ଚୀନ, ପାକିସ୍ତାନ ପଟୁ ବିପଦ ବଢୁଛି : ଏଲଏସିର ସୁରକ୍ଷା ପାଇଁ ଗଠନ ହେଲା ସେନାର ସ୍ବତନ୍ତ୍ର ବିମାନ ବାହିନୀ
ନୂଆଦିଲ୍ଲୀ : ଉଭୟ ଚୀନ ଓ ପାକିସ୍ତାନ ପଟୁ ଭାରତ ପ୍ରତି ବିପଦ ବଢିଚାଲିଥିବାବେଳେ ଭାରତୀୟ ସେନାକୁ ଆହୁରି ଆଧୁନିକ ଓ ସକ୍ଷମ କରିବାକୁ ପଦକ୍ଷେପ ନିଆଯାଉଛି । ଏସବୁ ପଦକ୍ଷେପ ମଧ୍ୟରେ ରହିଛି ସେନାର ଆଭିଏସନ ବ୍ରିଗେଡ୍ ( ବିମାନ ବାହିନୀ) ଉପରେ ଅଧିକ ଗୁରୁତ୍ବ ପ୍ରଦାନ ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ସୀମା ନିକଟରେ ଚାଲିଥିବା କାର୍ଯ୍ୟକଳାପ ଉପରେ ତୀକ୍ଷଣ ଦୃଷ୍ଟି ରଖିବାକୁ ସେନା ତିନୋଟି ଇଣ୍ଟିଗ୍ରେଟେଡ୍ ଆଭିଏସନ ବ୍ରିଗେଡ୍ ସ୍ଥାପନ କରିଛି । ପୂର୍ବାଞ୍ଚଳ, ପଶ୍ଚିମାଞ୍ଚଳ ଓ ଉତ୍ତରାଞ୍ଚଳ କମାଣ୍ଡରେ ଏହି ଆଭିଏସନ କୋରଗୁଡ଼ିକ ସ୍ଥାପନ କରାଯାଇଛି । ଏସବୁ ବ୍ରିଗେଡ ସ୍ଥାପନର ଉଦ୍ଦେଶ୍ୟ ହେଉଛି ସୀମା ଓ ଏଲଏସି ନିକଟରେ ସେନାର କାର୍ଯ୍ୟଦକ୍ଷତାକୁ ଆହୁରି ସଂଗଠିତ କରିବା । ଏହା ସହିତ ସ୍ଥାନୀୟ ସ୍ତରରେ ନିଷ୍ପତ୍ତି ନେବା ପାଇଁ ସେନାକୁ ସକ୍ଷମ କରିବା । ସେନା ପାଖରେ ଥିବା ଡ୍ରୋନ, ୟୁଏଭି ଓ ହେଲିକପ୍ଟରଗୁଡ଼ିକୁ ଏସବୁ ବ୍ରିଗେଡ୍ ଅଧିନରେ ରଖାଯିବ । ଆଭିଏସନ ବ୍ରିଗେଟ୍ ସେନାର ଗ୍ରାଉଣ୍ଡ ୟୁନିଟ ସହ ସଂପର୍କ ରଖି କାର୍ଯ୍ୟକରିବ । ଏହା ଫଳରେ ସେନା ଉଭୟ ଭୂମି ଓ ଆକାଶମାର୍ଗରୁ ମିଳିତଭାବେ ଏଲଏସିର ସୁରକ୍ଷା କରିପାରିବ ।
ପୂର୍ବରୁ ସେନା ନିଜର ବିଭିନ୍ନ ଅପରେସନ ପାଇଁ ବାୟୁସେନାର ବିମାନ ଓ ହେଲିକପ୍ଟରଗୁଡ଼ିକର ସହାୟତା ନେଇଥାଏ । କିନ୍ତୁ ଏହି ପ୍ରକ୍ରିୟା ସମୟସାପେକ୍ଷ ହୋଇଥିବାରୁ ସେନାର ନିଜସ୍ବ ବିମାନ ଶାଖା ପ୍ରତିଷ୍ଠା କରାଯାଇଛି ବୋଲି ବିଶେଷଜ୍ଞମାନେ କହିଛନ୍ତି ।