପାଇଁ ଆଗେଇ ଆସିବା ସହ ପେସାଦାର ସୁଟିଂରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିବାକୁ ପ୍ରେରଣା ଯୋଗାଇବ ବୋଲି ସେନା କହିଛି।

ଆଜି ପଦ୍ମଶ୍ରୀ ଓ ଅର୍ଜୁନ ପୁରସ୍କାର ପ୍ରାପ୍ତ ସୁବେଦାର ମେଜର ତଥା ସମ୍ମାନିତ ଲେଫ୍‌ଟନାଣ୍ଟ ଜିତୁ ରାୟଙ୍କୁ ତାଙ୍କର ଉଲ୍ଲେଖନୀୟ ସେବା ପାଇଁ ସୁବେଦାର ମେଜର ଏବଂ ସମ୍ମାନଜନକ କ୍ୟାପଟେନ୍‌ ପାହ୍ୟାକୁ ପଦୋନ୍ନତି ମିଳିଛି।