ଆରୟନଙ୍କ ହାଜତ ମିଆଦ ଅକ୍ଟୋବର ୩୦କୁ ବୃଦ୍ଧି
ମୁମ୍ବାଇ : କ୍ରୁଜ ଜାହାଜରେ ଡ୍ରଗ୍ସ ସେବନ ମାମଲାରେ ଗିରଫ ବଲିଉଡ ସୁପରଷ୍ଟାର ଶାହରୁଖ ଖାଁଙ୍କ ପୁଅ ଆରୟନ ଖାଁଙ୍କ ହାଜତ ମିଆଦ ଆସନ୍ତା ୩୦ ତାରିଖ ପର୍ଯ୍ୟନ୍ତ ବୃଦ୍ଧି ହୋଇଛି । ମୁମ୍ବାଇର ସ୍ବତନ୍ତ୍ର ଏନଡିପିଏସ କୋର୍ଟ ତାଙ୍କ ହାଜତ ମିଆଦକୁ ବଢାଇଦେଇଛନ୍ତି । ଫଳରେ ଆସନ୍ତା ୩୦ ତାରିଖ ପର୍ଯ୍ୟନ୍ତ ହାଜତରେ ରହିବେ ଆରୟନ ।
Sambad is now on WhatsApp
Join and get latest news updates delivered to you via WhatsApp
ତେବେ କୋର୍ଟଙ୍କ ଏହି ନିଷ୍ପତ୍ତି ବମ୍ବେ ହାଇକୋର୍ଟରେ ଆରୟନଙ୍କ ଜାମିନ ଆବେଦନର ଶୁଣାଣିକୁ କୌଣସି ପ୍ରକାରେ ପ୍ରଭାବିତ କରିବ ନାହିଁ ।
ଆଜି ଶାହାରୁଖ ମୁମ୍ବାଇର ଅର୍ଥର ରୋଡ୍ ଜେଲରେ ଥିବା ନିଜ ପୁଅ ଆରୟନକୁ ଦେଖିବାକୁ ଯାଇଥିଲେ । ଏହାର କିଛି ଘଣ୍ଟା ପରେ ଏନସିବି (ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ)ର କିଛି ଅଧିକାରୀ ଶାହରୁଖଙ୍କ ଘର ମନ୍ନତକୁ ଯାଇଥିଲେ । ତେବେ ଏହା ଏକ ଚଢଉ ନଥିଲା ବୋଲି ଏନସିବି ପକ୍ଷରୁ ସ୍ପଷ୍ଟ କରିଦିଆଯାଇଛି ।
ସୂଚନାଯୋଗ୍ୟ ଯେ, ଗତ ଅକ୍ଟୋବର ୩ରେ ଆରୟନ ଖାଁ, ଅରବାଜ ମର୍ଚ୍ଚାଣ୍ଟ ଓ ମୁନମୁନ ଧମେଚା ଗିରଫ ହୋଇଥିଲେ । ମୁମ୍ବାଇରୁ ଗୋଆ ଯାଉଥିବା କ୍ରୁଜ ଜାହାଜ କୋର୍ଡେଲିଆରେ ଡ୍ରଗ୍ସ ରଖିବା ଓ ସେବନ ଅଭିଯୋଗରେ ସେମାନଙ୍କୁ ଗିରଫ କରାଯାଇଥିଲା । ତେବେ ଆରୟନଙ୍କ ପାଖରୁ ଡ୍ରଗ୍ସ ମିଳିନଥିଲା । ଗତକାଲି ସ୍ବତନ୍ତ୍ର ଏନଡିପିଏସ କୋର୍ଟ ଆରୟନଙ୍କ ଜାମିନ ନାମଞ୍ଜୁର କରିଦେଇଥିଲେ ।