ମସ୍କୋ: ରୁଷିଆରେ ରାଷ୍ଟ୍ରପତି ନିର୍ବାଚନ ପାଇଁ ମତଦାନ ଶନିବାର ଦ୍ୱିତୀୟ ଦିନ ଜାରି ରହିଥିବାବେଳେ ରବିବାର ଭୋଟିଂ ପାଇଁ ଶେଷ ଦିନ ରହିଛି । ଦୁଇ ଦିନ ମଧ୍ୟରେ ବହୁ ସଂଖ୍ୟକ ଲୋକ ମତଦାନ ଅଧିକାର ସାବ୍ୟସ୍ତ କରିଛନ୍ତି। ଏହି ନିର୍ବାଚନରେ ରାଷ୍ଟ୍ରପତି ଭ୍ଲାଦିମିର ପୁଟିନ ପ୍ରମୁଖ ପ୍ରାର୍ଥୀ ଅଟନ୍ତି ଏବଂ ପଞ୍ଚମ ଥର ଛଅ ବର୍ଷ କାର୍ଯ୍ୟକାଳ ପାଇଁ ପୁନଃ-ନିର୍ବାଚିତ ହେବେ ବୋଲି ଆଶା କରାଯାଉଛି।
ଯଦିଓ ସ୍ୱର୍ଗତ ବିରୋଧୀଦଳର ନେତା ଆଲେକ୍ସି ନାଭଲନିଙ୍କ ସମର୍ଥକମାନେ ପୁଟିନଙ୍କୁ ବିରୋଧ କରୁଛନ୍ତି। ତେବେ ସେମାନଙ୍କ ବିରୋଧ ଦୁର୍ବଳ ଏବଂ ନେତୃତ୍ବହୀନ ରହିଛି। ତେଣୁ ପୁଟିନଙ୍କ ପୁନଃନିର୍ବାଚନରେ ଏହାର ଅଧିକ ପ୍ରଭାବ ପଡ଼ିବ ନାହିଁ ବୋଲି ଆଶା କରାଯାଉଛି। ଏହି ନିର୍ବାଚନରେ ୭୧ ବର୍ଷିୟ ପୁଟିନ ତିନିଜଣ ପ୍ରାର୍ଥୀଙ୍କ ସାମ୍ନା କରୁଛନ୍ତି କିନ୍ତୁ ସେମାନେ ଜୀବନ ଭୟରେ ରାଷ୍ଟ୍ରପତିଙ୍କ କଡ଼ା ସମାଲୋଚନାରୁ ଦୂରେଇ ରହିଛନ୍ତି। ଏହି ବିରୋଧୀ ପ୍ରାର୍ଥୀମାନେ ୟୁକ୍ରେନ ଯୁଦ୍ଧ ଉପରେ ସରକାରଙ୍କ ନୀତି ବିରୋଧରେ କିଛି କହୁନାହାଁନ୍ତି।
Sambad is now on WhatsApp
Join and get latest news updates delivered to you via WhatsApp
ପୁଟିନଙ୍କ ବିରୋଧ କରି ଏବଂ ୟୁକ୍ରେନ ଯୁଦ୍ଧରେ ନିଜର ଅସନ୍ତୋଷ ପ୍ରଦର୍ଶନ କରି ବିରୋଧୀଙ୍କ ଏକ ବର୍ଗ ରବିବାରର ଭୋଟ୍ ବର୍ଜନ କରବାକୁ ଆହ୍ବାନ କରିଛନ୍ତି। ଦେଶରେ ଦୁଇ ଦିନିଆ ଭୋଟ୍ ସମୟରେ ସୁରକ୍ଷା ବାହିନୀ ନିୟନ୍ତ୍ରଣକୁ ଆସିଥିବା ବେଳେ ପ୍ରାୟ ୨୦ ଟି ଭଙ୍ଗାରୁଜା, ହିଂସା ଏବଂ ବିରୋଧର ଘଟଣା ଘଟିଛି। ୟୁରାଲ୍ସ ଏବଂ ସାଇବରିଆରେ ଦୁଇଟି ବାଲାଟ ଟାମ୍ପରିଂ ଘଟଣା ଘଟିଛି। ଏହି ଘଟଣାରେ ପୋଲିସ କିଛି ଲୋକଙ୍କୁ ଗିରଫ କରିଛି। ଏହି ଘଟଣାରେ ଅଭିଯୁକ୍ତମାନଙ୍କୁ ଆଠ ବର୍ଷ ପର୍ଯ୍ୟନ୍ତ କାରାଦଣ୍ଡରେ ଦଣ୍ଡିତ କରାଯାଇପାରେ। ଶନିବାର ଭୋଟ୍ ସମୟରେ ୟୁକ୍ରେନର ଡ୍ରୋନ୍ ଏବଂ କ୍ଷେପଣାସ୍ତ୍ର ରୁଷିଆର ଆଭ୍ୟନ୍ତରୀଣ ଅଞ୍ଚଳ ଉପରେ ପୁଣି ଥରେ ଆକ୍ରମଣ କରିଥିଲା।
ବେଲଗୋରୋଡର ସୀମାନ୍ତ ଅଞ୍ଚଳରେ ୟୁକ୍ରେନ ଗୁଳିରେ ଦୁଇ ଜଣଙ୍କର ମୃତ୍ୟୁ ଘଟିଛି। ସୁରକ୍ଷା ଦୃଷ୍ଟିରୁ ସପିଂ ସେଣ୍ଟର ଏବଂ ସ୍କୁଲଗୁଡିକୁ ବନ୍ଦ ରଖାଯାଇଛି। ମସ୍କୋର ଦକ୍ଷିଣ-ପୂର୍ବରେ ଏକ ହଜାର କିଲୋମିଟର ଦୂରରେ ଥିବା ସାମରା ଅଞ୍ଚଳରେ ଅବସ୍ଥିତ ଏକ ବିଶୋଧନାଗାରରେ ୟୁକ୍ରେନ ଡ୍ରୋନ୍ ଆକ୍ରମଣ ଯୋଗୁଁ ନିଆଁ ଲାଗିଯାଇଛି। ହୋଇଥିବା କ୍ଷୟକ୍ଷତି ବିଷୟରେ ବିସ୍ତୃତ ସୂଚନା ମିଳିପାରି ନାହିଁ।
ରୁଷିଆ ଅଧିକୃତ ଜପୋରିଜିଆ ଅଞ୍ଚଳରେ ୟୁକ୍ରେନ ଏକ ମତଦାନ କେନ୍ଦ୍ର ଉପରେ ଡ୍ରୋନ୍ ଆକ୍ରମଣ କରିଥିଲା। ଏହି କାରଣରୁ କୌଣସି ବଡ଼ କ୍ଷତି ବିଷୟରେ ସୂଚନା ମିଳି ନାହିଁ । ୨୦୨୨ ମସିହାରେ ରୁଷିଆ ଜପୋରିଜିଆର ଏହି ଅଞ୍ଚଳ ଜିତିଥିଲା ଏବଂ ଏହାକୁ ଏହାର ଅଞ୍ଚଳ ଭାବରେ ଘୋଷଣା କରିଥିଲା | ରାଷ୍ଟ୍ରପତି ପୁଟିନ କହିଛନ୍ତି ଯେ ୟୁକ୍ରେନ ପାଶ୍ଚାତ୍ୟ ଦେଶର ଆଦେଶରେ ରୁଷିଆର ନିର୍ବାଚନକୁ ଭଣ୍ଡୁର କରିବାକୁ ଚେଷ୍ଟା କରୁଛି। ନିର୍ବାଚନ ପରେ ୟୁକ୍ରେନ୍ କୁ ଦଣ୍ଡ ଦିଆଯିବ।