୬୨ଜଣଙ୍କ ମଧ୍ୟରୁ ୫୮ଜଣ ବିଧାୟକ ଦେଲେ ଭୋଟ, ୪ଜଣ ବିଧାୟକ ଭୋଟ ନଦେବାର କାରଣ କହିଲେ କେଜ୍ରିୱାଲ
ନୂଆଦିଲ୍ଲୀ: ଆସ୍ଥା ଭୋଟ ଜିତିଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ। ଦିଲ୍ଲୀ ଅବକାରୀ ଦୁର୍ନୀତି ମାମଲାକୁ ନେଇ ଦିଲ୍ଲୀରେ ଆପ ଏବଂ ବିଜେପି ମଧ୍ୟରେ ଲଢ଼େଇ ଚାଲିଛି। ଆପର ୨୦-୨୫ ବିଧାୟକ ବିଜେପି ସହ ଯୋଗାଯୋଗ କରୁଥିବା ନେଇ ଦାବି କରାଯିବା ପରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ବିଜେପିକୁ ଭୁଲ ପ୍ରମାଣିତ କରିବା ପାଇଁ ଆସ୍ଥା କରିବାକୁ କହିଥିଲେ। ଆଜି ବିଧାନସଭାରେ ଆସ୍ଥା ଭୋଟ କରାଯାଇଥିବା ବେଳେ କେଜ୍ରିୱାଲ ବହୁମତରେ ବିଜୟୀ ହୋଇଥିବା ଜଣାପଡ଼ିଛି। ୫୮ଜଣ ବିଧାୟକ ଆସ୍ଥା ଭୋଟରେ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି (ଆପ୍) ସପକ୍ଷରେ ଭୋଟ ଦେଇଥିଲେ। ୭୦ ସଦସ୍ୟ ବିଶିଷ୍ଟ ଦିଲ୍ଲୀ ବିଧାନସଭାରେ ଆପର ୬୨ଜଣ ବିଧାୟକ ଥିବାବେଳେ ବିଜେପିର ୮ଜଣ ବିଧାୟକ ଅଛନ୍ତି।
Sambad is now on WhatsApp
Join and get latest news updates delivered to you via WhatsApp
ଆସ୍ଥା ଭୋଟ ଜିତିବା ପରେ କେଜ୍ରିୱାଲ କହିଛନ୍ତି ଯେ, ବିଜେପି ଦିଲ୍ଲୀରେ ଗୋଟିଏ ବି ଆପ୍ ବିଧାୟକଙ୍କୁ କିଣିପାରି ନାହିଁ। ଆମର ବିଧାନସଭାରେ ୬୨ଜଣ ବିଧାୟକ ଅଛନ୍ତି। ସେ ମଧ୍ୟରୁ ୫୮ଜଣ ମୋ ସପକ୍ଷରେ ଭୋଟ ଦେଇଛନ୍ତି। ବାକି ୪ଜଣଙ୍କ ମଧ୍ୟରୁ ଦୁଇଜଣ ଦେଶ ବାହାରେ, ଜଣେ ଜେଲରେ ଥିବା ବେଳେ ଚତୁର୍ଥ ସଦସ୍ୟ ହେଉଛନ୍ତି ଗୃହର ବାଚସ୍ପତି। ମୁଁ ବିଧାନସଭାରେ ଆସ୍ଥା ଭୋଟ କରିବାକୁ ଚାହୁଁଥିଲି, ଯାହା ଦ୍ବାରା ଦିଲ୍ଲୀର ଲୋକଙ୍କ ସାମ୍ନାରେ ଏହା ପ୍ରମାଣିତ ହୋଇପାରିବ ଯେ ବିଜେପିର ‘ଅପରେସନ୍ ଲୋଟସ୍ ଏବେ ‘ଅପରେସନ୍ କିଚଡ୍’ ହୋଇଯାଇଛି।
ରାଜନୈତିକ ପ୍ରଚାର ପ୍ରସାର ପାଇଁ ତଥା ତାଙ୍କ ସରକାରଙ୍କ ଅବକାରୀ ଦୁର୍ନୀତି ମାମଲାରୁ ଲୋକଙ୍କ ଧ୍ୟାନ ହଟାଇବା ପାଇଁ କେଜ୍ରିୱାଲ ବିଧାନସଭାକୁ ବ୍ୟବହାର କରିଥିବା ଅଭିଯୋଗ କରିଛି ବିଜେପି।