ଢାକା : ବାଂଲାଦେଶରେ ପୁଣି ଥରେ ସଂଖ୍ୟାଲଘୁ ହିନ୍ଦୁମାନଙ୍କ ଉପରେ ଆକ୍ରମଣ ହୋଇଛି । ନାରେଲ ଜିଲ୍ଲା ଲୋହାରଗା ଅଂଚଳରେ କିଛି ଉତ୍ୟକ୍ତ ଜନତା ହିନ୍ଦୁମାନଙ୍କ ଘର ଓ ଦୋକାନ ଉପରେ ଆକ୍ରମଣ କରି ଭଙ୍ଗାରୁଜା ଓ ଜଳାପୋଡ଼ା କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଜଣେ ୧୮ ବର୍ଷୀୟ ହିନ୍ଦୁ ଯୁବକ ଦ୍ବାରା ଫେସବୁକରେ କରାଯାଇଥିବା ଏକ ପୋଷ୍ଟ ସେମାନଙ୍କ ଧାର୍ମୀକ ଭାବାବେଗକୁ ଆଘାତ ଦେଇଥିବା ଅଭିଯୋଗ କରି ଏହି ଆକ୍ରମଣ କରାଯାଇଥିଲା । ଶୁକ୍ରବାର ନମାଜ ପରେ ସାହାପଡ଼ା ଗ୍ରାମର ଲୋକମାନେ ଏକାଠି ହୋଇ ସଂପୃକ୍ତ ଯୁବକର ବାପାଙ୍କ ଦୋକାନ ଉପରେ ଆକ୍ରମଣ କରିଥିଲେ । ଏହା ପରେ ସେମାନେ ସଂପୃକ୍ତ ଯୁବକର ଘର ସମେତ ହିନ୍ଦୁମାନେ ରହୁଥିବା ଆଉ କିଛି ଘର ଉପରେ ଆକ୍ରମଣ ଓ ଜଳାପୋଡ଼ା କରିଥିଲେ । ସେମାନେ ମଧ୍ୟ ସାହାପଡ଼ାରେ ଥିବା ଏକ ମନ୍ଦିରକୁ ଆକ୍ରମଣ କରି ଭଙ୍ଗାରୁଜା କରିଥିଲେ । ଉତ୍ୟକ୍ତ ଭୀଡକୁ ନିୟନ୍ତ୍ରଣ କରିବାକୁ ପୁଲିସକୁ ଲାଠିମାଡ଼ ଓ ଲୁହବୁହା ଗ୍ୟାସ ପ୍ରୟୋଗ କରିବାକୁ ପଡ଼ିଥିଲା ।
ତେବେ ଉକ୍ତ ଫେସବୁକ ପୋଷ୍ଟ କରିଥିବା ଯୁବକ ଆକାଶ ଶାହା ଓ ତା ବାପା ଅଶୋକ ଶାହାଙ୍କୁ ପୁଲିସ ହାଜତକୁ ନେଇଯାଇଛି । ଏହି ଘଟଣାକୁ ଉକ୍ତ ଗ୍ରାମରେ ଉତ୍ତେଜନା ଲାଗି ରହିଥିବାବେଳେ ସ୍ଥିତିର ମୁକାବିଲା ପାଇଁ ପୁଲିସ ମୁତୟନ କରାଯାଇଛି । ଏହା ସହିତ ଘଟଣାସ୍ଥଳକୁ ବରିଷ୍ଠ ପୁଲିସ ଅଧିକାରୀମାନେ ଗସ୍ତ କରିଛନ୍ତି ।