ଅଟଳ ଟନେଲ: ଏହି ବ୍ୟକ୍ତିଙ୍କ ପାଇଁ ସରକାରଙ୍କର ବଞ୍ଚିଯାଇଥିଲା ୧ ହଜାର କୋଟି ଟଙ୍କା
ନୂଆଦିଲ୍ଲୀ: ଅକ୍ଟୋବର ୩ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଉଦଘାଟିତ ହେବାକୁ ଯାଉଛି ଅଟଳ ରୋହତଙ୍ଗ ଟନେଲ | ତେବେ ଏହି ଟନେଲ ନିର୍ମାଣ ପଛରେ ଏମିତି ଜଣେ ବ୍ୟକ୍ତିଙ୍କର ହାତ ରହିଥିଲା ଯାହାଙ୍କ ଲାଗି ସରକାରଙ୍କର ୧ ହଜାର କୋଟି ଟଙ୍କା ପର୍ଯ୍ୟନ୍ତ ସଂଚୟ ହୋଇପାରିଥିଲା | ସ୍ୱତନ୍ତ୍ର ଟେକ୍ନୋଲୋଜି ମାଧ୍ୟମରେ ଆଗ୍ରା ବାସିନ୍ଦା ବ୍ରିଗେଡିୟର୍ (ଅବସରପ୍ରାପ୍ତ) ମନୋଜ କୁମାର ସରକାରଙ୍କ ଏକ ହଜାର କୋଟି ଟଙ୍କା ସଞ୍ଚୟ କରିଥିଲେ। ସୂଚନା ମୁତାବକ ସେନାର ବର୍ଡର ରୋଡ୍ ଅର୍ଗାନାଇଜେସନ୍ (BRO) ର ମୁଖ୍ୟ ଇଞ୍ଜିନିୟର ଥିବା ମନୋଜ, ଯଦି ଏହି ଟେକ୍ନୋଲୋଜି ବ୍ୟବହାର କରିନଥାନ୍ତେ ତେବେ ନିର୍ମାଣ କାର୍ଯ୍ୟ ଶେଷ କରିବାକୁ ଦୁଇ ବର୍ଷ ଅଧିକ ଲାଗିଥାନ୍ତା |
Sambad is now on WhatsApp
Join and get latest news updates delivered to you via WhatsApp
ପ୍ରକୃତରେ, ଟନେଲ ନିର୍ମାଣକୁ ନେଇ ଯେତେବେଳେ ସବିଶେଷ ପ୍ରକଳ୍ପ ରିପୋର୍ଟ ପ୍ରସ୍ତୁତ ହେଲା, ସେତେବେଳେ ଟନେଲ ମଧ୍ୟ ଦେଇ ଝରଣା ଏବଂ ଜଳସ୍ରୋତ ଯିବାର ଆଶଙ୍କା ଦେଖାଦେଇଥିଲା | ଯେଉଁଥିପାଇଁ ଟନେଲ ପାଇଁ ଏକ ନୂତନ ମାର୍ଗ ନିର୍ମାଣ ହେବ ବୋଲି କମ୍ପାନୀ କହିଥିଲା । ଏଥିରେ ଏକ ହଜାର କୋଟି ଟଙ୍କା ଅଧିକ ଖର୍ଚ୍ଚ ହେବ ଓ ଅଧିକ ଦୁଇ ବର୍ଷ ସମୟ ଲାଗିବ ବୋଲି କୁହାଯାଇଥିଲା | କିନ୍ତୁ ମନୋଜ କହିଥିଲେ ଯେ ଟେକ୍ନୋଲୋଜି ବଦଳାଇ ଏହି ମାର୍ଗ ଦ୍ୱାରା ଟନେଲ୍ ତିଆରି ହୋଇପାରିବ |
ମନୋଜ ନ୍ୟୁ ଅଷ୍ଟ୍ରିୟାନ ଟନେଲ ପଦ୍ଧତି ଗଭୀର ଭାବରେ ଅଧ୍ୟୟନ କରିଥିଲେ। ଏଥିରେ ବିଶେଷ ପ୍ରକାରର ସିମେଣ୍ଟ ଏବଂ କଂକ୍ରିଟ୍ ସାହାଯ୍ୟରେ ଝରଣାକୁ ଟନେଲ ଉପର ଦେଇ ପ୍ରବାହିତ କରାଯାଇଥିଲା | ଯାହା ପରେ ଟନେଲ ନିର୍ମାଣ ପାଇଁ ରାସ୍ତା ସଫା ହୋଇଯାଇଥିଲା |ଏଠାରେ ସୂଚନା ଥାଉ କି ସମୁଦ୍ରପତ୍ତନଠାରୁ ୧୦ ହଜାର ଫୁଟ ଉପରେ ନିର୍ମାଣ ହୋଇଥିବା ଏହି ଟନେଲ ପାଇଁ ୩୨୦୦ କୋଟି ଟଙ୍କା ଖର୍ଚ୍ଚ ହୋଇଛି |ପୂର୍ବତନ ଦିବଂଗତ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ନାମରେ ଏହି ଟନେଲ ନାମିତ ହୋଇଥିବାବେଳେ ଏହି ଟନେଲର ଲମ୍ବା ୯ କିଲୋମିଟର ରହିଛି | ଟନେଲଟି ଲେହ-ମନାଲି ରାଜପଥରେ ନିର୍ମାଣ ହୋଇଥିବାବେଳେ ଏହା ହିମାଚଳପ୍ରଦେଶର ମନାଲି ଓ ଲଦାଖର ଲେହ ମଧ୍ୟରେ ଥିବା ୪୬ କିଲୋମିଟର ଦୂରତାକୁ କମ କରିଦେବ |