ବିହାର : ନାଗରିକତା ଆଇନ ବିରୋଧୀ ର୍ୟାଲି ବେଳେ କହ୍ନୈୟା କୁମାରଙ୍କ ଉପରେ ପଥରମାଡ଼, ପ୍ରାଣ ବିକଳରେ ପଳାଇଗଲେ
ଆରା (ବିହାର) : ସିପିଆଇ ନେତା ତଥା ଜେଏନୟୁ ଛାତ୍ରସଂଘର ପୂର୍ବତନ ସଭାପତି କହ୍ନୈୟା କୁମାରଙ୍କ ଉପରେ ଆଜି ଆଉ ଥରେ ମାଡ଼ ହୋଇଛି । ସେ ଆଜି ବିହାରର ବକ୍ସରରୁ ଆରାକୁ ଯାଉଥିବାବେଳେ ତାଙ୍କ ଉପରକୁ ଉତ୍ତ୍ୟକ୍ତ ଜନତା ପଥରମାଡ଼ କରିଥିଲେ । ପରିସ୍ଥିତି ଏପରି ହୋଇଥିଲା ଯେ କହ୍ନୈୟା ପ୍ରାଣ ବିକଳରେ ପଳାଇଯାଇଥିଲେ ।
ନାଗରିକତା ଆଇନକୁ ସେ ବିରୋଧ କରୁଥିବାରୁ ତାଙ୍କ ଉପରେ ଏହି ପଥରମାଡ଼ ହୋଇଛି । ଏହି ଆଇନକୁ ବିରୋଧ କରି ସେ ଆଜି ବକ୍ସରରେ ଏକ ସଭା କରିବା ସହ ଆରାକୁ ଏକ ବାଇକ ର୍ୟାଲିରେ ଯାଉଥିଲେ । ବକ୍ସରଠାରେ ତାଙ୍କୁ କଳାପତାକା ଦେଖାଯାଇଥିଲା । ସେହିପରି ବାଇକ ର୍ୟାଲିବେଳେ ତାଙ୍କ ଉପରେ ପଥର ମାଡ଼ ହୋଇଥିଲା । ଏହି ପଥର ମାଡ଼ରେ ତାଙ୍କ ସହିତ ଥିବା କେତେକ ବାଇକ ଚାଳକ ପଡ଼ିଯାଇ ଆହତ ହୋଇଥିବା ଖବର ମିଳଛି ।
ସୂଚନାଯୋଗ୍ୟ ଯେ ଭାରତର ନାଗରିକତା (ସଂଶୋଧନ) ଆଇନରେ ଥିବା ବ୍ୟବସ୍ଥା ଅନୁସାରେ ପାକିସ୍ତାନ, ଆଫଗାନିସ୍ତାନ ଓ ବାଂଲାଦେଶରେ ଧର୍ମୀୟ ହିଂସାର ସମ୍ମୁଖୀନ ହେଉଥିବା ହିନ୍ଦୁ, ବୌଦ୍ଧ, ଶିଖ, ଖ୍ରୀଷ୍ଟିଆନ ଓ ପାର୍ସୀ ଆଦି ସଂପ୍ରଦାୟର ଶରଣାର୍ଥୀମାନଙ୍କୁ ଭାରତରେ ନାଗରିକତା ଦିଆଯିବ । ତେବେ ମୁସଲମାନ ମାନଙ୍କୁ ଏହି ବିଲ୍ ମାଧ୍ୟମରେ ନାଗରିକତା ଦିଆଯିବ ନାହିଁ ।