ପଞ୍ଜାବରେ କେଜ୍ରିୱାଲଙ୍କ ବଡ ଘୋଷଣା: ମୋବାଇଲ୍ ନମ୍ବର ଦେଇ ଜନତାଙ୍କୁ ଦେଲେ ମୁଖ୍ୟମନ୍ତ୍ରୀ ବାଛିବାର ଅଧିକାର

ଚଣ୍ଡିଗଡ଼: କିଏ ହେବ ପଞ୍ଜାବ ନିର୍ବାଚନରେ ଆମ୍ ଆଦମୀ ପାର୍ଟିର ମୁଖ୍ୟମନ୍ତ୍ରୀ ପ୍ରାର୍ଥୀ? ଏହି ପ୍ରଶ୍ନକୁ ନେଇ ଏବେ ବି ଆଲୋଚନା ଚାଲିଥିବାବେଳେ ଆଜି ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପ୍ ମୁଖ୍ୟ ଅରବିନ୍ଦ କେଜ୍ରିୱାଲ ଏକ ବଡ଼ ଘୋଷଣା କରିଛନ୍ତି । ପଞ୍ଜାବ ବିଧାନସଭା ନିର୍ବାଚନ ପୂର୍ବରୁ ସେ ଏକ ଫୋନ୍ ନମ୍ବର ଜାରି କରିଛନ୍ତି । ଆଉ କହିଛନ୍ତି, ଲୋକମାନେ ଫୋନ୍ କରି ଯାହାଙ୍କୁ ମୁଖ୍ୟମନ୍ତ୍ରୀ କରିବାକୁ କହିବେ ଆମ୍ ଆଦମୀ ପାର୍ଟି ସେହି ପ୍ରାର୍ଥୀଙ୍କୁ ନିଜର ମୁଖ୍ୟମନ୍ତ୍ରୀ ପ୍ରାର୍ଥୀ କରିବ ।

ଗୁରୁବାର କେଜ୍ରିୱାଲ ପଞ୍ଜାବ ଜନତାଙ୍କ ପାଇଁ ଏକ ମୋବାଇଲ୍ ନମ୍ବର ଜାରି କରିଛନ୍ତି। ଏହି ନମ୍ବର ୭୦୭୪୮୭୦୭୪୮ ରେ ଫୋନ୍ କରି ମୁଖ୍ୟମନ୍ତ୍ରୀ ଚେହେରାକୁ ନେଇ ପଞ୍ଜାବବାସୀ ନିଜର ରାୟ ଦେଇପାରିବେ ବୋଲି କେଜ୍ରିୱାଲ କହିଛନ୍ତି । ତେବେ କେବଳ କଲ୍ କରି ନୁହେଁ ବରଂ ହ୍ୱାଟ୍ସଆପ୍, ଏସଏମଏସ ଜରିଆରେ ମଧ୍ୟ ଲୋକମାନେ ନିଜର ରାୟ ଦେଇପାରିବେ । ଆସନ୍ତା ଜାନୁଆରି ମାସ ୧୭ ତାରିଖ ସନ୍ଧ୍ୟା ୫ଟା ଯାଏଁ ଏହି ଫୋନ୍ ଲାଇନ୍ ଖୋଲାରହିବ ।

हम भी आम लोगों के बीच में से निकले हैं, क्यों ना लोगों से पूछ कर ही CM उम्मीदवार घोषित किया जाए?

अगर मुख्यमंत्री लोगों द्वारा खुद चुना गया हो तो उन्हें भी Confidence आता है कि ये तो साड्डा ही बंदा है!

- श्री @BhagwantMann #JantaChunegiCM pic.twitter.com/GY8X5ykc37

— AAP (@AamAadmiParty) January 13, 2022

ଏହି ଅବସରରେ ଅରବିନ୍ଦ କେଜ୍ରିୱାଲଙ୍କ ସହିତ ପଞ୍ଜାବ ପ୍ରଦେଶର ଅଧ୍ୟକ୍ଷ ଭଗବନ୍ତ ମାନ ମଧ୍ୟ ସାମିଲ ଥିଲେ । ସେ କହିଥିଲେ ଯେ, କେଜ୍ରିୱାଲ ତାଙ୍କୁ ମୁଖ୍ୟମନ୍ତ୍ରୀ ପଦ ପାଇଁ କହିଥିଲେ ହେଲେ ସେ ଦଳର ଜଣେ ସିପାହୀ ହୋଇ ରହିବା ସହିତ ଜନତାଙ୍କୁ ଏନେଇ ପଚାରିବାକୁ ମତ ଦେଇଥିଲେ । ପରେ ଦିଲ୍ଲୀ ମୁଖ୍ୟମନ୍ତ୍ରୀ ଏନେଇ ସହମତି ପ୍ରକାଶ କରିବା ପରେ ଏବେ ପଞ୍ଜାବ ଜନତାଙ୍କ ପାଇଁ ଆପ୍ ଏହି ସୁବିଧା ଆଣିଛି ।

ସୂଚନାଯୋଗ୍ୟ ଯେ, ଆଗାମୀ ଗୋଟିଏ ସପ୍ତାହ ଭିତରେ କେଜ୍ରିୱାଲ ପଞ୍ଜାବ ବିଧାନସଭା ନିର୍ବାଚନ ପାଇଁ ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିପାରନ୍ତି । ତେବେ କିଏ ଆପର ମୁଖ୍ୟମନ୍ତ୍ରୀ ଚେହେରା ହେବ ତାକୁ ନେଇ ଏବେ ବି ପ୍ରଶ୍ନବାଚୀ ଲାଗି ରହିଛି ।