ମୋତେ ରାଜନୀତି ଆସେନି, ମୁଁ ଲୋକଙ୍କ ପାଇଁ ସ୍କୁଲ-ଡାକ୍ତରଖାନା ତିଆରି କରେ: ଅରବିନ୍ଦ କେଜ୍ରିୱାଲ
ନୂଆଦିଲ୍ଲୀ: ରାଜସ୍ଥାନରେ ଚାଲିଥିବା ରାଜନୈତିକ କନ୍ଦଳ ମଧ୍ୟରେ କଂଗ୍ରେସକୁ ଟାର୍ଗେଟ କରିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ। ସେ କହିଛନ୍ତି ଯେ, ଆମେ ରାଜନୀତି ଜାଣି ନାହୁଁ। ଆମେ ଜନସାଧାରଣଙ୍କ ପାଇଁ କାମ କରୁ। ସେମାନଙ୍କ ପାଇଁ ବିଦ୍ୟାଳୟ ଏବଂ ଡାକ୍ତରଖାନା ନିର୍ମାଣ କରୁ। ଏସବୁକୁ ଲୋକେ ଭଲ ପାଆନ୍ତି।
Sambad is now on WhatsApp
Join and get latest news updates delivered to you via WhatsApp
ସେ ଆହୁରି କହିଛନ୍ତି ଯେ, ଆମେ ଲୋକଙ୍କ ମଙ୍ଗଳ କଥା ଚିନ୍ତା କରି ରାଜନୀତି କରୁ। ତେଣୁ ଆମେ ପ୍ରଥମେ ଦିଲ୍ଲୀ ଏବଂ ପଞ୍ଜାବରେ ସରକାର ଗଠନ କଲୁ। ବର୍ତ୍ତମାନ ଗୁଜରାଟର ଲୋକମାନେ କହୁଛନ୍ତି ଯେ ସେଠାରେ ମଧ୍ୟ ଆପ୍ ସରକାର ଗଠନ ହେବ। ରାଜସ୍ଥାନରେ ଉପୁଜିଥିବା ରାଜନୈତିକ ସଙ୍କଟକୁ ନେଇ କେଜ୍ରିୱାଲ କହିଛନ୍ତି, କଂଗ୍ରେସ ନିଜ ଘରର ଯତ୍ନ ନେଇପାରୁନାହିଁ। ଉଭୟ ଦଳ ବିଜେପି ଓ କଂଗ୍ରେସ ଲୋକଙ୍କୁ ଠକୁଛନ୍ତି। ସେମାନେ କହୁଛନ୍ତି ଯେ କେଜ୍ରିୱାଲ ମାଗଣାରେ ଜିନିଷ ଯୋଗାଇବା ବନ୍ଦ କରିବା ଉଚିତ୍। କିନ୍ତୁ ଆମର ଏହି ପ୍ରୟାସ ପାଇଁ ଆଜି ସମଗ୍ର ଦେଶ ଆମ୍ ଆଦମୀ ପାର୍ଟି ଉପରେ ଭରସା କରୁଛି। ଆମକୁ ଦେଶକୁ ଆଗକୁ ନେବାକୁ ପଡିବ।
ଏହା ପୂର୍ବରୁ ରବିବାର ଗୁଜରାଟରେ ପହଞ୍ଚି କେଜ୍ରିୱାଲ କହିଥିଲେ ବର୍ତ୍ତମାନ ପର୍ଯ୍ୟନ୍ତ ଲୋକମାନେ ବାଧ୍ୟତାମୂଳକ ଭାବେ ବିଜେପିକୁ ଭୋଟ୍ ଦେଉଥିଲେ। କାରଣ ସେମାନଙ୍କ ପାଖରେ ଦୁର୍ନୀତିଗ୍ରସ୍ତ କଂଗ୍ରେସ ହିଁ ଗୋଟିଏ ବିକଳ୍ପ ଥିଲା। କିନ୍ତୁ ବର୍ତ୍ତମାନ ଜନସାଧାରଣଙ୍କ ପାଖରେ ‘ଆପ୍’ ର ବିକଳ୍ପ ଅଛି। ଯଦି ଗୁଜରାଟରେ ଆପର ସରକାର ଗଠନ ହୁଏ ତେବେ ୧୦ଲକ୍ଷ ସରକାରୀ ଚାକିରି ଦିଆଯିବ। ଆଜିକାଲି ଗୁଜରାଟର ହ୍ବାଟସଆପ ଆପ୍ ଗ୍ରୁପରେ ଗୋଟିଏ କଥାକୁ ନେଇ ଚର୍ଚ୍ଚା ହେଉଛି ଯେ, ଯଦି ଆପଣ କଂଗ୍ରେସକୁ ଭୋଟ୍ ଦିଅନ୍ତି ତେବେ ସୋନିଆ ଗାନ୍ଧୀଙ୍କ ପୁଅ ଅଗ୍ରଗତି କରିବେ। ଯଦି ଆପଣ ବିଜେପିକୁ ଭୋଟ୍ ଦିଅନ୍ତି, ତେବେ ଅମିତ ଶାହାଜୀଙ୍କର ପୁଅ ଅଗ୍ରଗତି କରିବେ ଏବଂ ଯଦି ଆପଣ ଆମ୍ ଆଦମୀ ପାର୍ଟିକୁ ଭୋଟ୍ ଦିଅନ୍ତି, ତେବେ ଗୁଜରାଟର ପ୍ରତ୍ୟେକ ପିଲା ଅଗ୍ରଗତି କରିବେ। ଆମେ କ୍ଷମତାକୁ ଆସିଲେ ଗୁଜରାଟର ପ୍ରତ୍ୟେକ ଯୁବପିଢ଼ିଙ୍କୁ ନିଯୁକ୍ତି ଦିଆଯିବ। ଚାକିରି ନହେବା ପର୍ଯ୍ୟନ୍ତ ପ୍ରତ୍ୟେକ ପ୍ରତି ମାସରେ ୩ହଜାର ବେରୋଜଗାର ଭତ୍ତା ଦିଆଯିବ।