ଭାରତୀୟ ସେନା ପାଇଁ ଟାଟା ପ୍ରସ୍ତୁତ କରିଥିବା ତୋପର ହେଲା ସଫଳ ପରୀକ୍ଷଣ
ନୂଆଦିଲ୍ଲୀ: ସ୍ବଦେଶୀ ତୋପ ନିର୍ମାଣ କରିବାରେ ଆଜି ଭାରତ ଏକ ନୂଆ ସଫଳତା ହାସଲ କରିଛି | ଡିଆରଡିଓ ସହାୟତାରେ ପ୍ରସ୍ତୁତ ଟାଟା କମ୍ପାନୀର ATAGS ବା ଆଟାଗସ ତୋପର ପରୀକ୍ଷଣ ସଫଳତାର ସହ ସମାପ୍ତ ହୋଇଛି | ଏହି ତୋପର ପରୀକ୍ଷା ରାଜସ୍ଥାନର ପୋଖରାନ୍ ଫାୟାରିଂ ରେଞ୍ଜରେ କରାଯାଇଥିଲା | ଆଡଭାନ୍ସଡ ଟୋଡ୍ ଆର୍ଟିଲରି ସିଷ୍ଟମରେ ଏହି ପରୀକ୍ଷା ସମାପ୍ତ କରିବା ପରେ କୁହାଯାଉଛି ଯେ ପ୍ରତିରକ୍ଷା ମନ୍ତ୍ରାଳୟ ଖୁବ ଶୀଘ୍ର ସ୍ଥଳସେନା ପାଇଁ ଏଗୁଡ଼ିକୁ କିଣିବାକୁ ଅର୍ଡର ଦେଇପାରେ |
Sambad is now on WhatsApp
Join and get latest news updates delivered to you via WhatsApp
ଟାଟା ଆଡଭାନ୍ସ ସିଷ୍ଟମ ଲିମିଟେଡ୍ (TASL) ପକ୍ଷରୁ କୁହାଯାଇଛି ଡିଆରଡିଓ ସହ ମିଳିତ ଭାବେ ବିକଶିତ କରାଯାଇଥିବା ୧୫୫X ୫୨ଏମଏମ ଆଟାଗସ ଆଜି ଫାୟାରିଂ ପରୀକ୍ଷଣକୁ ସଫଳତାର ସହିତ ସମାପ୍ତ କରିଛି | ଭାରତ ପାଇଁ ଏଭଳି ଅସ୍ତ୍ର ପ୍ରଣାଳୀ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଥିବାବେଳେ ଗତ କିଛି ବର୍ଷ ଧରି ପ୍ରତିରକ୍ଷା ଅନୁସନ୍ଧାନ ଏବଂ ବିକାଶ ସଂଗଠନ (DRDO) ର ଆର୍ମମେଣ୍ଟ ରିସର୍ଚ୍ଚ ଆଣ୍ଡ ଡେଭଲପମେଣ୍ଟ ଏଷ୍ଟାବ୍ଲିସମେଣ୍ଟ (ଏଆରଡୀ ଲ୍ୟାବ୍) ଆଟାଗସ ତୋପକୁ ନିର୍ମାଣ କରିଛି |
ଡିଆରଡିଓ ଦୁଇଟି ଘରୋଇ କମ୍ପାନୀ ଟାଟା ଏବଂ ଭାରତ ଫୋରଜ ସହିତ ମିଶି ଏହାକୁ ନିର୍ମାଣ କରିଛନ୍ତି | ୨୦୧୭ ରେ ଗଣତନ୍ତ୍ର ଦିବସ ପରେଡରେ ଏହି ତୋପକୁ ପ୍ରଥମ ଥର ପାଇଁ ପ୍ରଦର୍ଶିତ ହୋଇଥିଲା | ଏଥିରେ ସଂପୂର୍ଣ୍ଣ ସ୍ୱଦେଶୀ ବନ୍ଧୁକ ଖଞ୍ଜାଯାଇଥିବାବେଳେ ଏହାର ପରିସର ପ୍ରାୟ ୪୦ କିଲୋମିଟର ରହିଛି | ଏହି ପରୀକ୍ଷଣ ପରେ, କୁହାଯାଉଛି ଯେ ଆଟାଗସ୍ ଖୁବ ଶୀଘ୍ର ସେନାରେ ସାମିଲ ହେବ |