ଆସାମରେ ସ୍ଥିତି ସୁଧୁରୁଛି, ଦିନେ ଦୁଇ ଦିନ ମଧ୍ୟରେ ସେନା ଅପସାରଣ ସମ୍ଭାବନା : ସେନା
ଗୌହାଟୀ : ନାଗରିକତା ଆଇନକୁ ନେଇ ଗତ କିଛି ଦିନ ଧରି ଆସାମରେ ଦେଖାଦେଇଥିବା ହିଂସା ଧୀରେ ଧୀରେ ହ୍ରାସ ପାଉଛି । ଏପରି ସ୍ଥିତି ଅବ୍ୟାହତ ରହିଲେ ଆଗାମୀ କିଛି ଦିନରେ ରାଜ୍ୟରୁ ସେନା ଅପସାରଣ କରାଯିବ ବୋଲି ଭାରତୀୟ ସେନା ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ସେନାର ପୂର୍ବାଞ୍ଚଳ କମାଣ୍ଡ ମୁଖ୍ୟ ଲେପ୍ଟନାଣ୍ଟ ଜେନେରାଲ ଅନୀଲ ଚୌହାନ କହିଛନ୍ତି ଯେ ରାଜ୍ୟରେ ସ୍ଥିତି ଧୀରେ ଧୀରେ ସୁଧୁରୁଛି । ଏପରି ସୁଧାର ଜାରି ରହିଲେ ମୁତୟନ ହୋଇଥିବା ସେନା ଯବାନମାନଙ୍କୁ ବାରାକକୁ ଫେରାଇ ନିଆଯିବ ।
ସେ କହିଛନ୍ତି ଯେ ଗତ ଶନିବାର ସୁଦ୍ଧା ଉପର ଆସାମରେ ୨୪ କଲମ ସେନା ଓ ତଳ-ଆସାମରେ ୧୨ କଲମ ସେନା ମୁତୟନ ହୋଇଛନ୍ତି । ତେବେ ମାତ୍ର ୮ କଲମ ଯବାନ ଫ୍ଲାଗମାର୍ଚ୍ଚ କରିଥିଲେ । ଏହା ଦର୍ଶାଉଛି ଯେ ପରିସ୍ଥିତିରେ ଉନ୍ନତି ଆସୁଛି । ଆଶା କରୁଛି ଯେ ଦିନେ ଦୁଇଦିନ ମଧ୍ୟରେ ସ୍ଥିତି ସ୍ୱାଭାବିକ ହେବ ।
ଏଠାରେ ଉଲ୍ଲେଖଯୋଗ୍ୟ ଯେ, ଗୋଟିଏ କଲମରେ ସାଧାରଣତଃ ୭୦ ଜଣ ଯବାନ ଥାଆନ୍ତି ଓ ତାହା ଦୁଇଜଣ ଅଫିସରଙ୍କ ଦ୍ୱାରା ପରିଚାଳିତ ହୋଇଥାଏ ।