ଏଥର ଶୀତରେ ଦିଲ୍ଲୀର ରେକର୍ଡ: ଶନିବାର ସକାଳେ ସର୍ବନିମ୍ନ ତାପମାତ୍ରା ୨. ୪ ଡିଗ୍ରି ସେଲିସିଅସ୍
ନୂଆଦିଲ୍ଲୀ: ଶନିବାର ସକାଳେ ଦିଲ୍ଲୀର ତାପମାତ୍ରା ୨. ୪ ଡିଗ୍ରି ସେଲିସିଅସ୍କୁ ଖସି ଆସି ଏପର୍ଯ୍ୟନ୍ତ ଏ ବର୍ଷର ସର୍ବନିମ୍ନ ତାପମାତ୍ରା ଭାବେ ରେକର୍ଡ କରାଯାଇଛି। ଆଗାମୀ ଦୁଇ ଦିନ ଧରି ଜାତୀୟ ରାଜଧାନୀ ଅଞ୍ଚଳରେ ଖୁବ୍ ଥଣ୍ଡା ଅନୁଭୂତ ହେବ ବୋଲି ପାଣିପାଗ ବିଭାଗ ପୂର୍ବରୁ ସତର୍କ କରାଇ ଦେଇଥିଲା।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ପାଣିପାଗ ବିଭାଗ କହିଛି ଯେ ସକାଳ ୬: ୧୦ରେ ଦିଲ୍ଲୀର ସର୍ବନିମ୍ନ ତାପମାତ୍ରା ଥିଲା ୨. ୪ ଡିଗ୍ରି ସେଲିସିଅସ୍। ଘନ କୁହୁଡ଼ି ଯୋଗୁଁ ଦୃଶ୍ୟତା ମଧ୍ୟ ୧୫୦ ମିଟରରୁ କମ୍ ଥିଲା।
ଡିସେମ୍ବର ୨୯ ତାରିଖ ଯାଏଁ ଦିଲ୍ଲୀରେ ହେମାଳିଆ ଦିନ ଓ ଶୀତ ଲହରୀ ଲାଗି ରହିବ। ଏହାପରେ ଦିନର ତାପମାତ୍ରା ବଢ଼ିବାର ସମ୍ଭାବନା ଥିବା କଥା ଭାରତୀୟ ପାଣିପାଗ ବିଭାଗ କହିଛି।
ସର୍ବୋଚ୍ଚ ତାପମାତ୍ରା ଅର୍ଥାତ୍ ଦିନର ତାପମାତ୍ରା ୬. ୪ ଡିଗ୍ରି ରହିଲେ ତାହାକୁ ଅତି ଥଣ୍ଡା ଦିନ ବୋଲି କୁହାଯାଇଥାଏ। ଏହି ସମୟରେ ଶୀତ ଲହରୀ ପ୍ରବାହିତ ହୁଏ ଏବଂ ସର୍ବନିମ୍ନ ତାପମାତ୍ରା ବା ରାତ୍ରୀର ତାପମାତ୍ରା ୪. ୫ ଡିଗ୍ରି ସେଲିସିଅସ୍ରୁ କମ୍ ରହେ।
ଭାରତୀୟ ପାଣିପାଗ ବିଭାଗର ବୈଜ୍ଞାନିକମାନେ କହିଛନ୍ତି ଯେ ‘ୱେଷ୍ଟର୍ଣ୍ଣ ଡିଷ୍ଟର୍ବାନ୍ସ୍’ ଯୋଗୁଁ ବର୍ଷା ଓ କୁଆପଥର ପଡ଼ିବାର ସମ୍ଭାବନା ଥିବାରୁ ଡିସେମ୍ବର ୩୧ ତାରିଖ ବେଳକୁ ଥଣ୍ଡା ସାମାନ୍ୟ କମିଯିବ।