ଗୌହାଟୀ: ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ରବିବାର ଏକ ସାଂଘାତିକ ଅଭିଯୋଗ କରିଛନ୍ତି। ସେ କହିଛନ୍ତି ଯେ କଂଗ୍ରେସ ସାଂସଦ ଗୌରବ ଗୋଗୋଇ ପାକିସ୍ତାନର ଗୁଇନ୍ଦା ଏଜେନ୍ସି ଆଇଏସ୍‌ଆଇର ନିମନ୍ତ୍ରଣକ୍ରମେ ପାକିସ୍ତାନ ଗସ୍ତ କରିଥିଲେ ଏବଂ ସେ ଭାରତର ଶତ୍ରୁ ରାଷ୍ଟ୍ର ସହ ମିଶି କାମ କରିଥିଲେ। ସେ ସେଠାକୁ ପ୍ରଶିକ୍ଷଣ ନେବାକୁ ଯାଇଥିଲେ ବୋଲି ମୁଖ୍ୟମନ୍ତ୍ରୀ ବିଶ୍ବ ଶର୍ମା ଆଜି ଏକ ସରକାରୀ କାର୍ଯ୍ୟକ୍ରମ ଅବସରରେ ସାମ୍ବାଦିକମାନକୁ କହିଛନ୍ତି। ଏହି ଦାବିକୁ ସମର୍ଥନ କରିବା ପାଇଁ ସରକାରଙ୍କ ପାଖରେ ପ୍ରମାଣ ରହିଛି ଏବଂ  ଉପଯୁକ୍ତ ଯାଞ୍ଚ ପରେ ସେପ୍ଟେମ୍ବର ୧୦ ସୁଦ୍ଧା ପ୍ରତ୍ୟେକ ପ୍ରମାଣ ସାର୍ବଜନୀନ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। 

Advertisment

‘ଆଇଏସ୍‌ଆଇର ନିମନ୍ତ୍ରଣକ୍ରମେ ଗୌରବ ଗୋଗୋଇ ପାକିସ୍ତାନ ଯାଇଥିବା ନେଇ ପ୍ରମାଣ ମିଳିବା ପରେ ହିଁ ମୁଁ ଏହି ବୟାନ ଦେଉଛି’ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଗୋଗୋଇ ପର୍ଯ୍ୟଟନ ଉଦ୍ଦେଶ୍ୟରେ  ପାକିସ୍ତାନ ଯାଇନଥିଲେ ଏବଂ ସେ ନିଶ୍ଚିତ ଭାବେ ସେଠାରେ ପ୍ରଶିକ୍ଷଣ ନେବାକୁ ଯାଇଥିଲେ ବୋଲି ମୁଖ୍ୟମନ୍ତ୍ରୀଙ୍କ ବୟାନ ରାଜ୍ୟ ରାଜନୀତିକୁ ସରଗରମ କରିଛି।  ପାକିସ୍ତାନୀ ପ୍ରତିଷ୍ଠାନ ସହ ଘନିଷ୍ଠ ଭାବେ ଗୋଗୋଇ କାମ କରୁଥିବାରୁ ତାଙ୍କ ସଂପର୍କରେ ବିସ୍ତୃତ ଯାଞ୍ଚ ଜରୁରୀ ବୋଲି ବିଶ୍ବ ଶର୍ମା କହିଛନ୍ତି। ପାକିସ୍ତାନ ଦୂତାବାସ  ଏ ବାବଦ ପ୍ରମାଣ ଉପଲବ୍ଧ କରାଇବ ଏବଂ ଏଥିପାଇଁ ସେମାନେ ବାଧ୍ୟ ବୋଲି ମୁଖ୍ୟମନ୍ତ୍ରୀ  କହିଛନ୍ତି।