ବୁଧବାର ରାତି ବି ଜେଲରେ କଟାଇବେ ଆରୟନ ଖାଁ
ମୁମ୍ବାଇ: ବୁଧବାର ରାତି ବି ମୁମ୍ବାଇର ଅର୍ଥର ରୋଡ୍ ଜେଲରେ ବିତେଇବେ ବଲିଉଡ ଅଭିନେତା ଶାହରୁଖ ଖାଁଙ୍କ ପୁତ୍ର ଅରୟନ ଖାଁ । ବମ୍ବେ ହାଇକୋର୍ଟରେ ଗତକାଲିଠାରୁ ଆରମ୍ଭ ହୋଇଥିବା ଜାମିନ ଆବେଦର ଶୁଣାଣି ଆସନ୍ତା କାଲି ମଧ୍ୟ ଜାରି ରହିବ ।
Sambad is now on WhatsApp
Join and get latest news updates delivered to you via WhatsApp
ଆଜିର ଶୁଣାଣି ବେଳେ ଆରୟନଙ୍କ ଓକିଲ ମୁକୁଲ ରୋହତଗୀ କହିଥିଲେ ଯେ ଆରୟନଙ୍କୁ ଜାମିନ ନଦେବା ତାଙ୍କ ସାମ୍ବିଧାନିକ ଅଧିକାରର ହନନ । ଜଣେ ବ୍ୟକ୍ତିଙ୍କୁ କେଉଁ କାରଣରୁ ଗିରଫ କରାଯାଇଛି ତାହା ତାଙ୍କୁ ନ ଜଣାଇବା ବେଆଇନ । ତାଙ୍କୁ ଅକ୍ଟୋବର ୨ ତାରିଖରେ ଗିରଫ ବେଳେ ଅପରାଧିକ ଷଡ଼ଯନ୍ତ୍ର କଥା କୁହାଯାଇନଥିଲା । ଗିରଫର ପର ଦିନ ଅର୍ଥାତ ୩ ତାରିଖରେ ଏହାକୁ ଯୋଡ଼ାଯାଇଛି । ଜବତ ସାମଗ୍ରୀ ମଧ୍ୟରେ ଆରୟନଙ୍କ ଫୋନ କଥା ଦର୍ଶାଯାଇନାହିଁ । କିନ୍ତୁ ଫୋନଟି ଏବେ ଏନସିବି କବଜାରେ ରହିଛି ।
ଏହା ପୂର୍ବରୁ ଅନ୍ୟତମ ସହ ଅଭିଯୁକ୍ତ ଅରବାଜ ମର୍ଚ୍ଚାଣ୍ଟଙ୍କ ଓକିଲ ଅମିତ ଦେଶାଇ କହିଥିଲେ ଯେ ଏହା ମାମଲାଟି କେବଳ ଏକ ଡ୍ରଗ୍ସ ସେବନ ସଂପର୍କିତ ମାମଲା । ଏହି ମାମଲାରେ ସର୍ବାଧିକ ଜେଲଦଣ୍ଡ ୧ ବର୍ଷ । ପୁଣି ଗିରଫଦାରି ସମୟରେ ଏନସିବି ପକ୍ଷରୁ ଅପରାଧିକ ଷଡ଼ଯନ୍ତ୍ର ଆରୋପ ଲଗାଯାଇନଥିଲା । ଏଣୁ ଅଭିଯୁକ୍ତମାନଙ୍କୁ ଜାମିନ ଦିଆଯାଉ ।