ଇସଲାମାବାଦ: ପାକିସ୍ତାନ ରାଜନୀତିରେ ଘଡ଼ିକେ ଘୋଡ଼ା ଛୁଟୁଛି। ଚର୍ଚ୍ଚା ହେଉଛି ଯେ ରାଷ୍ଟ୍ରପତି ଆସିଫ୍ ଅଲ୍ଲୀ ଜର୍ଦାରୀଙ୍କୁ ଖୁବ୍‌ଶୀଘ୍ର ଇସ୍ତଫା ଦେବାକୁ କୁହାଯାଇପାରେ ଏବଂ ତାଙ୍କ ସ୍ଥାନରେ ସେନାମୁଖ୍ୟ ଫିଲ୍ଡ ମାର୍ଶାଲ ଅସୀମ ମୁନିରଙ୍କୁ ଦାୟିତ୍ୱ ଦିଆଯାଇପାରେ। ଏଥି ସହ ବିଲାୱଲ ଭୁଟ୍ଟୋଙ୍କୁ ପ୍ରଧାନମନ୍ତ୍ରୀ କରାଯିବା ନେଇ ଚର୍ଚ୍ଚା ଚାଲିଛି। ପାକିସ୍ତାନରେ ଥିବା ସଂସଦୀୟ ବ୍ୟବସ୍ଥା ବଦଳରେ ପାକ୍ ସେନା ସମର୍ଥନରେ ରାଷ୍ଟ୍ରପତି ବ୍ୟବସ୍ଥା ଲାଗୁ କରିବାକୁ ମଧ୍ୟ ପ୍ରସ୍ତୁତି ଚାଲିଛି।   ତେବେ ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ପାକିସ୍ତାନ ମୁସଲିମ୍ ଲିଗ୍-ନୱାଜ୍ (ପିଏମ୍ଏଲ୍ଏନ୍) ସେନାମୁଖ୍ୟ ମୁନିର ଓ ଜର୍ଦାରୀଙ୍କ ମଧ୍ୟରେ ବଢ଼ୁଥିବା ସମୀକରଣକୁ ବିରୋଧ କରିବା ଆରମ୍ଭ କରିଛି। ବର୍ତ୍ତମାନର ପ୍ରଧାନମନ୍ତ୍ରୀ ଶେହବାଜ ସରିଫ୍ ଓ ତାଙ୍କ ପିଏମ୍‌ଏଲ୍‌ଏନ୍‌ ଦଳ ସମ୍ଭାବ୍ୟ ପରିବର୍ତ୍ତନକୁ ବିରୋଧ କରୁଛନ୍ତି। ସେମାନେ ଆଶଙ୍କା କରୁଛନ୍ତି ଯେ ରାଷ୍ଟ୍ରପତି ବ୍ୟବସ୍ଥା ଆସିଲେ କେବଳ ଶେହବାଜଙ୍କୁ ପ୍ରଧାନମନ୍ତ୍ରୀ ପଦରୁ ହଟାଯିବ ନାହିଁ, ବରଂ ପିଏମ୍‌ଏଲ୍‌ଏନ୍‌ ଓ ସରିଫ ପରିବାର ମଧ୍ୟ ପାକିସ୍ତାନ ରାଜନୀତିରେ ନିଜର ପ୍ରାସଙ୍ଗିକତା ହରାଇବେ। ତେଣୁ ବିଲାୱଲଙ୍କ ଉତ୍‌ଥାନକୁ ରୋକିବା ପାଇଁ ପିଏମ୍‌ଏଲ୍‌ଏନ୍‌ ପାକିସ୍ତାନ ସେନାର ବିଭିନ୍ନ ଗୋଷ୍ଠୀ ସହ ଯୋଗାଯୋଗରେ ରହିଛି। ପାକିସ୍ତାନ ପିପୁଲ୍ସ ପାର୍ଟି (ପିପିପି) ନେତା ଆସିଫ୍ ଅଲ୍ଲୀ ଜର୍ଦାରୀଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବା ଆଧାରରେ ତାଙ୍କ ଇସ୍ତଫାକୁ ନେଇ ଚର୍ଚ୍ଚା ଜୋର ଧରିଛି। ମିଳିଥିବା ସୂଚନା ଅନୁଯାୟୀ, ଜର୍ଦାରୀ ସର୍ତ୍ତ ରଖିଛନ୍ତି ଯେ ଯଦି ବିଲାୱଲ ଭୁଟ୍ଟୋ ଜର୍ଦାରୀଙ୍କୁ ଏକ ବଡ଼ ପଦବି ମିଳେ, ତା’ହେଲେ ସେ ଇସ୍ତଫା ଦେବାକୁ ପ୍ରସ୍ତୁତ।  

Advertisment

ସମ୍ବିଧାନ ସଂଶୋଧନ କରିପାରନ୍ତି ସେନାମୁଖ୍ୟ ମୁନିର
ପାକିସ୍ତାନ ସଂସଦ, ନ୍ୟାୟପାଳିକା ଓ ବୈଦେଶିକ ନୀତିରେ ମଧ୍ୟ ସେନାମୁଖ୍ୟ ମୁନିରଙ୍କ ହସ୍ତକ୍ଷେପ ଦେଖିବାକୁ ମିଳୁଛି। ୱାସିଂଟନ, ରିୟାଦ ଓ ବେଜିଂ ଭଳି ସ୍ଥାନକୁ ତାଙ୍କର ହାଇପ୍ରୋଫାଇଲ କୂଟନୈତିକ ଗସ୍ତ ପ୍ରମାଣ କରୁଛି ଯେ ତାଙ୍କୁ ପାକିସ୍ତାନର ‘ସ୍ଥିରତାର ଦୂତ’ ଭାବରେ ବିବେଚନା କରାଯାଏ। ବିଶ୍ଳେଷକଙ୍କ ମତରେ ଅସୀମ ମୁନିର ରାଷ୍ଟ୍ରପତି ହୋଇ ପ୍ରତୀକାତ୍ମକ ପଦରେ ରହିବାକୁ ଚାହୁନାହାନ୍ତି, ବରଂ ପାକିସ୍ତାନର ସମଗ୍ର ରାଜନୈତିକ ବ୍ୟବସ୍ଥାକୁ ବଦଳାଇବାକୁ ଚାହୁଛନ୍ତି।   
ଅତୀତରେ ୩ ଜଣ ସେନା ମୁଖ୍ୟ ରାଷ୍ଟ୍ରପତି ହୋଇଛନ୍ତି
ଅତୀତରେ ପାକିସ୍ତାନରେ ତିନିଜଣ ସେନାମୁଖ୍ୟ ପରବର୍ତ୍ତୀ ସମୟରେ ଦେଶର ରାଷ୍ଟ୍ରପତି ହୋଇଥିବା ନଜିର ରହିଛି। ସେମାନେ ହେଉଛନ୍ତି, ଆୟୁବ ଖାନ୍ (୧୯୫୮-୬୯), ଜିଆ-ଉଲ୍-ହକ୍ (୧୯୭୮-୮୮) ଓ ପରଭେଜ ମୁସାରଫ (୨୦୦୧-୦୮)। ତେବେ ବିଦ୍ରୋହ ପରେ ହିଁ ତିନିଜଣ ରାଷ୍ଟ୍ରପତି ପଦରେ ପହଞ୍ଚିଥିଲେ। ପାକିସ୍ତାନରେ କୌଣସି ପ୍ରଧାନମନ୍ତ୍ରୀ ଆଜି ପର୍ଯ୍ୟନ୍ତ ପାଞ୍ଚବର୍ଷର କାର୍ଯ୍ୟକାଳ ପୂରଣ କରିବାରେ ସକ୍ଷମ ହୋଇନାହାନ୍ତି।