ମୋର ଇସ୍ତଫା ପତ୍ର ସୋନିଆ ଗାନ୍ଧୀଙ୍କ ପାଖରେ ସବୁବେଳେ ଅଛି: ରାଜସ୍ଥାନ ମୁଖ୍ୟମନ୍ତ୍ରୀ
ଜୟପୁର: ଆସନ୍ତା ବର୍ଷ ଶେଷ ଆଡକୁ ରାଜସ୍ଥାନରେ ବିଧାନସଭା ନିର୍ବାଚନ ହେବାକୁ ଥିବାବେଳେ ରାଜ୍ୟର ଦୁଇ ହେଭିୱେଟ ନେତା ଅଶୋକ ଗେହଲୋଟ୍ ଓ ସଚିନ ପାଇଲଟଙ୍କ ମଧ୍ୟରେ ବିବାଦ ଥମିବାର ନାମ ନେଉନାହିଁ | ଦିଲ୍ଲୀରେ ସଚିନ ପାଇଲଟ ସୋନିଆ ଗାନ୍ଧୀଙ୍କୁ ଭେଟିବାର ଦୁଇ ଦିନ ପରେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ ଏକ ବଡ଼ ବୟାନ ଦେଇଛନ୍ତି। ଗେହଲୋଟ୍ କହିଛନ୍ତି ଯେ ମୋର ଇସ୍ତଫା ପତ୍ର ସ୍ଥାୟୀ ଭାବେ ସୋନିଆ ଗାନ୍ଧୀଙ୍କ ପାଖରେ ଅଛି। ଯେତେବେଳେ ମୁଖ୍ୟମନ୍ତ୍ରୀଙ୍କୁ ପରିବର୍ତ୍ତନ କରିବାକୁ ପଡିବ, ସେତେବେଳେ କେହି ଏ ବାବଦରେ ଜାଣିପାରିବେ ନାହିଁ | ଏହି କାମ ରାତାରାତି ହୋଇଯିବ |
Sambad is now on WhatsApp
Join and get latest news updates delivered to you via WhatsApp
ଏହା ଉପରେ କୌଣସି ଆଲୋଚନା ହେବ ନାହିଁ | ରାଜସ୍ୱ ସେବା ପରିଷଦର କାର୍ଯ୍ୟକ୍ରମକୁ ସମ୍ବୋଧିତ କରି ମୁଖ୍ୟମନ୍ତ୍ରୀ ଗେହଲୋଟ୍ କହିଛନ୍ତି ଯେ ସମୟ ଆସିଲେ ସୋନିଆ ଗାନ୍ଧୀ ନିଷ୍ପତ୍ତି ନେବେ । ମୁଁ ଆପଣମାନଙ୍କୁ ଅନୁରୋଧ କରିବାକୁ ଚାହୁଁଛି ଯେ ଗୁଜବ ପ୍ରତି ଧ୍ୟାନ ଦିଅନ୍ତୁ ନାହିଁ | ସୂଚନାଯୋଗ୍ୟ ଯେ ୨୦୨୩ ଶେଷ ସୁଦ୍ଧା ରାଜସ୍ଥାନ ବିଧାନସଭା ନିର୍ବାଚନ ହେବାକୁ ଯାଉଛି। କଂଗ୍ରେସ ହାଇକମାଣ୍ଡ ଏବେ ରାଜସ୍ଥାନ ଉପରେ ଧ୍ୟାନ କେନ୍ଦ୍ରିତ କରିଥିବାବେଳେ ସଚିନ ପାଇଲଟ ଗୁରୁବାର ଦିନ ନୂଆଦିଲ୍ଲୀରେ ସୋନିଆ ଗାନ୍ଧୀଙ୍କୁ ଭେଟିଛନ୍ତି। ଆଉ ପାଇଲଟ ଭେଟିବାର ଗୋଟିଏ ଦିନ ପୂର୍ବରୁ ବୁଧବାର ଦିନ ଗେହଲୋଟ ସୋନିଆ ଗାନ୍ଧୀଙ୍କୁ ଭେଟିଥିଲେ।
କଂଗ୍ରେସ ହାଇକମାଣ୍ଡଙ୍କୁ ଭେଟିବା ପରେ ପାଇଲଟ କହିଥିଲେ ଯେ ରାଜସ୍ଥାନ କଂଗ୍ରେସରେ ପରିସ୍ଥିତି ସମ୍ପର୍କରେ ସୋନିଆ ଗାନ୍ଧୀଙ୍କୁ ଅବଗତ କରାଯାଇଛି। ୨୦୨୩ ନିର୍ବାଚନରେ ଦଳ ପୁଣି ଥରେ ଜିତିବ | ରାଜସ୍ଥାନରେ ବିଧାନସଭା ନିର୍ବାଚନକୁ ଆଉ ଏକ ବର୍ଷ ବାକି ଅଛି। ଏହାପୂର୍ବରୁ ପୁଣି ଥରେ ମୁଖ୍ୟମନ୍ତ୍ରୀଙ୍କ ଚେହେରା ବଦଳାଇବାର ଗୁଜବ ବୃଦ୍ଧି ପାଇବାରେ ଲାଗିଛି। ମୁଖ୍ୟମନ୍ତ୍ରୀ କହିଛନ୍ତି ଯେ ମିଡିଆରେ ବାରମ୍ବାର କୁହାଯାଉଛି ଯେ ରାଜସ୍ଥାନରେ ସରକାର ବଦଳିବେ, ନୂଆ ମୁଖ୍ୟମନ୍ତ୍ରୀ ଦାୟିତ୍ୱ ନେବେ | ତେବେ ମୁଁ ସମସ୍ତଙ୍କୁ ଅନୁରୋଧ କରୁଛି ଏହି ଗୁଜବ ପ୍ରତି ଧ୍ୟାନ ଦିଅନ୍ତୁ ନାହିଁ |