ନୂଆଦିଲ୍ଲୀ : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଅଧ୍ୟକ୍ଷତାରେ ମଙ୍ଗଳବାର ବସିଥିବା ପ୍ରତିରକ୍ଷା କ୍ରୟ ପରିଷଦ (ଡିଏସି) ବୈଠକରେ ଭାରତୀୟ ସେନା ନିମନ୍ତେ ୧୧୮ଟି ଅର୍ଜୁନ ମାର୍କ ୧ଏ ଯୁଦ୍ଧ ଟ୍ୟାଙ୍କ ଖରିଦକୁ ଅନୁମୋଦନ ଦିଆଯାଇଛି । ଏଗୁଡ଼ିକର ମୋଟ ମୂଲ୍ୟ ପ୍ରାୟ ୬ ହଜାର କୋଟି ଟଙ୍କା ରହିବା ଅଟକଳ କରାଯାଉଛି ।
Sambad is now on WhatsApp
Join and get latest news updates delivered to you via WhatsApp
ପ୍ରତିରକ୍ଷା ମନ୍ତ୍ରାଳୟ ସୁତ୍ରରୁ ଜଣାପଡ଼ିଛି ଯେ ଡିଆରଡିଓ ଦ୍ବାରା ନିର୍ମିତ ଏସବୁ ଟ୍ୟାଙ୍କଗୁଡ଼ିକ ଚୁକ୍ତି ହେବାର ୩୦ ମାସ ମଧ୍ୟରେ ସେନାକୁ ହସ୍ତାନ୍ତର କରାଯିବ । ଏସବୁ ଟ୍ୟାଙ୍କଗୁଡ଼ିକର ଓଜନ ପ୍ରାୟ ୫୮ ଟନ ଓ ଏଗୁଡ଼ିକ ବିଭିନ୍ନ ପରିବେଶରେ ଘାତକ ପ୍ରଦର୍ଶନ କରିବାର କ୍ଷମତା ରଖନ୍ତି ।
ଆଜିର ବୈଠକରେ ଟ୍ୟାଙ୍କ ବିଧ୍ବଂସୀ ନାଗ କ୍ଷେପଣାସ୍ତ୍ର ଓ ଆରୁଧ୍ରା ରାଡାର ଖରିଦ ପ୍ରସ୍ତାବକୁ ଅନୁମୋଦନ ମିଳିଛି । ଆହୁରି ମଧ୍ୟ ଭାରତୀୟ ନୌସେନା ନିମନ୍ତେ ୬ଟି ମିସାଇଲ ଭେସେଲ (କ୍ଷେପଣାନ୍ତ୍ର ସଜ୍ଜିତ ଜାହାଜ) ଖରିଦ ପ୍ରସ୍ତାବକୁ ଅନୁମୋଦନ ଦିଆଯାଇଥିଲା । ଏସବୁ ଜାହାଜକୁ କୋଚିନ ସିପୟାର୍ଡ ପକ୍ଷରୁ ନିର୍ମାଣ କରାଯିବ । ଏହି ଖରିଦ ପାଇଁ ନୌସେନା ପକ୍ଷରୁ ଜାରି ଟେଣ୍ଡରରେ କୋଚିନ ସିପୟାର୍ଡ ସର୍ବନିମ୍ନ ବିଡର ଘୋଷିତ ହୋଇଛି ।
ଆଜି ଅନୁମୋଦନ ମିଳିଥିବା ସବୁ ଯୁଦ୍ଧାସ୍ତ୍ର ଆତ୍ମନିର୍ଭର ଭାରତ କାର୍ଯ୍ୟକ୍ରମ ଅଧିନରେ ଭାରତରେ ନିର୍ମାଣ କରାଯିବ ।