କଂଗ୍ରେସ ଛାଡିଲେ ପୂର୍ବତନ ଆଇନ ମନ୍ତ୍ରୀ ଅଶ୍ୱିନୀ କୁମାର
ନୂଆଦିଲ୍ଲୀ: ପୂର୍ବତନ ଆଇନ ମନ୍ତ୍ରୀ ଅଶ୍ୱିନୀ କୁମାର ମଙ୍ଗଳବାର ଦିନ କଂଗ୍ରେସରୁ ଇସ୍ତଫା ଦେଇଛନ୍ତି। କୁମାର ଆଜି ସକାଳେ କଂଗ୍ରେସ ସଭାପତି ସୋନିଆ ଗାନ୍ଧୀଙ୍କୁ ଇସ୍ତଫା ପତ୍ର ପଠାଇ କହିଛନ୍ତି ଯେ ଦଳରୁ ଦୂରେଇ ରହି ବି ସେ ଦେଶ ପାଇଁ ଭଲ କାମ କରିପାରିବେ। ଏହା ବ୍ୟତୀତ କୁମାର କଂଗ୍ରେସ ନେତୃତ୍ୱ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି। ପୂର୍ବତନ ଆଇନ ମନ୍ତ୍ରୀ କଂଗ୍ରେସରୁ ଇସ୍ତଫା ଦେବା ପରେ କହିଛନ୍ତି ଯେ କଂଗ୍ରେସ ଆଉ ସେହି ଦଳ ହୋଇ ରହିନାହିଁ ଯାହା ପୂର୍ବରୁ ଥିଲା |
Sambad is now on WhatsApp
Join and get latest news updates delivered to you via WhatsApp
କଂଗ୍ରେସ ଦଳର ନେତୃତ୍ୱ ନେବା ପାଇଁ ଆମ ପାଖରେ ପରିବର୍ତ୍ତନଶୀଳ ତଥା ପ୍ରେରଣାଦାୟକ ନେତୃତ୍ୱ ନାହାନ୍ତି । ମୁଁ ରାଜନୀତି ଛାଡି ନାହିଁ କିମ୍ବା ଜନତାଙ୍କ ସେବା କରିବା ବନ୍ଦ କରିନାହିଁ। ମୁଁ ଦେଶ ପ୍ରତି ମୋର କାର୍ଯ୍ୟ ଜାରି ରଖିବି | ଏହାସହ ଏହା ଏକ ଯନ୍ତ୍ରଣାଦାୟକ ନିଷ୍ପତ୍ତି ବୋଲି ସେ କହିଛନ୍ତି। ସେ କହିଛନ୍ତି ଯେ, ‘ମୁଁ ବହୁତ ସମୟ ଚିନ୍ତା କଲି ଏବଂ ହୃଦୟଙ୍ଗମ କଲି ଯେ ବର୍ତ୍ତମାନ କଂଗ୍ରେସର ଆଭ୍ୟନ୍ତରୀଣ ପ୍ରକ୍ରିୟା ଯେପରି ଚାଲିଛି, ମୁଁ ଆଉ ମୋର ସମ୍ମାନ ଏବଂ ଆତ୍ମ ସମ୍ମାନ ସହିତ ଆଗକୁ ବଢିପାରିବି ନାହିଁ’ |
ସୂଚନା ଥାଉ କି ଯେ ବରିଷ୍ଠ ଓକିଲ ଅଶ୍ୱିନୀ କୁମାର ମନମୋହନ ସିଂଙ୍କ ନେତୃତ୍ୱାଧୀନ ୟୁପିଏ ସରକାରରେ ଆଇନ ମନ୍ତ୍ରୀ ଥିଲେ। ସେ ୨୦୦୨ ରୁ ୨୦୧୬ ପର୍ଯ୍ୟନ୍ତ ତିନିଥର ରାଜ୍ୟସଭା ସଦସ୍ୟ ଥିଲେ। ସେ ଅତିରିକ୍ତ ସଲିସିଟର ଜେନେରାଲ ଭାବରେ ମଧ୍ୟ କାର୍ଯ୍ୟ କରିଥିଲେ |