ଗଲଓ୍ବାନ ସଂଘର୍ଷର ଅଜଣା କଥା : ଚୀନ ସୈନ୍ୟଙ୍କ ଚିକିତ୍ସା କରିଥିବା ଭାରତୀୟ ସେନା ଡାକ୍ତରଙ୍କୁ ଅପହରଣ ଓ ହତ୍ୟା କରିଥିଲା ପିଏଲଏ
ନୂଆଦିଲ୍ଲୀ : ୨୦୨୦ ଜୁନ ମାସରେ ହୋଇଥିବା ଗଲଓ୍ବାନ ସଂଘର୍ଷ ସଂପର୍କରେ କେତେକ ନୂଆ କଥା ଜଣାପଡ଼ିଛି । ଦୁଇ ସାମ୍ବାଦିକ ଶିବ ଅରୁର ଓ ରାହୁଲ ସିଂହଙ୍କ ଦ୍ବାରା ଲିଖିତ ଏକ ନୂଆ ବହି ‘ଇଣ୍ଡିଆସ ମୋଷ୍ଟ ଫିଅରଲେସ-୩’ ରେ ଭାରତୀୟ ସେନାର ବୀରତ୍ବ ଓ ଚୀନ ସେନାର ବର୍ବରତା ସଂପର୍କରେ କେତେକ ନୂଆ ଘଟଣାର ଅବତାରଣା କରାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଏହି ପୁସ୍ତକରେ କୁହାଯାଇଛି ଯେ, ୨୦୨୦ ଜୁନ ୧୫ ରାତିରେ ଭାରତୀୟ ସେନା ଲଢିଥିଲା ଏକ ଅତ୍ୟନ୍ତ କଠିନ ସଂଘର୍ଷ । ଭାରତୀୟ ସେନା ସଂଖ୍ୟା ୪୦୦ରୁ କମ ଥିବାବେଳେ ଚୀନ ସେନା ସଂଖ୍ୟା ଥିଲା ତାହାର ୩ ଗୁଣ । ଏହା ସହିତ ଚୀନ ସେନା ପାଖରେ ଥିଲା କେତେକ ଅତ୍ୟାଧୁନିକ ଉପକରଣ ଓ ଉଜ୍ଜଳ ଫ୍ଲାସ ଲାଇଟ୍ ଓ ଲେଜର ଲାଇଟ । ଏଗୁଡ଼ିକୁ ବ୍ୟବହାର କରି ସେମାନେ ଭାରତୀୟ ଯବାନଙ୍କୁ କିଛି ସମୟ ପାଇଁ ଅନ୍ଧପ୍ରାୟ କରିଦେଉଥିଲେ । ଏହା ସତ୍ତ୍ବେ ଭାରତୀୟ ସେନା ଅତ୍ୟନ୍ତ ବୀରତ୍ବର ସହ ଲଢିଥିଲା ଓ ଚୀନ ସେନାକୁ ପଛଘୁଞ୍ଚା କରିବାକୁ ବାଧ୍ୟ କରିଥିଲା । ଏହି ସଂଘର୍ଷରେ ଭାରତୀୟ ସେନାର୨୦ ଯବାନ ବୀରଗତି ପ୍ରାପ୍ତ ହୋଇଥିବାବେଳେ ଚୀନର ମାତ୍ର ୪ ଜଣ ମରିଥିଲେ ବୋଲି ଚୀନ ସରକାର କହିଥିଲେ । କିନ୍ତୁ ପ୍ରକୃତରେ ଚୀନ ସେନାର ମୃତାହତଙ୍କ ସଂଖ୍ୟା ବହୁ ଅଧିକ ହୋଇଥିଲା । ଏତେ ସଂଖ୍ୟକ ଚୀନ ସୈନ୍ୟ ମରିଥିଲେ ଯେ, ସେମାନଙ୍କ ରକ୍ତରେ ଉକ୍ତ ଅଂଚଳ ଲାଲ ହୋଇଯାଇଥିଲେ ।
ଏହି ସଂଘର୍ଷରେ ଆହତ ଭାରତୀୟ ସେନାଙ୍କ ଚିକିତ୍ସା କରୁଥିଲେ ସେନା ଡାକ୍ତର ନାଏକ ଦୀପକ ସିଂ । ସେ କେବଳ ଆହତ ଭାରତୀୟ ସୈନିକଙ୍କ ଚିକିତ୍ସା କରୁନଥିଲେ, ବରଂ ନିଜର ଡାକ୍ତର ଧର୍ମକୁ ପାଳନ କରିବାକୁ ଯାଇ ଆହତ ଚୀନ ସୈନ୍ୟଙ୍କୁ ମଧ୍ୟ ଚିକିତ୍ସା କରୁଥିଲେ । ଅନେକ ଚୀନ ସୈନ୍ୟଙ୍କ ମୃତଦେହ ଓ କେତେକ ଆହତ ଚୀନ ସୈନ୍ୟ ଭାରତୀୟ ସେନା କବଜାରେ ଥିଲେ । ଏହା ସତ୍ତ୍ବେ ଭାରତୀୟ ସେନା ଚୀନ ସୈନ୍ୟଙ୍କ ମୃତଦେହକୁ ଛୁଇଁନଥିଲେ । ଏହା ସହିତ ଦୀପକ ସିଂ ଆହତ ଚୀନ ସୈନ୍ୟଙ୍କ ମଧ୍ୟ ଚିକିତ୍ସା କରୁଥିଲେ । ଏହି ସମୟରେ ବିପୁଳ ସଂଖ୍ୟକ ଚୀନ ସୈନ୍ୟ ଆସି ତାଙ୍କୁ ଅପହରଣ କରିନେଇଥିଲେ ଓ ନିଜ ଆହତ ଯବାନଙ୍କ ଚିକିତ୍ସା କରାଇଥିଲେ । ସେଠାରେ ମଧ୍ୟ ସେ ନିଜର ଡାକ୍ତର ଧର୍ମକୁ ପାଳନ କରିଥିଲେ । କିନ୍ତୁ ନିଜର ଅସଲ ସ୍ବରୂପ ଦେଖାଇ, ଚୀନ ସୈନ୍ୟମାନେ ତାଙ୍କୁ ନିର୍ମମଭାବେ ହତ୍ୟା କରିଥିଲେ ।