ଆମେରିକା ସିନେଟର ପେଲୋସିଙ୍କ ଏସିଆ ଗସ୍ତ ଆରମ୍ଭ, ତାଇଓ୍ବାନ ଯିବା ସମ୍ଭାବନା
ସିଂଗାପୁର : ଆମେରିକୀୟ ସିନେଟର ନାନ୍ସି ପେଲୋସିଙ୍କ ବହୁ ଚର୍ଚ୍ଚିତ ଏସିଆ ଗସ୍ତ ଆରମ୍ଭ ହୋଇଛି । ପ୍ରଥମ ପର୍ଯ୍ୟାୟରେ ସେ ସିଂଗାପୁରରେ ପହଞ୍ଚିଛନ୍ତି । ମାତ୍ର ସେ ତାଇଓ୍ବାନ ଯିବେ କି ନାହିଁ ତାହାକୁ ନେଇ ସଂଦେହ ଜାରି ରହିଛି । ଗୋଟିଏ ପଟେ ଚୀନ ତାଙ୍କର ତାଇଓ୍ବାନ ଗସ୍ତକୁ ତୀବ୍ର ବିରୋଧ କରୁଥିବାବେଳେ ତାଇଓ୍ବାନର ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ ସେ ମଙ୍ଗଳବାର ରାତିରେ ତାଇଓ୍ବାନରେ ପହଞ୍ଚିବେ । ତେବେ ଆମେରିକା ପକ୍ଷରୁ ଏ ନେଇ କିଛି ଘୋଷଣା କରାଯାଇନାହିଁ ।
Sambad is now on WhatsApp
Join and get latest news updates delivered to you via WhatsApp
ଯଦି ପେଲୋସି ତାଇଓ୍ବାନ ଗସ୍ତ କରନ୍ତି ତାହା ୧୯୯୭ ପରେ ପ୍ରଥମ ଥର ପାଇଁ କୌଣସି ଆମେରିକୀୟ ଜନ ପ୍ରତିନିଧିଙ୍କ ତାଇଓ୍ବାନ ଗସ୍ତ ହେବ । ଏହି ଗସ୍ତକୁ ଚୀନ ତୀବ୍ର ବିରୋଧ କରିବା ସହ ଏହା ନିଆଁରେ ଖେଳିବା ସହ ସମାନ ହେବ ବୋଲି ପୂର୍ବରୁ କହିସାରିଛି । ଆମେରିକା ଓ ତାଇଓ୍ବାନକୁ କେବଳ ଚେତାବନୀ ଦେଇ ଚୁପ ହୋଇନି ଚୀନ । ଗତ ଶନିବାରଦିନ ତାଇଓ୍ବାନ ଜଳସୀମା ନିକଟରେ ଚୀନର ନୌସେନା ପକ୍ଷରୁ ଏକ ଯୁଦ୍ଧାଭ୍ୟାସ କରାଯାଇଥିଲା ।
ସୂଚନାଯୋଗ୍ୟ ଯେ, ଚୀନ କ୍ଷୁଦ୍ର ଦ୍ୱୀପ ଦେଶ ତାଇଓ୍ଵାନକୁ ନିଜର ଅଂଶ ବୋଲି ଦାବି କରୁଛି ଓ ଦିନେ ନା ଦିନେ ଏହାକୁ ଅଧିକାର କରିବାକୁ ସ୍ୱପ୍ନ ଦେଖୁଛି । ଗତ ଦୁଇ ବର୍ଷ ହେଲା ଚୀନର ଯୁଦ୍ଧ ବିମାନ ନିୟମିତଭାବେ ତାଇଓ୍ବାନ ବାୟୁସୀମା ଅତିକ୍ରମ କରିବା ପରେ ଏହି ଆଶଙ୍କା ବଢିଯାଇଛି ।