ସାଙ୍ଗିଆ ହେଲାଣି ବୋଝ: ଅନଲାଇନରେ ଚାକିରି ପାଇଁ ଆବେଦନ କଲେ ‘ଚୁତିଆ’ ସାଙ୍ଗିଆ ଗ୍ରହଣ କରୁନି କମ୍ପାନିର ସଫ୍ଟୱେର
ନୂଆଦିଲ୍ଲୀ: ସାଙ୍ଗିଆ ପାଇଁ ମିଳୁନି ଚାକିରି | ଚାକିରି ପାଇଁ ଆବେଦନ କରିବା ବେଳେ ସାଙ୍ଗିଆ ଲେଖିବା ମାତ୍ରେ ସଫ୍ଟୱେର ଆବେଦନକୁ ଗ୍ରହଣ କରିବାକୁ ମନ କରିଦେଉଛି | ଉଚ୍ଚ ଶିକ୍ଷିତା ହୋଇ ମଧ୍ୟରେ ଆଜି ଆସାମର ପ୍ରିୟଙ୍କା ଚୁତିଆ ଚାକିରି ଖଣ୍ଡେ ପାଇଁ ଚେଷ୍ଟା ଜାରି ରଖିଛନ୍ତି | ବାରମ୍ବାର ଚାକିରି ପାଇଁ ଆବେଦନ କରିବା ପରେ ତାଙ୍କ ସାଙ୍ଗିଆ ଆବେଦନ ଗ୍ରହଣ କରାଯାଉନଥିବାକୁ ବିରକ୍ତ ହୋଇ ଏବେ ସେ ଫେସବୁକରେ ନିଜର ଦୁଃଖ ଜାହିର କରିଛନ୍ତି |
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ନ୍ୟାସନାଲ ସିଡ୍ କର୍ପୋରେସନ୍ ଲିମିଟେଡରେ ଚାକିରି କରିବା ପାଇଁ ଅନଲାଇନ୍ ପୋର୍ଟାଲ୍ ମାଧ୍ୟମରେ ପ୍ରିୟଙ୍କା ଆବେଦନ କରିବାକୁ ଚାହିଁଥିଲେ | କିନ୍ତୁ ସାଙ୍ଗିଆ ବକ୍ସରେ ‘ଚୁତିଆ’ ଲେଖିବା ପରେ ତାଙ୍କୁ ଅପଶବ୍ଦ ନଲେଖି ସାଙ୍ଗିଆ ଲେଖିବାକୁ କୁହାଯାଇଥିଲା | ପୁଣି ଥରେ ସେ ‘ଚୁତିଆ’ ଲେଖିବାରୁ ତାଙ୍କ ଆବେଦନକୁ ଗ୍ରହଣ କରାଯାଇନଥିଲା | ଏହି ଘଟଣା ବିଷୟରେ ଜଣାଇ ପ୍ରିୟଙ୍କା ଲେଖିଛନ୍ତି ଯେ, ମୁଁ ଲୋକମାନଙ୍କୁ ପ୍ରକୃତରେ ବୁଝାଇବାକୁ ଚାହେଁ ଯେ, ମୁଁ ଅପଶବ୍ଦ ବ୍ୟବହାର କରୁନାହିଁ | ଏହା ଏକ ସମ୍ପ୍ରଦାୟ ଯେଉଁଠାରୁ ମୁଁ ଆସିଛି | ଏସବୁ ଘଟିବା ପରେ ମୁଁ ପ୍ରକୃତରେ ଦୁଃଖିତ ଏବଂ ହତାଶ ଅନୁଭବ କରୁଛି |
‘ଚୁତିଆ’ ଆସାମର ଏକ ସମ୍ପ୍ରଦାୟ ଏବଂ ଏହା ରାଜ୍ୟର ସର୍ବପୁରାତନ ଆଦିବାସୀ ସମ୍ପ୍ରଦାୟ ମଧ୍ୟରୁ ଅନ୍ୟତମ | ଏହାକୁ ସେଠାରେ “ସୁତିୟା” ବୋଲି ଉଚ୍ଚାରଣ କରାଯାଏ | କିନ୍ତୁ ଏହାକୁ ଦେଶର ଅନ୍ୟ ସ୍ଥାନରେ ‘ଚୁତିଆ’ ବୋଲି ଉଚ୍ଚାରଣ କରାଯିବା ସହ ଲୋକେ ଏହାକୁ ଅପଶବ୍ଦ ବୋଲି କହିଥାନ୍ତି, ଯାହା ପାଇଁ ଏବେ ପ୍ରିୟଙ୍କାଙ୍କୁ ଚାକିରି ମିଳିବାରେ ସମସ୍ୟା ସୃଷ୍ଟି ହୋଇଛି |